ສະຫະພັນບານເຕະແຫ່ງຊາດລາວ( ສຕລ) ໄດ້ຈັດພິທີປີດການຝຶກອົບຮົມຄູຝຶກກິລາບານເຕະລະດັບຊີ(c) ທີ່ຫ້ອງປະຊຸມພະແນກສາທາລະນະສຸກແຂວງຄໍາມ່ວນ ຂື້ນໃນຕອນບ່າຍ ວັນທີ 08 ພະຈິກ 2024 ໃຫ້ກຽດເປັນປະທານກ່າວປີດຂອງທ່ານ ປອ ບຸນປອນ ທອງສຸວັນນະລາດ ຮອງຫົວຫນ້າພະແນກສືກສາ ແລະ ກິລາ ແຂວງຄຳມ່ວນ.

     ໃນໂອກາດດັ່ງກ່າວ ທ່ານ ປອ ບຸນປອນ ທອງສຸວັນນະລາດ ຍັງໄດ້ກ່າວໂອ້ລົມຕໍ່ຜູ້ເຂົ້າຮ່ວມຝຶກອົບຮົມໃນຄັ້ງນີ້ ໃຫ້ນຳໃຊ້ບົດຮຽນທີ່ຮຽນມາເຂົ້າໃນການຝຶກຊ້ອມໃຫ້ກັບເຍົາວະຊົນແລະ ສະໂມສອນ ອ້ອມຂ້າງແຂວງຄຳມ່ວນ ເພື່ອສ້າງນັກກິລາ ຮຸ່ນສືບທອດໃນລະດັບເຍົາວະຊົນພາຍໃນແຂວງ ເພື່ອກ້າວເປັນນັກກິລາອາຊີບ ແລະ ທີມຊາດໃນອະນາຄົດ.

      ການຝຶກອົບຮົມດັ່ງກ່າວແມ່ນໄດ້ເລີ້ມມາແຕ່ ວັນທີ 28 ຕຸລາ ຈົນຮອດ ວັນທີ 08 ພະຈິກ 2024, ໄລຍະການຝຶກອົບຮົມ ແມ່ນແບ່ງອອກເປັນ 2 ພາກ ປະກອບມີ ພາກທິດສະດີ ແລະ ການປະຕິບັດຕົວຈິງພາກສະໜາມ, ໂດຍຈະມີການສອບເສັງ 6 ຄັ້ງ ( ຕົວຈິງ 3 ຄັ້ງ ແລະ ທິດສະດີ 2 ຄັ້ງ ແລະ ເສັງກໍາມະການ 1 ຄັ້ງ ), ຜູ້ເຂົ້າຮ່ວມແມ່ນໄດ້ຮຽນຮູ້ກ່ຽວກັບ ການພັດທະນາຄູຝຶກ, ຄວາມຕ້ອງການຄູຝຶກຂອງ AFC, ພາລະບົດບາດ ແລະ ໜ້າທີຮັບຜິດຊອບ, ເຕັກນິກ ແລະ ຍຸດທະວິທີຂອງການເຕະບານ, ຄວາມສຳພັນກັບບານ, ການສົ່ງບານ, ການຈັບບານ, ການຍິງບານ, ຫຼັກການຂອງການຝຶກສອນ, ບານເຕະຟຸດຊໍ, ກະຕິກາຂອງກິລາບານເຕະ, ອາຫານ ແລະ ສຸຂະພາບ, ການຝຶກແອບ, ການຝຶກແອບຜູ້ຮັກສາປະຕູ, ການວາງແຜນ, ບົດບາດສຳຄັນຂອງຜູ້ຮັກສາປະຕູ, ການຈະເລີນເຕີບໃຫຍ່ ແລະ ການປະຖົມພະຍາບານ, ແນະນຳພາກປະຕິບັດກິດຈະກຳບານເຕະພື້ນຖານ, ການຫຼີ້ນບານໃນເກມ.

     ໃນຕອນທ້າຍພິທີ ຍັງໄດ້ມອບໃບຢັ້ງຢືນໃຫ້ແກ່ຜູ້ສຳເລັດການເຂົ້າຮວ່ມຝຶກອົບຮົມ. ສ່ວນຜົນຂອງການ ຝຶກອົບຮົມຄູຝຶກກິລາບານເຕະລະດັບຊີ (C) ແມ່ນຈະແຈ້ງໃຫ້ຮັບຊາບຕາມພາຍຫລັງ.

     ເຂົ້າຮວ່ມປິດພິທີຍັງມີ ທ່ານ ໂມຮໍາມັດ ເຮີມັນ ( Mohammad Herman B Zailani ) ຫົວໜ້າວຽກງານພັດທະນາຄູຝຶກ ສຕລ, ທ່ານ ວົງມີໄຊ ສຸບົວຄຳ ອາຈານຝຶກສອນ ຈາກ ສຕລ ພ້ອມດ້ວຍຄະນະ ແລະ ທ່ານ ແສງສະຫວັນ ຈັນທະຄຳມະນີ ຫົວໜ້າຂະແໜງກິລາພາລະສີລະປະສືກສາ