ສະຫະພັນບານເຕະແຫ່ງຊາດລາວ (ສຕລ) ໄດ້ຈັດວັນກິລາບານເຕະ ສຕລ (LFF Football Day) ຕິດພັນກັບວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ 1/6/2026) ທີ່ ສູນຝຶກກິລາບານເຕະ ຈໍາປີ-ຈໍາປີ ຫຼັກ 16ໃນວັນທີ 30 ພຶດສະພາ 2026 ຜ່ານມາ, ໂດຍການເຂົ້າຮ່ວມຂອງທ່ານ ວີເພັດ ສີຫາຈັກຣ ປະ ທານ ສະຫະພັນບານເຕະແຫ່ງຊາດລາວ ພ້ອມດ້ວຍຄະນະບໍລິຫານງານ ສຕລ, ພະນັກງານ ສຕລ ແລະ ພໍ່ແມ່ຜູ້ປົກຄອງ ນັກກິລາເຍົາວະຊົນເຂົ້າຮ່ວມ 400 ກວ່າຄົນຈາກ 21 ສະໂມສອນ.

ທ່ານ ວີເພັດ ສີຫາຈັກຣ ໄດ້ກ່າວວ່າ: ງານກິດຈະກຳ ວັນກິລາບານເຕະ ສຕລ ເຊິ່ງປີນີ້ ຖືເປັນປີທີ 4 ທີ່ ສຕລ ໄດ້ຈັດຕັ້ງປະຕິບັດ ໂດຍຄັ້ງທຳອິດແມ່ນເລີ່ມໃນປີ 2023. ພ້ອມດຽວກັນນັ້ນ, ເພື່ອໃຫ້ງານມີຄວາມໝາຍຄວາມສໍາຄັນຍິ່ງຂຶ້ນ ວັນກິລາບານເຕະ ສຕລ ຍັງກົງກັບວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ກໍຄື ວັນທີ 1 ມິຖຸນາ. ເພາະສະນັ້ນ ນອກຈາກການສ້າງກິດຈະກຳກິລາບານເຕະ ເພື່ອສົ່ງເສີມໃຫ້ ອະນຸຊົນ-ເຍົາວະຊົນ ຫັນມາອອກກຳລັງກາຍ ໃຫ້ສຸຂະພາບແຂງແຮງແລ້ວ ຍັງໄດ້ນໍາໃຊ້ເວລາວ່າງໃຫ້ເປັນປະໂຫຍດ ດ້ວຍການຫັນມາຫລີ້ນກິລາບານເຕະ ແລະ ເພື່ອເຮັດໃຫ້ເຂົາເຈົ້າໄດ້ຫ່າງໄກຈາກສິ່ງເສບຕິດຕ່າງໆ. ນອກນັ້ນ, ທາງ ສຕລ ຍັງແນ່ໃສ່ສ້າງປູກຈິດສໍານຶກໃຫ້ແກ່ ອະນຸຊົນ-ເຍົາວະຊົນ ໃຫ້ມີນໍ້າໃຈນັກກິລາ ຮູ້ຮັກແພງສາມັກຄີ, ຮັກການປູກຕົ້ນໄມ້ ແລະ ເອົາໃຈໃສ່ໃນວຽກປົກປັກຮັກສາສິ່ງແວດລ້ອມ ຫລື ສ້າງພື້ນທີ່ສີຂຽວໄປພ້ອມກັນ.

ຕະຫຼອດໄລຍະ 3 ປີຜ່ານມາ ສຕລ ໄດ້ພາກັນປູກຕົ້ນໄມ້ ຈຳນວນ 600 ກວ່າຕົ້ນ ແລະ ໃນປີນີ້ໄດ້ສືບຕໍ່ປູກຕົ້ນໄມ້ຕື່ມອີກ 200 ຕົ້ນ ທີ່ສູນຝຶກກິລາບານເຕະ ຈໍາປີ-ຈໍາປາ ເຊິ່ງປະກອບມີ ຕົ້ນດູ່, ຕົ້ນຝາງແດງ, ຕົ້ນຄູນ, ຕົ້ນໝາກມ່ວງ ແລະ ຕົ້ນໝາກໝີ້. ພາຍຫຼັງສິ້ນສຸດການປູກຕົ້ນໄມ້, ລູກໆຫລານໆ ຍັງໄດ້ມີກິດຈະກຳກິລາບານເຕະນຳຄະນະຄູຝຶກຈາກ ສຕລ ພ້ອມທັງໄດ້ມອບອຸປະກອນກິລາໃຫ້ບັນດາສະໂມສອນ ເພື່ອນໍາໃຊ້ເຂົ້າໃນ ການຮຽນ-ການສອນ ກິລາບານເຕະໃນຂົງເຂດທີ່ຕົນເອງໄດ້ຮັບຜິດຊອບ ເປົ້າໝາຍເພື່ອສ້າງນັກກິລາບານເຕະເຍົາວະຊົນໃຫ້ມີຈຳນວນເພີ້ມຂຶ້ນເລື້ອຍໆ.