ສະຫະພັນບານເຕະແຫ່ງຊາດລາວ (ສຕລ) ຮ່ວມກັບສະຫະພັນບານເຕະນາໆຊາດ (FIFA) ແລະ ສະຫະພັນບານເຕະ ແຂວງ ບໍ່ແກ້ວ ໄດ້ຈັດກິດຈະກຳບານເຕະຍິງເຍົາວະຊົນ "FIFA Women’s Football Campaign 2026" ຄັ້ງທີ 4 ຂຶ້ນໃນວັນທີ 6 ພະຈິກ 2026 ທີ່ ສະໜາມກິລາ ແຂວງ ບໍ່ແກ້ວ ໃຫ້ກຽດເຂົ້າຮ່ວມໂດຍ ທ່ານ ວັນນະສອນ ໂພທິປັນຍາ ປະທານ ສະຫະພັນກິລາບານເຕະ ແຂວງ ບໍ່ແກ້ວ, ທ່ານ ນາງ ສຸດາລີ ສີສຸວົງ ແລະ ທ່ານ ນາງ ສີວິໄລ ພົມມີສຸກ ຄະນະອະນຸກຳມະການບານເຕະຍິງ ສຕລ ພ້ອມທັງເດັກຍິງຈໍານວນ 200 ຄົນ ຈາກ 8 ໂຮງຮຽນ, ຄູຝຶກ 20 ທ່ານ. ພ້ອມດ້ວຍຕົວແທນນັກກິລາທີມຊາດຍິງ ຮຸ່ນ U17 ແລະ ທີມຊາດຍິງ ຊຸດໃຫຍ່ກໍ່ເຂົ້າຮ່ວມກິດຈະກຳ ແລະ ແບ່ງປັນປະສົບການນຳນ້ອງນັກຮຽນໃນຄັ້ງນີ້.

      ໃນໂອກາດນີ້ ທ່ານ ນາງ ສຸດາລີ ສີສຸວົງໄດ້ກ່າວເນັ້ນເຖິງຄວາມສຳຄັນຂອງການພັດທະນາບານເຕະຍິງ ໂດຍມຸ່ງເນັ້ນການເປີດໂອກາດໃຫ້ແມ່ຍິງ ແລະ ເດັກຍິງໄດ້ເຂົ້າເຖິງກິລາບານເຕະຢ່າງທົ່ວເຖິງ ພ້ອມທັງໄດ້ຮຽນຮູ້ທັກສະ ແລະ ມ່ວນຊື່ນກັບການຫຼິ້ນບານເຕະໃນບັນຍາກາດທີ່ປອດໄພ. ໃນນັ້ນ ທ່ານ ນາງ ສຸດາລີ ສີສຸວົງໄດ້ກ່າວວ່າ: "ການພັດທະນາບານເຕະຍິງ ບໍ່ແມ່ນພຽງແຕ່ການສ້າງນັກກິລາທີ່ເກັ່ງຂຶ້ນ ແຕ່ຍັງເປັນການສ້າງສຸຂະພາບທີ່ດີ, ຄວາມໝັ້ນໃຈ, ໂອກາດ ແລະ ຄວາມຝັນໃຫ້ແກ່ແມ່ຍິງ ແລະ ເດັກຍິງລາວ. ກິດຈະກຳຄັ້ງນີ້ ຈຶ່ງເປັນອີກກ້າວສຳຄັນໃນການສ້າງແຮງບັນດານໃຈໃຫ້ເດັກຍິງຮຸ່ນໃໝ່ ກ້າຝັນ, ກ້າລົງມືເຮັດ ແລະ ກ້າກ້າວສູ່ວົງການບານເຕະ ພ້ອມຮ່ວມກັນຂະຫຍາຍຖານບານເຕະຍິງລາວໃຫ້ເຂັ້ມແຂງຈາກສູນກາງສູ່ທ້ອງຖິ່ນ."

        ສະຫະພັນບານເຕະແຫ່ງຊາດລາວ (ສຕລ) ຈັດກອງປະຊຸມພັດທະນາຄູຝຶກບານເຕະປະຈໍາ ປີ 2026 ຂຶ້ນໃນວັນທີ 06 ພະຈິກ 2026 ທີ່ຜ່ານມາ, ທີ່ໂຮງແຮມແລກມາກ ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ວີເພັດ ສີຫາຈັກຣ ປະທານ ສຕລ. 

        ໃນພິທີ ທ່ານ ວີເພັດ ສີຫາຈັກຣ, ປະທານ ສຕລ ໄດ້ກ່າວເປີດກອງປະຊຸມຢ່າງເປັນທາງການ ໃນເນື້ອຫາບົດກ່າວສ່ວນໜຶ່ງ, ເພີ່ນໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ ແລະ ຄວາມຈຳເປັນໃນການຈັດກອງປະຊຸມໃນຄັ້ງນີ້. ຍາມໃດ ສຕລ ກໍໃຫ້ຄວາມສຳຄັນໃນການຍົກລະດັບຄວາມຮູ້ຄວາມສາມາດທັງຄູຝຶກ ແລະ ນັກກິລາໄປພ້ອມໆກັນ ເພາະຖືເປັນໝາກຫົວໃຈສຳຄັນຂອງແຜນຍຸດທະສາດການພັດນະນາກິລາບານເຕະລາວ. ຈາກນັ້ນ, ຜູ້ເຂົ້າຮ່ວມໄດ້ແລກປ່ຽນບົດຮຽນ, ປະສົບການຕົວຈິງຈາກຄູຝຶກສະໂມສອນບານເຕະ Selangor FC ຈາກປະເທດ ມາເລເຊຍ ທີ່ເປັນສະໂມສອນອັນດັບ 2 ໃນລີກສູງສຸດຂອງມາເລເຊຍປັດຈຸບັນ ເພື່ອໃຫ້ຜູ້ເຂົ້າຮ່ວມ ໄດ້ເຮັດເຖິງຮູບແບບການຈັດການສະໂມສອນລະດັບອາຊີບຂອງປະເທດໃນຂົງເຂດອາຊຽນ ເພື່ອຖອດຖອນເອົາບົດຮຽນ ຈະໄດ້ມາດັດປັບເຂົ້າກັບສະໂມສອນໃນ ສປປ ລາວ. 

        ການຈັດກອງປະຊຸມພັດທະນາຄູຝຶກບານເຕະ ສຕລ ປະຈຳປີ 2026 ແມ່ນຈັດຂຶ້ນເປັນຄັ້ງທີ 3, ເຊິ່ງມີ ບັນດາຄູຝຶກບານເຕະ ແລະ ວິຊາການ ສຕລ ເຂົ້າຮ່ວມ, ຈຸດປະສົງເພື່ອສ້າງຊຸມຊົນຄູຝຶກກິລາບານເຕະ ຈະໄດ້ແລກປ່ຽນປະສົບການ, ແນວຄິດ-ຍຸດທະສາດການພັດທະນາ, ຂໍ້ມູນຂ່າວສານ ເພື່ອໄປໝູນໃຊ້ໃນສະໂມສອນ ຫຼື ສູນຝຶກຊ້ອມບານເຕະເຍົາວະຊົນ (Football Academy) ໃນແຕ່ລະຂົງເຂດທີ່ຄູຝຶກຮັບຜິດຊອບ ເປັນທ່າແຮງໃນການພັກດັນວົງການກິລາບານເຕະໃຫ້ໄດ້ຮັບການພັດທະນາ ແລະ ຍົກລະດັບຄວາມຮູ້ຄວາມສາມາດຂອງຄູຝຶກບານເຕະລາວໃຫ້ຕໍ່ເນື່ອງ ກ້າວສູ່ລະດັບອາຊີບ, ທັງໃຫ້ກ້າວທັນຕາມມາດຕະຖານສາກົນໃນຍຸກກິລາບານເຕະສະໄໝໃໝ່ ແລະ ໃຫ້ທັນກັບບັນດາປະເທດໃນພາກພື້ນແລະສາກົນ. 

ຂ່າວ: ທິບພະກອນ ພະກາສີ

ພາບ: ສົມຫວັງ ຂະນີແກ້ວ

         ສະຫະພັນບານເຕະແຫ່ງຊາດລາວ (ສຕລ) ໄດ້ຈັດພິທີມອບໃບປະກາດ ຄູຝຶກລະດັບ ໂປຣ (LFF/AFC – Pro Diploma Coaching Course) ຂຶ້ນໃນວັນທີ 06 ພະຈິກ 2026 ຜ່ານມາ ຢູ່ທີ່ໂຮງແຮມແລນມາກ ໂດຍການໃຫ້ກຽດມອບໃບປະກາດໂດຍ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ, 

         ການຝຶກອົບຮົມ ຫຼັກສູດ “ຄູຝຶກບານເຕະ ລະດັບ Pro License” ແມ່ນໄດ້ຈັດຂຶ້ນເປັນຄັ້ງທໍາອິດໃນ ສປປ ລາວ ໂດຍໄດ້ມີຮັບຮອງຢ່າງເປັນທາງການຈາກ ສະຫະພັນບານເຕະອາຊີ (AFC) ແລະ ໄດ້ໃຊ້ເວລາຝຶກ ແຕ່ວັນທີ 14 ກໍລະກົດ 2025 ຫາ 30 ມິຖຸນາ 2026. ຫຼັກສູດນີ້ ຜູ້ເຂົ້າຮ່ວມໄດ້ລົງເລິກດ້ານດ້ານທິດສະດີ, ພາກການປະຕິບັດຕົວຈິງ, ການວາງແຜນຝຶກຊ້ອມ, ແຜນພັດທະນານັກກິລາທີ່ຕ້ອງປະສານງານຄູ່ກັບພາກການບໍລິຫານ ແລະ ເຮັດບົດວິພາກໂດຍຜ່ານການສຳພາດຈາກຄູຝຶກສອນ ກ່ອນຈະສາມາດຈົບຫຼັກສູດສົມບູນ. ນອກນັ້ນ, ຍັງໄດ້ເດີນທາງໄປທັດສະນະສຶກສາແລກປ່ຽນ ທີ່ ປະເທດ ຊາອຸດິອາຣາເບຍ ແລະ ປະເທດ ກາຕ້າ ໃນຊ່ວງເດືອນທັນວາ ປີ 2025. 

ຫຼັກສູດນີ້ມີຜູ້ເຂົ້າຮ່ວມທັງໝົດ 12 ຄູຝຶກ ສອບເສັງຜ່ານ 100%, ໃນນີ້ມີຕົວແທນຈາກ ສປປ ລາວ ຈໍານວນ 6 ທ່ານ (ຍິງ 1 ທ່ານ) ແລະ ຄູຝຶກຕ່າງປະເທດ ຈໍານວນ 6 ທ່ານ, ໂດຍມີລາຍຊື່ດັ່ງລຸ່ມນີ້:

1. ທ່ານ ຈັນດາລາພອນ ລຽບວິໄຊ ຈາກ ສະໂມສອນ ບານເຕະ ເອສະຣາ

2. ທ່ານ ໂອເລ້ ບູສະອາດ ຈາກ ສະໂມສອນ ບານເຕະ ມັດສະດ້າ ຈີບີ

3. ທ່ານ ກັນລະຍາ ສີສົມຫວັງ, ຫົວໜ້າຄູຝຶກ ທີມຊາດ U20 ສະຫະພັນບານເຕະແຫ່ງຊາດລາວ 

4. ທ່ານ ຄໍາໃສ ຈັນທະວົງ ຈາກ ສະໂມສອນ ບານເຕະ ຫຼວງພະບາງ ຟຟລ

5. ທ່ານ ນ. ພອນທິບ ແສງມະນີ, ຫົວໜ້າຄູຝຶກທີມຊາດຍິງ ແລະ ເຍົາວະຊົນຍິງ ຮຸ່ນ U17 ປີ, ສະຫະພັນບານເຕະແຫ່ງຊາດລາວ 

6. ທ່ານ ວົງມີໄຊ ສຸບົວຄຳ ຈາກ ສະໂມສອນ ບານເຕະ ມັດສະດ້າ ຈີບີ

7. ທ່ານ Supachai Komsilp ຈາກ ປະເທດ ໄທ

8. ທ່ານ Hok Sochetra ຈາກ ປະເທດ ກໍາປູເຈຍ

9. ທ່ານ Lizuka Koichiro ຈາກ ປະເທດ ຍີ່ປຸ່ນ

10. ທ່ານ Mohd Noh Alam Shah ຈາກ ປະເທດ ສິງກະໂປ

11. ທ່ານ Mohammad Isa Bin Abdul Halim ຈາກ ປະເທດ ສິງກະໂປ

12. ທ່ານ Arulchelvan A/L Ilenggo ຈາກ ປະເທດ ມາເລເຊຍ

        ແອັດມິນຂໍສະແດງຄວາມຍິນດີນຳທຸກໆທ່ານ ແລະ ຫວັງວ່າຈະໄດ້ເຮັດປະກົດການໃໝ່ໃນວົງການກິລາບານເຕະລາວຈາກຄູຝຶກລະດັບໂປຣທຸກໆທ່ານໃນອານາຄົດ.  

 ຂ່າວ: ທິບພະກອນ ພະກາສີ

 ພາບ: ສົມຫວັງ ຂະນີແກ້ວ