ສະຫະພັນບານເຕະແຫ່ງຊາດລາວ (ສຕລ) ໄດ້ຈັດວັນກິລາບານເຕະ ສຕລ (LFF Football Day) ຕິດພັນກັບວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ 1/6/2026) ທີ່ ສູນຝຶກກິລາບານເຕະ ຈໍາປີ-ຈໍາປີ ຫຼັກ 16ໃນວັນທີ 30 ພຶດສະພາ 2026 ຜ່ານມາ, ໂດຍການເຂົ້າຮ່ວມຂອງທ່ານ ວີເພັດ ສີຫາຈັກຣ ປະ ທານ ສະຫະພັນບານເຕະແຫ່ງຊາດລາວ ພ້ອມດ້ວຍຄະນະບໍລິຫານງານ ສຕລ, ພະນັກງານ ສຕລ ແລະ ພໍ່ແມ່ຜູ້ປົກຄອງ ນັກກິລາເຍົາວະຊົນເຂົ້າຮ່ວມ 400 ກວ່າຄົນຈາກ 21 ສະໂມສອນ.

ທ່ານ ວີເພັດ ສີຫາຈັກຣ ໄດ້ກ່າວວ່າ: ງານກິດຈະກຳ ວັນກິລາບານເຕະ ສຕລ ເຊິ່ງປີນີ້ ຖືເປັນປີທີ 4 ທີ່ ສຕລ ໄດ້ຈັດຕັ້ງປະຕິບັດ ໂດຍຄັ້ງທຳອິດແມ່ນເລີ່ມໃນປີ 2023. ພ້ອມດຽວກັນນັ້ນ, ເພື່ອໃຫ້ງານມີຄວາມໝາຍຄວາມສໍາຄັນຍິ່ງຂຶ້ນ ວັນກິລາບານເຕະ ສຕລ ຍັງກົງກັບວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ກໍຄື ວັນທີ 1 ມິຖຸນາ. ເພາະສະນັ້ນ ນອກຈາກການສ້າງກິດຈະກຳກິລາບານເຕະ ເພື່ອສົ່ງເສີມໃຫ້ ອະນຸຊົນ-ເຍົາວະຊົນ ຫັນມາອອກກຳລັງກາຍ ໃຫ້ສຸຂະພາບແຂງແຮງແລ້ວ ຍັງໄດ້ນໍາໃຊ້ເວລາວ່າງໃຫ້ເປັນປະໂຫຍດ ດ້ວຍການຫັນມາຫລີ້ນກິລາບານເຕະ ແລະ ເພື່ອເຮັດໃຫ້ເຂົາເຈົ້າໄດ້ຫ່າງໄກຈາກສິ່ງເສບຕິດຕ່າງໆ. ນອກນັ້ນ, ທາງ ສຕລ ຍັງແນ່ໃສ່ສ້າງປູກຈິດສໍານຶກໃຫ້ແກ່ ອະນຸຊົນ-ເຍົາວະຊົນ ໃຫ້ມີນໍ້າໃຈນັກກິລາ ຮູ້ຮັກແພງສາມັກຄີ, ຮັກການປູກຕົ້ນໄມ້ ແລະ ເອົາໃຈໃສ່ໃນວຽກປົກປັກຮັກສາສິ່ງແວດລ້ອມ ຫລື ສ້າງພື້ນທີ່ສີຂຽວໄປພ້ອມກັນ.

ຕະຫຼອດໄລຍະ 3 ປີຜ່ານມາ ສຕລ ໄດ້ພາກັນປູກຕົ້ນໄມ້ ຈຳນວນ 600 ກວ່າຕົ້ນ ແລະ ໃນປີນີ້ໄດ້ສືບຕໍ່ປູກຕົ້ນໄມ້ຕື່ມອີກ 200 ຕົ້ນ ທີ່ສູນຝຶກກິລາບານເຕະ ຈໍາປີ-ຈໍາປາ ເຊິ່ງປະກອບມີ ຕົ້ນດູ່, ຕົ້ນຝາງແດງ, ຕົ້ນຄູນ, ຕົ້ນໝາກມ່ວງ ແລະ ຕົ້ນໝາກໝີ້. ພາຍຫຼັງສິ້ນສຸດການປູກຕົ້ນໄມ້, ລູກໆຫລານໆ ຍັງໄດ້ມີກິດຈະກຳກິລາບານເຕະນຳຄະນະຄູຝຶກຈາກ ສຕລ ພ້ອມທັງໄດ້ມອບອຸປະກອນກິລາໃຫ້ບັນດາສະໂມສອນ ເພື່ອນໍາໃຊ້ເຂົ້າໃນ ການຮຽນ-ການສອນ ກິລາບານເຕະໃນຂົງເຂດທີ່ຕົນເອງໄດ້ຮັບຜິດຊອບ ເປົ້າໝາຍເພື່ອສ້າງນັກກິລາບານເຕະເຍົາວະຊົນໃຫ້ມີຈຳນວນເພີ້ມຂຶ້ນເລື້ອຍໆ.

          ສະຫະພັນບານເຕະແຫ່ງຊາດລາວ(ສຕລ) ຮ່ວມກັບສະຫະພັນບານເຕະແຂວງອຸດົມໄຊ ສົມທົບ ກັບພະແນກສຶກສາທິການ ແລະ ກິລາແຂວງໄດ້ຈັດກິດຈະກຳຝຶກສອນທັກສະການຫຼີ້ນກິລາບານເຕະຂັ້ນພື້ນຖານ ( AFC Grassroots Football Day )ໃຫ້ບັນດານ້ອງໆເຍົາວະຊົນພາຍໃນແຂວງດັ່ງກ່າວຂື້ນເມື່ອຕອນເຊົ້າວັນທີ 23 ພຶດສະພາ 2026 ທີ່ສະໜາມກິລາບານເຕະແຂວງ,ໂດຍໃຫ້ກຽດເຂົ້າຮ່ວມຂອງ ທ່ານ ພັທ ຖາວອນ ຫຼວງຈັນດາວົງ ຄະນະບໍລິຫານງານ ສຕລ, ທ່ານ ສີທອງ ທັນຂັນຕິ ຮອງຫົວໜ້າພະແນກສຶກສາທິການ ແລະ ກິລາແຂວງ, ທ່ານ ຄໍາສຸກ ສຣິດທິລາດ ຮອງປະທານສະຫະພັນບານເຕະແຂວງອຸດົມໄຊ.

         ຈຸດປະສົງແມ່ນເພື່ອເສີມສ້າງພັດທະນາກິລາບານເຕະຮຸ່ນສຶບທອດໃຫ້ເປີດກວ້າງໄປທົ່ວແຂວງແລະທົ່ວປະເທດ,ເພື່ອຮຽນຮູ້ແລະນຳໃຊ້ທັກສະກິລາບານເຕະຂັ້ນພື້ນຖານໃຫ້ຖືກຕ້ອງຕາມຂັ້ນຕອນ ແລະ ມີຄວາມຄ່ອງແຄ້ວ,ພ້ອມນັ້ນກໍເປັນການປັບປຸງ ແລະ ພັດທະນາຄູຝຶກໃຫ້ມີຄວາມຮູ້ຄວາມສາມາດ ໃນການເຂົ້າຮ່ວມການຝຶກອົບຮົມຄູຝຶກລະດັບຊາດ ແລະລະດັບແຂວງຕື່ມອີກ,ທັງເປັນການຊອກຫານັກກິລາອະນຸຊົນ-ເຍົາວະຊົນທີ່ມີພອນສະຫວັນໃນດ້ານກິລາບານເຕະມາເປັນນັກກິລາສືບທອດ,ເປັນນັກກິລາທີ່ໜຸ່ມນ້ອຍມີທັກສະ ແລະສາມາດພັດທະນາຕົວເອງ ໃຫ້ກາຍເປັນນັກກິລາຕົວແທນໃນຂະແໜງການຕ່າງໆ ກ້າວໄປເປັນນັກກິລາທີມຂອງແຂວງ ແລະ ນັກກິລາທີມຊາດໃນອະນາຄົດ. ນອກນັ້ນການຫຼີ້ນກິລາຍັງເປັນການຝຶກຝົນໃຫ້ນ້ອງໆນັກຮຽນມີສຸຂະພາບແຂງແຮງ,ມີຄວາມສາມັກຄິຮັກແພງ,ມີນໍ້າໃຈນັກກິລາ,ມັກຮັກໃນການຫຼີ້ນກິລາບານເຕະແລະ ຫ່າງໄກຈາກສິ່ງເສບຕິດ,ອະບາຍຍະມຸກຕ່າງໆ.

         ເຂົ້າຮ່ວມກິດຈະກໍາໃນຄັ້ງນີ້ຍັງມີ ຄະນະສະຫະພັນບານເຕະແຂວງອຸດົມໄຊ, ຄະນະຮັບຜິດ ຊອບ,ຄູຝຶກ, ນັກກິລາລວມ 200 ກວ່າຄົນ ແລະ ພໍ່ແມ່ນັກກິລາ ເຂົ້າຮ່ວມງານ.

          ສະຫະພັນບານເຕະແຫ່ງຊາດລາວ (ສຕລ) ສົມທົບກັບ ພະແນກສຶກສາທິການ ແລະ ກິລາ ແຂວງ ສະຫວັນນະເຂດ ໄດ້ຈັດພິທີເປີດກິດຈະກຳ ໂຄງການກິລາບານເຕະໃນໂຮງຮຽນ (FIFA FOOTBALL FOR SCHOOLS) ຂຶ້ນຕອນເຊົ້າຂອງວັນທີ 23 ກັນຍາ 2025 ທີ່ສະໜາມກິລາບານເຕະ ແຂວງ ສະຫວັນນະເຂດ, ໃຫ້ກຽດເປີດພິທີໂດຍ ທ່ານ ອະນຸສອນ ສຸດທິວົງ ຮອງຫົວໜ້າພະແນກສຶກສາທິການ ແລະ ກິລາ ແຂວງ ສະຫວັນນະເຂດ, ທ່ານ ພັທ ຖາວອນ ດວງຈັນດາວົງ ຄະນະບໍລິຫານງານ ສຕລ, ທ່ານ ໄພສານ ຈັນສີນາ ປະທານ ສະຫະພັນບານເຕະ ແຂວງ ສະຫວັນນະເຂດ, ທ່ານ ພູຄຳ ກອງສີຫາລາດ ຮອງຫົວໜ້າ ພະແນກພະລະສຶກສາ ກົມກິລາມວນຊົນພະລະ ແລະ ສີລະປະສຶກສາ ກະຊວງ ສຶກສາທິການ ແລະ ກິລາ, ທ່ານ Sundram Moorthy ຫົວໜ້າພະແນກເຕັກນິກວິທະຍາຂອງ ສຕລ, ວິທະຍາກອນຈາກ ສຕລ, ຫົວໜ້າຂະແໜງກິລາກາຍະກໍາ, ຄູສອນພະລະສຶກສາ, ຄູສອນຊ່ວຍ, ຜູ້ຮັບຜິດຊອບວຽກງານກິລາໃນໂຮງຮຽນປະຖົມ ແລະ ມັດທະຍົມ ລວມທັງນ້ອງນັກຮຽນທັງຍິງແລະຊາຍ 100 ກວ່າຄົນເຂົ້າຮ່ວມ.

            ຈຸດປະສົງເພື່ອຍົກລະດັບຄວາມຮູ້ຄວາມສາມາດ ແລະ ວິທີສິດສອນກິລາບານເຕະໃຫ້ກັບຄູພະລະສຶກສາທົ່ວ ແຂວງ ສະຫວັນນະເຂດ ໂດຍໄດ້ນໍາເອົາຫຼັກສູດແບບໃໝ່ຂອງກິລາບານເຕະໄປນໍາໃຊ້ຝຶກແອບຢູ່ບັນດາໂຮງຮຽນໃນ ທົ່ວແຂວງ, ທັງເປັນການພັດທະນານັກກິລາບານເຕະລຸ້ນສືບທອດກໍ່ຄືລຸ້ນເຍົາວະຊົນທັງ ຍິງ-ຊາຍ ໃຫ້ກ້າວສູ່ຄຸນນະພາບສຸງຂື້ນ. ໃນນັ້ນ, ລວມມີການແນະນໍາການຝຶກແອບນັກກິລາໃຫ້ຮູ້ປັບປຸງຄວາມສາມາດຂອງການຫຼີ້ນກິລາບານເຕະ,ຮູ້ທັກສະ,ມີໄຫວພິກໃນການຫຼີ້ນບານທີ່ຄ່ອງແຄ້ວ,ມີນໍ້າໃຈນັກກິລາ,ເປັນສູນກາງເຂົ້າເຖິງນັກກິລາ,ເປັນຈຸດສຸມຂອງການພັດທະນານັກກິລາເຍົາວະຊົນ ຍິງ-ຊາຍ ເພື່ອອະນາຄົດ ແລະ ເປັນເວທີສອນນັກ ກິລາໃຫ້ຫຼິ້ນຫຼາຍກວ່າເພື່ອເອົາໄຊຊະນະ.

ການເປີດໂຄງການກິລາບານເຕະໃນໂຮງຮຽນ (FIFA FOOTBALL FOR SCHOOLS) ທີ່ ແຂວງ ສະຫວັນນະເຂດ ຖືວ່າເປັນແຂວງທີ 5 ຖັດຈາກ ແຂວງ ຫົວພັນ, ເຊກອງ, ບໍ່ແກ້ວ ແລະ ນະຄອນຫຼວງວຽງຈັນ. ພາຍໃນງານ ສຕລ ຍັງໄດ້ມອບໝາກບານໃຫ້ບັນດາໂຮງຮຽນທີ່ເຂົ້າຮ່ວມ ລວມທັງໝົດ 700 ໜ່ວຍ ເພື່ອນໍາໃຊ້ເຂົ້າໃນການສິດສອນວິຊາພະລະສຶກສາໃນໂຮງຮຽນຊັ້ນປະຖົມ ແລະ ມັດທະຍົມອີກດ້ວຍ.

        ສະຫະພັນບານເຕະແຫ່ງຊາດລາວ ( ສຕລ ) ໄດ້ຈັດຝຶກອົບຮົມກຳມະການຕັດສິນ ເພື່ອກຽມຄວາມພ້ອມຕັດສິນ ການແຂ່ງຂັນບານເຕະ ຮຸ່ນອາຍຸບໍ່ເກີນ 16ປີ (U16) ແລະ ຮຸ່ນອາຍຸບໍ່ເກິນ 19 ປີ (U19) ຊີງຂັນ ສຕລ ປະຈໍາປີ 2025 ຂື້ນເມື່ອວັນທີ 13 ມິຖຸນາ 2025 ຢູ່ທີ່ຫ້ອງປະຊຸມສຕລ, ໂດຍມີ ທ່ານ ຄຳແພງ ວົງຂັນຕີ ຮອງປະທານ ສຕລ ທັງເປັນຫົວໜ້າອະນຸກຳມະການຕັດສິນ ສຕລ, ທ່ານ ໄຊປະເສີດ ພົງຊະນິດ ຫົວຫນ້າພະແນກ ກຳມະການຕັດສິນ ສຕລ ເປັນຄູຝຶກ, ຜູ້ປະເມີນກຳມະການຕັດສິນ ແລະ ກຳມະການຕັດສິນ ທັງຫມົດ 29 ຄົນ, ເປັນຍິງ 5 ຄົນ ທີ່ມາຈາກຫລາຍພາກສ່ວນ.

        ທ່ານ ຄຳແພງ ວົງຂັນຕີ ຮອງປະທານສຕລໄດ້ກ່າວວ່າ: ໄດ້ຍົກໃຫ້ເຫັນກ່ຽວກັບພາລະບົດບາດກຳມະການສິນແມ່ນຄວາມສຳຄັນຫລາຍ, ການຝຶກອົບໃນຄັ້ງນີ້ກໍເພື່ອເປັນກະກຽມກຳມະການຕັດສິນໃນການແຂ່ງຂັນບານເຕະ U16 ແລະ U19 ຊີງຂັນສຕລ ປະຈໍາປີ 2025 , ເພາະສະນັ້ນຈິ່ງຮຽກຮ້ອງມາຍັງກຳມະການຕັດສິນ ທຸກຄົນຈົ່ງເອົາໃຈໃສ່ໃນການຝຶກອົບຮົມ ສຶກສາກົດລະບຽບທີ່ທາງສະຫະພັນບານເຕະນານາຊາດ(FIFA )ປັປປຸງໃຫມ່ ໃຫ້ລະອຽດ ເພື່ອເຮັດໃຫ້ການຕັດສິນແຕ່ລະນັດອອກມາດີທີ່ສຸດແລະຫລີກເວັ້ນຂໍ້ຜິດພາດຕ່າງໆ.

          ສຳລັບການຝຶກອົບກຳມະການຕັດສິນ ຈະໄດ້ດຳເນີນການຝຶກອົບຮົມນັບຕັ້ງແຕ່ວັນທີ 13-15 ມິຖຸນາ 2025 ໂດຍບັນດາກຳມະການຕັດສິນ ແມ່ນຈະໄດ້ຮຽນຮູ້ ທາງດ້ານທິດສະດີ ແລະ ພາກປະຕິບັດຕົວຈິງ, ພ້ອມດຽວກັນນັ້ນກໍ່ຈະໄດ້ມີການທົດສອບພະລະກຳລັງຕື່ມອີກ.

AFC Grassroots Charter ເປັນໂຄງການຂອງ ສະຫະພັນບານເຕະເອຊີ (AFC) ທີ່ສ້າງຂຶ້ນເພື່ອສົ່ງເສີມ ແລະ ຍົກລະດັບການພັດທະນາບານເຕະໃນທຸກລະດັບ, ໂດຍເນັ້ນໃຫ້ຄວາມສຳຄັນກັບການພັດທະນາບານເຕະຂັ້ນພື້ນຖານ ສຳລັບບັນດາປະເທດສະມາຊິກຂອງ ສະຫະພັນບານເຕະອາຊີ (AFC), ໂດຍທາງ ສະຫະພັນບານເຕະອາຊີ (AFC) ໄດ້ແບ່ງອອກເປັນ 3 ປະເພດ ຄື:

1. ປະເພດຫລຽນຄຳ (Gold Level Membership)

2. ປະເພດຫຼຽນເງິນ (Silver Level Membership)

3. ປະເພດຫຼຽນທອງ (Bronze Level Membership)

ສະຫະພັນບານເຕະແຫ່ງຊາດລາວ ແມ່ນໄດ້ຮັບລາງວັນດັ່ງກ່າວປະເພດຫລຽນທອງ (Bronze Level Members) ແຕ່ ໃນປີ 2019 ແລະ ໄດ້ຮັບການເລື່ອນເປັນປະເພດຫຼຽນເງິນ (Silver Level Membership) ໃນ ປີ 2025. ເຊິ່ງໃນປັດຈຸບັນມີປະເທດສະມາຊິກຂອງ ສະຫະພັນບານເຕະອາຊີ AFC 10 ກວ່າປະເທດ ທີ່ໄດ້ຮັບການຈັດຢູ່ປະເພດຫຼຽນເງິນ ເຊິ່ງໃນນັ້ນລວມມີ ສ ປ ປ ລາວ ທີ່ໄດ້ຮັບໃນ ປີ 2025 ນີ້.

ໃນລະຫວ່າງ ວັນທີ 14 – 16 ມີນາ 2025, ກ່ອນທີ່ ສະຫະພັນບານເຕະແຫ່ງຊາດລາວ ໄດ້ຮັບ ການເລື່ອນລຳດັບຈາກປະເພດ ຫຼຽນທອງ (Bronze Level Membership) ເປັນປະເພດຫຼຽນເງິນ (Silver Level Membership) ສະຫະພັນບານເຕະແຫ່ງຊາດລາວ ໄດ້ມີໂອກາດຕ້ອນຮັບ ຄະນະກຳມະການຈາກ ສະຫະພັນບານເຕະອາຊີ (AFC Grassroots Panel) ທີ່ເດີນທາງມາເພື່ອປະເມີນ ແລະ ຕີລາຄາ ແນວທາງການພັດທະນາບານເຕະຂັ້້ນພື້ນຖານຂອງສະຫະພັນບານເຕະແຫ່ງຊາດລາວ ແລະ ລວມໄປເຖິງການເຄື່ອນໄຫວກິລາບານເຕະຂັ້້ນພື້ນຖານຢູ່ ສ ປ ປ ລາວ.

ການທີ່ ສ ປ ປ ລາວ ກໍຄື ສະຫະພັນບານເຕະແຫ່ງຊາດລາວ (ສຕລ) ໄດ້ຮັບລາງວັນປະເພດຫຼຽນເງິນໃນຄັ້ງນີ້ແມ່ນສະຫະພັນບານເຕະອາຊີ AFC ເຫັນໄດ້ເຖິງຄວາມພະຍາຍາມ ແລະ ຄວາມເອົາໃຈໃສ່ຂອງ ສຕລ ແລະ ທົ່ວສັງຄົມລາວທີ່ມີການພັດທະນາກິລາບານເຕະຂັ້ນພຶ້ນຖານຢ່າງຕໍ່ເນື່ອງ ແລະ ເປັນໂຄງສ້າງ. ຕະຫຼອດໄລຍະທີ່ຜ່ານມາແມ່ນມີຜົນງານຢ່າງພົ້ນເດັ່ນ,ໂດຍສະເພາະແມ່ນໄດ້ເອົາໃຈໃສ່ໃນການພັດທະນາກິລາບານເຕະຂັ້ນພຶ້ນຖານໂດຍຜ່ານກິດຈະກຳ ແລະ ບັນດາໂຄງການຕ່າງໆເຊັ່ນ:ການສ້າງ ສູນພັດທະນາກິລາບານເຕະ ຈຳປີ - ຈຳປາ , ການຈັດການແຂ່ງຂັນບານເຕະໃນຮຸ່ນເຍົາວະຊົນ ຍິງ-ຊາຍ, ການໄປຝຶກສອນກິລາບານເຕະ ແລະ ເຮັດກິດຈະກຳໃຫ້ກັບເດັກນ້ອຍຢູ່ທ້ອງຖິ່ນ ແລະ ໂຮງຮຽນທີ່ຫຼາຍຂຶ້ນ,ໂດຍນໍາໃຊ້ ຫຼັກການສິດສອນຂອງ ສຕລ ທີ່ຜ່ານການສຶກສາຄົ້ນຄວ້າຈາກການນໍາຊ່ຽວຊານ ແລະ ຜູ້ຝຶກສອນທີ່ໄດ້ຮັບການຝຶກອົບຮົມເປັນຢ່າງດີ, ເຊິ່ງໂຄງການທັງໝົດແມ່ນໄດ້ປະຕິບັດຮ່ວມກັບກະຊວງສຶກສາທິການ ແລະ ກິລາ, ພະແນກສຶກສາທິການ-ກິລາແຂວງ ແລະ ສະຫະພັນບານເຕະແຂວງ ເຊິ່ງເປັນຄູ່ຮ່ວມງານຂອງສະຫະພັນບານເຕະແຫ່ງຊາດລາວດວ້ຍຜົນສຳເລັດ.

ສຳລັບໂຄງການບານເຕະຍິງກໍໄດ້ຮັບການເອົາໃຈໃສ່ຄຽງຄູ່ກັນ,ເຊິ່ງໄດ້ມີການຈັດການແຂ່ງຂັນ ແລະ ກິດຈະກຳບານເຕະ ເພື່ອສະຫຼອງວັນແມ່ຍິງສາກົນ ຮ່ວມກັບ ສະຫະພັນບານເຕະອາຊີ (AFC) ພາຍໃຕ້ໂຄງການ AFC Women’s Football Day, ກິດຈະກຳບານເຕະຍິງຮ່ວມກັບ ສະຫະພັນບານເຕະນານາຊາດ (FIFA) ພາຍໃຕ້ໂຄງການ FIFA Women’s Football Campaign, ແລະ ກິດຈະກໍາ ສະເຫຼີມສະຫຼອງວັນບານເຕະສໍາລັບລຸ້ນເຍົາວະຊົນ ພາຍໃຕ້ໂຄງການ AFC Grassroots Football Day. ບັນດາກິດຈະກໍາເຫຼົ່ານີ້ໄດ້ຊ່ວຍຊຸກຍູ້ໃຫ້ເຍົາວະຊົນລາວໄດ້ມີສ່ວນຮ່ວມ ແລະ ເຂົ້າຮ່ວມໃນກິລາບານເຕະເປັນຈໍານວນຫຼາຍຂຶ້ນ.

ພ້ອມດຽວກັນນີ້ ທ່ານ ວີເພັດ ສີຫາຈັກ, ປະທານ ສະຫະພັນບານເຕະແຫ່ງຊາດລາວ ໄດ້ກ່າວເຖິງການໄດ້ຮັບການເລື່ອນເປັນປະເພດ ຫຼຽນເງິນ ວ່າ “ໃນນາມຂອງສະຫະພັນບານເຕະແຫ່ງຊາດລາວ, ຂ້າພະເຈົ້າຮູ້ສຶກເປັນກຽດຢ່າງຍິ່ງທີ່ ສຕລ ໄດ້ຮັບການເລື່ອນລຳດັບຈາກ ປະເພດ ຫຼຽນທອງ ເປັນ ປະເພດ ຫຼຽນເງິນ ໃນຄັ້້ງນີ້, ເຊິ່ງມັນບໍ່ພຽງແຕ່ເປັນບາດກ້າວສຳຄັນຂອງສະຫະພັນບານເຕະຂອງພວກເຮົາ,ແຕ່ມັນສະແດງເຖິງຄວາມມຸ່ງໝັ້ນຂອງພວກເຮົາທີ່ມີພັດທະນາກິລາບານເຕະຂັ້ນພື້ນຖານຢູ່ໃນລາວຢ່າງຕໍ່ເນື່ອງ. ວຽກງານການພັດທະນາບານເຕະຂັ້້ນພື້ນຖານເປັນໜຶ່ງໃນວິໄສທັດຂອງພວກເຮົາ ທີ່ຢາກສ້າງແຮງບັນດານໃຈ ແລະ ປູກຝັງໃຫ້ກັບນັກກິລາຜູ້ທີ່ມີພອນສະຫວັນ, ປູກຝັງຄວາມຮັກມັກຕໍ່ກິລາລານເຕະ ເຊິ່ງຈະນຳໄປສູ່ການເປັນນັກກິລາບານເຕະຮຸ້ນສືບທອດໃນອານະຄົດ. ພວກເຮົາ ຂໍສະແດງຄວາມຂອບໃຈ ມາຍັງສະຫະພັນບານເຕະອາຊີ AFC ສໍາລັບການສະຫນັບສະຫນູນ ແລະ ທິດຊີ້ນໍາ ແລະ ຫວັງຢ່າງຍິ່ງວ່າຈະໄດ້ຮ່ວມກັນສືບຕໍ່ພັດທະນາກິລາບານເຕະໃນລາວຮ່ວມກັບສະຫະພັນບານເຕະອາຊີຕື່ມອີກ"

      ສະຫະພັນບານເຕະແຫ່ງຊາດລາວ(ສຕລ) ສົມທົບ ກັບພະແນກສຶກສາທິການ ແລະ ກິລາແຂວງຫົວພັນ ໄດ້ຈັດພິທີເປີດກິດຈະກຳໂຄງການກິລາບານເຕະໃນໂຮງຮຽນ FIFA FOOTBALL FOR SCHOOLS ຂື້ນເມື່ອຕອນເຊົ້າວັນທີ 27 ມີນາ 2025 ທີ່ສະໜາມກິລາບານເຕະ ເມືອງຊໍາເໜືອ,ໂດຍເປັນກຽດເຂົ້າຮ່ວມຂອງ ທ່ານ ດຣ ໄຊຊະນະ ທອງຄຳຈັນ ຄະນະບໍລິຫານງານ ສຕລ, ທ່ານ ສົມເພັດ ອິນທະສອນ ຮອງຫົວໜ້າພະແນກສຶກສາທິການ ແລະ ກິລາ ແຂວງແລະທ່ານ Soundram Moorthy ຫົວໜ້າພະແນກເຕັກນິກວິທະຍາຂອງ ສຕລ, ທ່ານ ພູຄຳ ກອງສີຫາລາດ ຮອງຫົວໜ້າພະແນກພະລະສຶກສາ ກົມກິລາມວນຊົນພະລະ ແລະ ສີລະປະສຶກສາ ກະຊວງສຶກສາທິການ ແລະ ກິລາ.

    ຈຸດປະສົງເພື່ອຍົກລະດັບຄວາມຮູ້ຄວາມສາມາດແລະວິທີສິດສອນກິລາບານເຕະໃຫ້ກັບຄູພະລະສຶກສາທົ່ວແຂວງຫົວພັນ ໄດ້ນໍາເອົາຫຼັກສູດແບບໃໝ່ຂອງກິລາບານເຕະໄປນໍາໃຊ້ຝຶກແອບຢູ່ບັນດາໂຮງຮຽນໃນທົ່ວແຂວງ, ເພື່ອເປັນການພັດທະນານັກກິລາບານເຕະລຸ້ນສືບທອດກໍ່ຄືລຸ້ນເຍົາວະຊົນທັງປະເພດຍິງ-ຊາຍໃຫ້ກ້າວສູ່ຄຸນນະພາບສຸງຂື້ນ.ໃນນັ້ນ,ລວມມີການແນະນໍາການຝຶກແອບນັກກິລາໃຫ້ຮູ້ປັບປຸງຄວາມສາມາດຂອງການຫຼີ້ນກິລາບານເຕະ,ຮູ້ທັກສະ,ມີໄຫວພິກໃນການຫຼີ້ນບານທີ່ຄ່ອງແຄ້ວ,ມີນໍ້າໃຈນັກກິລາ, ເປັນສູນກາງເຂົ້າເຖິງນັກກິລາ, ເປັນຈຸດສຸມຂອງການພັດທະນານັກກິລາເຍົາວະຊົນ ຍິງ-ຊາຍ ເພື່ອອະນາຄົດ ແລະ ເປັນເວທີສອນນັກກິລາໃຫ້ຫຼີ້ນຫຼາຍກ່ວາເພື່ອເອົາຊະນະ. ການເປີດໂຄງການກິລາບານເຕະໃນໂຮງຮຽນFIFA FOOTBALL FOR SCHOOLS ທີ່ແຂວງຫົວພັນຖືວ່າເປັນແຂວງທີ 4 ຖັດຈາກ ເຊກອງ, ບໍ່ແກ້ວ ແລະ ນະຄອນຫຼວງວຽງຈັນ.

ການຈັດກິດຈະກໍາໃນຄັ້ງນີ້ມີວິທະຍາກອນຈາກ ສຕລ,ຫົວໜ້າຂະແໜງກິລາກາຍະກໍາ, ຄູສອນພະລະສຶກສາ, ຄູສອນຊ່ວຍ, ຜູ້ຮັບຜິດຊອບວຽກງານກິລາໃນໂຮງຮຽນປະຖົມ ແລະ ມັດທະຍົມ ລວມທັງໝົດ 35 ທ່ານ ລວມທັງນ້ອງນັກຮຽນທັງຍິງແລະຊາຍ 100ຄົນເຂົ້າຮ່ວມ. ພາຍໃນງານ ສຕລ ຍັງໄດ້ມອບບານເຕະໃຫ້ບັນດາໂຮງຮຽນທີ່ເຂົ້າຮ່ວມອີກດ້ວຍ.

     ສະຫະພັນບານເຕະແຫ່ງຊາດລາວ(ສຕລ) ສົມທົບ ກັບພະແນກສຶກສາທິການ ແລະ ກິລາແຂວງຫົວພັນ ໄດ້ຈັດພິທີເປີດຝຶກອົບຮົມຄູຝຶກກິລາບານເຕະຂອງໂຄງການກິລາບານເຕະໃນໂຮງຮຽນ FIFA FOOTBALL FOR SCHOOLS ຂື້ນ ໃນວັນທີ 25 ມີນາ 2025 ທີ່ໂຮງຮຽນມັດທະຍົມສົມ ບູນພັນລາ ເມືອງຊໍາເໜືອ,ໂດຍເປັນກຽດເຂົ້າຮ່ວມຂອງທ່ານ ສົມເພັດ ອິນທະສອນ ຮອງຫົວໜ້າພະແນກສຶກສາທິການ ແລະ ກິລາ ແຂວງແລະທ່ານ Soundram Moorthy ຫົວໜ້າພະແນກເຕັກນິກວິທະຍາຂອງ ສຕລ.

    ຈຸດປະສົງໃນການຝຶກອົບຮົມແມ່ນເພື່ອຍົກລະດັບຄວາມຮູ້ຄວາມສາມາດແລະວິທີສິດສອນກິລາບານເຕະໃຫ້ກັບຄູພາລະສຶກສາທົ່ວແຂວງຫົວພັນ ໄດ້ນໍາເອົາຫຼັກສູດແບບໃໝ່ຂອງກິລາບານເຕະໄປນໍາໃຊ້ຝຶກຢູ່ບັນດາໂຮງຮຽນໃນທົ່ວແຂວງ, ເພື່ອເປັນການພັດທະນານັກກິລາບານເຕະລຸ້ນສືບທອດກໍ່ຄືລຸ້ນເຍົາວະຊົນທັງປະເພດຍິງ-ຊາຍໃຫ້ກ້າວສູ່ຄຸນນະພາບສຸງຂື້ນ.ໃນນັ້ນ,ລວມມີການແນະນໍາການຝຶກແອບນັກກິລາໃຫ້ຮູ້ປັບປຸງຄວາມສາມາດຂອງການຫຼີ້ນກິລາບານເຕະາ,ຮູ້ທັກສະ,ມີໄຫວພິກໃນການຫຼີ້ນບານທີ່ຄ່ອງແຄ້ວ,ມີນໍ້າໃຈນັກກິລາ, ເປັນສູນກາງເຂົ້າເຖິງນັກກິລາ, ເປັນຈຸດສຸມຂອງການພັດທະນານັກກິລາເຍົາວະຊົນ ຍິງ-ຊາຍ ເພື່ອອະນາຄົດ ແລະ ເປັນເວທີສອນນັກກິລາໃຫ້ຫຼີ້ນຫຼາຍກ່ວາເພື່ອເອົາຊະນະ.

     ໃນໂອກາດເປີດພິທີ ທ່ານ ສົມເພັດ ອິນທະສອນກ່າວວ່າ: ການຝຶກອົບຮົມຄັ້ງນີ້ ສຸດທີ່ມີຄວາມໝາຍສໍາຄັນເປັນຢ່າງຍິ່ງ ເພາະເປັນການຝຶກໃຫ້ສໍາມະນາກອນໄດ້ນໍາເອົາຄວາມຮູ້ອັນໃໝ່ ເປັນຕົ້ນແມ່ນວຽກງານຂອງການເປັນຄູຝຶກບານເຕະໃຫ້ແກ່ນັກຮຽນສາມັນ,ແຕ່ຍ້ອນເວລາການຝຶກມີໜ້ອຍ,ຈື່ງຮຽກຮ້ອງໃຫ້ສໍາມະນາກອນຈົ່ງເອົາໃຈໃສ່ ຈັດຕັ້ງປະຕິບັດດ້ານເວລາແຕ່ລະວັນ, ແຕ່ລະຕອນໃຫ້ເຂັ້ມງວດ ນັບທັງພາກທິດສະດີ ແລະພາກປະຕິບັດຕົວຈິງຕາມຕາຕະລາງທີ່ວາງໄວ້, ຮັບເອົາຄວາມຮູ້ຈາກຄູຝຶກ ເພື່ອໄປໝູນໃຊ້ໃຫ້ເກີດຜົນປະໂຫຍດ, ສາມາດນໍາເອົາໄປຝຶກນັກກິລາຮຸ່ນສືບທອດເພື່ອພັດທະນາກິລາບານເຕະຂັ້ນທ້ອງຖິ່ນ,ໂຮງຮຽນຕົນເອງໃຫ້ມີທັກສະໃນການຫຼີ້ນທີ່ດີຂື້ນ.ການຝຶກອົບຮົມດັ່ງກ່າວແມ່ນຈະດຳ ເນີນໄປເປັນເວລາ 2 ມື້ນັບຕັ້ງແຕ່ວັນທີ 25–26 ມີນາ 2025 ເຊິ່ງລວມມີພາກທິດສະດີ ແລະພາກປະຕິບັດຕົວຈິງຢູ່ທີ່ສະຫນາມແລະ ຈະໄດ້ເປີດພີທີໂຄງການ FIFA FOOTBALL FOR SCHOOLSຢ່າງເປັນທາງການໃນວັນທີ 27 ມີນາ 2025.

      ເຂົ້າຮວ່ມໃນກອງປະຊຸມນີ້ຍັງມີ ທ່ານ ພູຄຳ ກອງສີຫາລາດ ຮອງຫົວໜ້າພະແນກພະລະສຶກສາ ກົມກິລາມວນຊົນພະລະ ແລະ ສີລະປະສຶກສາ ກະຊວງສຶກສາທິການ ແລະ ກິລາ, ວິທະຍາກອນຈາກ ສຕລ,ຫົວໜ້າຂະແໜງກິລາກາຍະກໍາ, ຄູສອນພະລະສຶກສາ, ຄູສອນຊ່ວຍ, ຜູ້ຮັບຜິດຊອບວຽກງານກິລາໃນໂຮງຮຽນປະຖົມ ແລະ ມັດທະຍົມ ລວມທັງໝົດ 35 ທ່ານ.

#FIFA

#FIFAFOOTBALLFORSCHOOL

#LAOFOOTBALLFEDERATION

#GRASSROOTSLFF

#HUAPHANPROVINCE

         ໃນຕອນເຊົ້າວັນທີ 1 ມີຖຸນາ 2024 ຢູ່ທີ່ ສູນຝຶກບານເຕະຫຼັກ 16 ສະຫະພັນບານເຕະແຫ່ງຊາດລາວ(ສຕລ) ໄດ້ກິດຈະກຳວັນກິລາບານເຕະ ສຕລ (LFF Football Day 2024) ພ້ອມດ້ວຍປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ໂດຍການເຂົ້າຮ່ວມຂອງທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ພ້ອມດ້ວຍຄະນະບໍລິຫານງານ ສະຫະພັນບານເຕະແຫ່ງຊາດລາວ, ມີບັນດາພະນັກງານ ສຕລ ພ້ອມດ້ວຍພໍ່ແມ່ຜູ້ປົກຄອງ ແລະ ນັກກິລາເຍົາວະຊົນເຂົ້າຮ່ວມ.

          ສຳລັບການຈັດກິດຈະກຳວັນກິລາບານເຕະ ສຕລ(LFF Football Day 2024) ກໍເພື່ອຝຶກສອນທັກສະໃຫ້ກັບບັນດາເຍົາວະຊົນໄດ້ຮຽນຮູ້ທັກສະການເຕະບານ ໂດຍມີເຍົາວະຊົນເຂົ້າຮ່ວມທັງຫມົດ 100 ກວ່າຄົນ.

           ສຕລ ມີເປົ້າໝາຍໃນການສົ່ງເສີມໃຫ້ອະນຸຊົນເຍົາວະຊົນ ຫຼີ້ນກີລາບານເຕະ ເພື່ອໃຫ້ເຂົາເຈົ້າຫ່າງໄກຈາກຢາເສບຕິດ ແລະ ສິ່ງອະບາຍຍະມຸກອື່ນໆ. ງານນີ້ໄດ້ຈັດໃຫ້ມີການສະເຫຼີມສະຫຼອງໃນທຸກໆປີ. ການພັດທະນານັກກີລາບານເຕະລຸ້ນເຍົາວະຊົນ ເປັນໜຶ່ງໃນບຸລີມະສິດຂອງ ສຕລ ຈຶ່ງເຮັດໃຫ້ມີການສ້າງຕັ້ງສູນພັດທະນາກີລາບານເຕະ ຈໍາປີ-ຈໍາປາ ຂື້ນມາໄດ້ 3 ປີແລ້ວ. ຫລັງຈາກກໍໄດ້ມີການປູກຕົ້ນໄມ້ ຢູ່ໃນຂອບເຂດບໍລິເວນສູນຝຶກບານເຕະຫຼັກ 16.

ສະຫະພັນບານເຕະແຫ່ງຊາດລາວ(ສຕລ)ຮວ່ມກັບສະຫະພັນບານເຕະແຂວງຜົ້ງສາລີໄດ້ຈັດກິດຈະກໍາການຝຶກສອນຄວາມຮູ້ເບື້ອງຕົ້ນຂັ້ນພື້ນຖານການເຕະບານໃຫ້ກັບເຍົາວະຊົນແຂວງຜົ້ງສາລີ ພາຍໃຕ້ໂຄງການ‘’ The AFC Grassroots Football Day” ຂື້ນໃນວັນທີ 15 ພຶດສະພາ 2024ທີ່່ສະໜາມບານເຕະເມືອງຜົ້ງສາລີ,ເຊິ່ງກິດຈະກຳດັ່ງກ່າວຈັດຂື້ນໃນໂອກາດ ຄົບຮອບ 11 ປີ ທີ່ ສະຫະພັນບານເຕະອາຊີ(AFC) ໄດ້ສະເຫລີມສະຫລອງງານດັ່ງກ່າວພ້ອມກັນກັບທຸກປະເທດທີ່ເປັນສະມາຊິກ.ເຂົ້າຮ່ວມໃນພິີີທີດັ່ງກ່າວມີ ທ່ານ ພັນໂທ ຖາວອນ ຫຼວງຈັນດາວົງ ຄະນະບໍລິຫານງານ ສຕລ, ທ່ານ ສຸລິທອນ ສຸລິໃຈ ຮອງປະທານ ສະຫະພັນບານເຕະແຂວງຜົ້ງສາລີ, ທ່ານ ສີສະເຫວີຍ ໄຊຊະນະສີ ຜູ້ຮັບຜິດຊອບວຽກງານບານເຕະຂັ້ນພື້ນຖານ ສຕລ ພ້ອມດ້ວຍຄະນະຄູຝຶກ, ຄູຝຶກຈາກແຂວງຜົ້ງສາລີ, ຄູອາຈານ ແລະ ເຍົາວະຊົນ 200 ຄົນ ຊາຍ 100 ຄົນ ແລະ ຍິງ 100 ຄົນ ທີ່ມາຈາກ 4 ໂຮງຮຽນພາຍໃນເມືອງຜົ້ງສາລີຄືໂຮງຮຽນ ໂພນແກ້ວ, ໂຮງຮຽນ ຈອມເລືອງ,ໂຮງຮຽນ ຮົ່ມສະຫວ່າງ ແລະ ໂຮງຮຽນ ແສນສາລີ.

 ໃນພິທີ,ທ່ານ ພັນໂທ ຖາວອນ ຫຼວງຈັນດາວົງໄດ້ໃຫ້ທັດສະນະກ່ຽວກັບການຝຶກສອນຄັ້ງນີ້ວ່າ:‘’ ມີຄວາມຮູ້ສຶກເປັນກຽດ ແລະ ພາກພູມໃຈທີ່ໄດ້ຕາງຫນ້າ ສຕລ ມາຮ່ວມຈັດກິດຈະກຳກິລາບານເຕະເຍົາວະຊົນຮ່ວມກັບ ສະຫະພັນບານເຕະແຂວງຜົ້ງສາລີ, ຈຸດປະສົງໃນການຈັດກິດຈະກໍາຄັ້ງນີ້ແມ່ນປະຕິບັດຕາມແຜນຂອງ ສຕລ ປະຈຳປີ 2024 ເພື່ອເປັນການຝຶກສອນດ້ານເຕັກນິກ, ທັກສະຂັ້ນພື້ນຖານ ໃຫ້ແກ່ເຍົາວະຊົນໃຫ້ເປັນນັກກິລາດີເດັ່ນຂອງແຂວງ ແລະ ຂອງຊາດໃນຕໍ່ຫນ້າ, ທັງເປັນການປູກຈິດສຳນຶກໃຫ້ເຍົາວະຊົນມີຄວາມຮັກມັກຫລິ້ນກິລາບານເຕະໃຫ້ເພີ້ມຂຶ້ນໃນອະນາຄົດ, ການຫລິ້ນກິລາກໍເພື່ອໃຫ້ມີສຸຂະພາບແຂງແຮງ ມີຄວາມສາມັກຄີ,ຮູ້ຫ່າງໄກຈາກຢາເສບຕິດອີກດ້ວຍ ‘’.ໃນໄລຍະຜ່ານມາ ສຕລໄດ້ເປີດ ສູນຝຶກຈຳປີ - ຈໍາປາ ມາແລ້ວຄື ຢູ່ນະຄອນຫຼວງວຽງຈັນ2ແຫ່ງ, ແຂວງຫຼວງພະບາງ, ແຂວງຈໍາປາສັກ ແລະ ແຂວງຫຼວງນໍ້າທາບ່ອນລະ1ແຫ່ງ,ແນໃສ່ຝຶກແອບກິລາບານເຕະເຍົາວະຊົນໃຫ້ມີຂະບວນຟົດຟື້ນ ແລະ ຕໍ່ເນື່ອງໃນແຕ່ລະຮຸ່ນອາຍຸ ເພື່ອໃຫ້ນັກກິລາມີພື້ນຖານດ້ານເຕັກນິກ,ມີທັກສະທີ່ດີ ແລະ ຄ່ອງແຄ້ວໃນການຫຼີ້ນບານ.

 ໂອກາດດັ່ງກ່າວ ທ່ານ ທ່ານ ສຸລິທອນ ສຸລິໃຈກໍໄດ້ສະແດງຄວາມຊົມເຊີຍແລະຂອບໃຈມາຍັງ ສຕລ ທີ່ເຫັນໄດ້ເຖິງຄວາມສຳຄັນຂອງກິລາບານເຕະຂອງແຂວງຜົ້ງສາລີແລະໄດ້ຈັດການຝຶກສອນ ຄວາມຮູ້ເບື້ອງຕົ້ນຂັ້ນພື້ນຖານການເຕະບານໃຫ້ກັບເຍົາວະຊົນແຂວງຜົ້ງສາລີໃນຄັ້ງນີ້.

          ສະຫະພັນບານເຕະແຫ່ງຊາດລາວ(ສຕລ)ກຽມຈັດກິດຈະກຳຝຶກສອນຄວາມຮູ້ເບື້ອງຕົ້ນຂັ້ນພື້ນຖານການເຕະບານໃຫ້ກັບເຍົາວະຊົນແຂວງຜົ້ງສາລີ ພາຍໃຕ້ໂຄງການ ‘’ The AFC Grassroots Football Day”ຂື້ນໃນວັນທີ 15 ພຶດສະພາ 2024 ຢູ່ທີ່່ສະໜາມບານເຕະເມືອງຜົ້ງສາລີ ແຂວງຜົ້ງສາລີ,ເຊິ່ງກິດຈະກຳດັ່ງກ່າວຈັດຂື້ນໃນໂອກາດລະນຶກຄົບຮອບ 11 ປີ ທີ່ສະຫະພັນບານເຕະອາຊີ(AFC)ໄດ້ສະເຫລີມສະຫລອງງານດັ່ງກ່າວພ້ອມກັນກັບທຸກປະເທດທີ່ເປັນສະມາຊິກ.

          ສຳລັບຈຸດປະສົງຫຼັກຂອງການຈັດຝຶກສອນຄັ້ງນີ້ແມ່ນເລັ່ງໃສ່ສອນຄວາມຮູ້ເບື້ອງຕົ້ນຂັ້ນພື້ນຖານການເຕະບານໃຫ້ກັບເຍົາວະຊົນທີ່ຢູ່ເຂດຫ່າງໄກສອກຫຼີກ ແນໃສ່ໃຫ້ເຂົາເຈົ້າໄດ້ຮຽນຮູ້ທັງພາກທິດສະດີແລະພາກປະຕິບັດຕົວຈິງໃນການຫຼີ້ນກິລາບານເຕະ,ກໍຄືພັດທະນານັກກິລາບານເຕະໃຫ້ມີຄວາມກ້າວໜ້າ ແລະສົ່ງເສີມຂະຫຍາຍກວ້າງອອກໄປໃນຂອບເຂດທົ່ວປະເທດ,ລວມທັງພັດທະນາກິລາບານເຕະໃຫ້ມີຄວາມສອດຄ່ອງ ແລະ ເອກກະພາບກັນໃນຂອບເຂດທົ່ວປະເທດ,ທັງເປັນການຝືກສອນດ້ານກິລາບານເຕະໃຫ້ມີມາດຕະຖານ ຮັບປະກັນທາງດ້ານປະລິມານ ແລະ ຄຸນນະພາບ.ນອກນັ້ນ,ການຫຼີ້ນກິລາຍັງເປັນການສ້າງໃຫ້ນັກຮຽນໄດ້ມີສຸຂະພາບແຂງແຮງ ແລະ ມັກຮັກໃນກິລາບານເຕະ, ໃຫ້ມີຄວາມຮັກແພງ, ມີນ້ຳໃຈນັກກິລາ,ມ່ວນຊື່ນ ກັບການຫຼີ້ນກີລາ ແລະ ຫ່າງໄກຈາກສີ່ງເສບຕິດ,ອະບາຍຍະມຸກຕ່າງໆ,ກ້າວຂື້ນໃຫ້ເດັກນ້ອຍມີຄວາມມຸ້ງຫວັງແລະມີຄວາມບຸກບືນກາຍເປັນນັກກິລາອາຊີບທີ່ດີເດັ່ນໃນເວທີພາຍໃນກໍ່ຄືນາໆປະເທດຢ່າງມີປະສິດທິພາບໃນອະນາຄົດ.

ນະຄອນຫຼວງວຽງຈັນ ວັນທີ 30 ພະຈິກ 2023 ຢູ່ທີ່ສູນຝຶກຈໍາປີ - ຈໍາປາ ສະຫນາມກິລາແຫ່ງຊາດຫຼັກ 16 ສະຫະພັນບານເຕະແຫ່ງຊາດລາວ ຮ່ວມກັບ ສະຫະພັນບານເຕະນາໆຊາດ ຈັດພິທີເປີດໂຄງການກິລາບານເຕະໃນໂຮງຮຽນ FIFA FOOTBALL FOR SCHOOLS ໂດຍການໃຫ້ກຽດເຂົ້າຮ່ວມໂດຍມີ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ, ທ່ານ ນ. ຟັດມາ ຊາມູຣາ ( Fatma Samba Diouf Samoura ) ເລຂາທິການ ສະຫະພັນບານເຕະນາໆຊາດ ພ້ອມດ້ວຍຄະນະ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະບໍລິຫານງານ ສະຫະພັນບານເຕະແຫ່ງຊາດລາວ, ແຂກຖືກເຊີນ, ສື່ມວນຊົນ, ຄູອາຈານ ແລະ ນັກກິລາເຍົາວະຊົນ 300 ຄົນ ເຂົ້າຮ່ວມ.

 ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ກ່າວເປີດພິທີຢ່າງເປັນທາງການ ສຳລັບຈຸດປະສົງຂອງໂຄງການນີ້ ແມ່ນຈະສຸ່ມໃສ່ການພັດທະນາກິລາບານເຕະໃນໂຮງຮຽນຫຼັກ ຊຶ່ງໄດ້ເນັ້ນໃຫ້ບັນດາຄູພາລະ ໄດ້ຮັບການຝຶກແອບບຢ່າງຖືກວິທີ ແລະ ສົ່ງເສີມນ້ອງນັກຮຽນ ທີ່ມີຄວາມຮັກໃນກິລາບານເຕະ ທີ່ມີຄວາມຮັກມັກໃນກິລາບານເຕະ ສາມາດເຂົ້າເຖິງການຫລິ້ນບານເຕະໃນໂຮງຮຽນໃຫ້ຫລາຍຂຶ້ນ ແລະ ຮຽນຮູ້ທັກສະນະໃນການດຳລົງຊີວິດ. ໃນສອງມື້ທີ່ຜ່ານ,ໄດ້ມີການຈັດຝຶກອົບຮົມພາກທິດສະດີ ແລະ ຝຶກແອບພາກປະຕິບັດຕົວຈິງໃຫ້ແກ່ບັນດາຄູຝຶກພາລະ ຈຳນວນ 80 ທ່ານ ມາຈາກ 80 ໂຮງຮຽນ ພາຍໃນນະຄອນຫຼວງວຽງຈັນ ເຊິ່ງບັນດາຄູຝຶກເຫລົ່ານີ້ຈະເປັນຜູ້ນຳເອົາຄວາມຮູ້ທີ່ໄດ້ຝຶກອົບຮົມໃນຄັ້ງນິ້ ໄປຂະຫຍາຍສິດຕໍ່ບັນດາຄູພາລະຜູ້ອື່ນໆຕື່ມອີກ ແລະ ຈະໄດ້ມີໂຄງການນິ້ຍັງສຶບຕໍ່ຈັດຕັ້ງປະຕິບັດໃຫ້ແກ່ບັນດາໂຮງຮຽນຢູ່ຕ່າງແຂວງໃນຕໍ່ຫນ້າ.

  ຂະນະທີ່ ທ່ານ ນ. ຟັດມາ ຊາມູຣາ ( Fatma Samba Diouf Samoura ) ເລຂາທິການ ສະຫະພັນບານເຕະນາໆຊາດ ໄດ້ເວົ້າເຖິງ ໂຄງການບານເຕະໃນໂຮງຮຽນ FIFA FOOTBALL FOR SCHOOLS ແມ່ນໄດ້ເລີ້ມຕົ້ນໂຄງການໃນປີ 2019 ໂດຍໃນປັດຈຸບັນ ມີຫຼາຍກວ່າ 100 ປະເທດສະມາຊິກ ທີ່ເຂົ້າຮ່ວມໂຄງການດັ່ງກ່າວ ຂ້າພະເຈົ້າຫວັງວ່າ ຈະໄດ້ນັກກິລາເຍົາວະຊົນ, ຄູອາຈານ ເປັນຕົວແທນຂອງປະທດ ( FIFA F4S AMBASSADORS ) ແລະ ຈະໄດ້ຮຽນຮູ້ທັກສະການຫລິ້ນກິລາບານເຕະ ເພື່ອກ້າວເປັນນັກກິລາອາຊີບໃນຕໍ່ຫນ້າ.

  ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ກ່າວວ່າ: ຂໍສະແດງຄວາມຂອບໃຈມາຍັງ ສະຫະພັນບານເຕະນາໆຊາດ ຫຼື ຟີຟາ ທີ່ໄດ້ໃຫ້ການສະຫນັບສະຫນູນຊ່ວຍເຫລືອໂຄງການບານເຕະໃນໂຮງຮຽນ FIFA FOOTBALL FOR SCHOOLS ຊຶ່ງໄດ້ສ້າງເງື່ອນໄຂໃຫ້ກັບບັນດາເຍົາວະຊົນໃຫ້ເຂົ້າເຖິງການຫລິ້ນກິລາບານເຕະພາຍໃນໂຮງຮຽນ ທັງນີ້ກໍເສີມສ້າງຄວາມເຂັ້ມແຂງທາງສະມາທິ, ທາງດ້ານກຳລັງເຫື່ອແຮງ ເພາະວ່າການຫລິ້ນກິລາຊ່ວຍໃຫ້ສຸຂະພາບແຂງແຮງ ເຊິ່ງເປັນປັດໃຈຕົ້ນຕໍອັນຫນຶ່ງທີ່ຊ່ວຍໃຫ້ມີຊິວິດທີ່ສົດໃສ ກໍຄືເປັນກຳລັງແຮງໃຫ້ເຮົາໄດ້ເຂົ້າໂຮງຮຽນ, ສຳລັບຈຸດປະສົງທີ 2 ໄດ້ໃຫ້ຄູອາຈານ ຄູພາລະສຶກສາ ໄດ້ຮຽນຮູ້ກ່ຽວກັບພາກທິດສະດີ ແລະ ພາກປະຕິບັດຕົວຈິງໃນການສິດສອນກິລາບານເຕະໃຫ້ຖືກວິທີ ເຊິ່ງໂຄງການ FIFA FOOTBALL FOR SCHOOLS ເຊິ່ງໄດ້ສອດຄ່ອງກັບນະໂຍບາຍການພັດທະນາກິລາ ໂດຍສະເພາະແມ່ນກິລາບານເຕະຢູ່ໃນ ສປປລາວ ແລະ ຂ້າພະເຈົ້າຫວັງວ່າທັງຄູຝຶກ ແລະ ນັກກິລາ ຈະເອົາໃຈໃສ່ຮ່ວມໃນກິດຈະກຳດັ່ງກ່າວນີ້ ເພື່ອສ້າງເງື່ອນໄຂໃຫ້ກາຍເປັນນັກກິລາດີເດັ່ນທີ່ພອນສະຫວັນ ເພື່ອສະຫນອງໃຫ້ກັບ ທີມຊາດລາວ ໃນທຸກຮຸ່ນອາຍຸ ໃນອະນາຄົດນີ້.

  ໂຄງການກິລາບານເຕະໃນໂຮງຮຽນ FIFA FOOTBALL FOR SCHOOLS ຈັດຂຶ້ນໃນຫລາຍປະເທດ ເຊິ່ງໄດ້ເນັ້ນຢໍ້າຕື່ມວ່າ ໂຄງການດັ່ງກ່າວ ບໍ່ພຽງແຕ່ຝຶກແອບບານເຕະໃຫ້ນັກຮຽນເທົ່ານັ້ນ ແຕ່ຍັງຈະສອນໃຫ້ເຂົາເຈົ້າໄດ້ຮັບຮູ້ເຖິງທັກສະການໃຊ້ຊີວິດອີກດ້ວຍ. ທ່ານຫວັງຢ່າງຍິ່ງວ່າ ຜູ້ເຂົ້າຮ່ວມຈະນຳເອົາຄວາມຮູ້ໃນການເຂົ້າຮ່ວມໃນຄັ້ງນີ້ ເພື່ອໄປພັດທະນາ ໂຮງຮຽນຂອງຕົນເອງ ໄປສິດສອນບານເຕະໃຫ້ ກັບບັນດາເຍົາວະຊົນ. ສຳລັບໂຄງການດັ່ງກ່າວຖືວ່າເປັນໂຄງການໄລຍະຍາວ ແລະ ການເປັນຮ່ວມມືລະຫວ່າງ ສະຫະພັນບານເຕະນາໆຊາດ ຫຼື ຟີຟາ ຮ່ວມມືກັບ ສະຫະພັນບານເຕະແຫ່ງຊາດລາວ ແລະ ກົມກິລາມວນຊົນ, ພະລະ ແລະ ສິລະປະ ເພື່ອພັດທະນາບານເຕະລະດັບເຍົາວະຊົນ.

ໃນຕອນເຊົ້າວັນທີ 7 ຕຸລາ 2023 ສະຫະພັນບານເຕະແຫ່ງຊາດລາວ (ສຕລ) ໄດ້ຈັດງານວັນກິລາບານເຕະຂື້ນພ້ອມກັນທົ່ວປະເທດ. ເພື່ອເປັນການສະເຫຼີມສະຫຼອງວັນຄູແຫ່ງຊາດແລະສົ່ງເສີມການຫຼີ້ນກິລາຜ່ານກິລາບານເຕະໃຫ້ແກ່ລູກຫຼານອະນຸຊົນລາວແລະ ເປັນການເຕົ້າໂຮມບັນດາທ່ານທີ່ມີນໍ້າໃຈມັກຮັກໃນກິລາບານເຕະມາຮ່ວມກັນ ເພື່ອສ້າງກິດຈະກໍາດີໆໃນການພັດທະນາກິລາບານເຕະທົ່ວປະເທດ, ຊຶ່ງກິດຈະກຳຄັ້ງນີ້ ແມ່ນເປັນການຈັດຂື້ນຮ່ວມກັນລະຫວ່າງ ສຕລແລະ ສະຫະພັນບານເຕະແຂວງທັງ18ແຂວງ, ໃນງານດັ່ງກ່າວ ຍັງໄດ້ຮັບການປະກອບສ່ວນອຸປະຖໍາເສື້ອຈໍານວນ 2500 ໂຕ ລວມມູນຄ່າ 83ລ້ານກວ່າກີບ ຈາກທະນາຄານ ມາຣູຮານ ເຈແປນ ລາວ.

 ພ້ອມນັ້ນ, ເປົ້າໝາຍຫຼັກຂອງການຈັດງານແມ່ນເພື່ອສ້າງຄວາມສາມັກຄີ, ຄວາມມ່ວນຊື່ນແລະ ການຮຽນຮູ້ກັບການແຂ່ງຂັນແກ່ນນັກກິລາເອງຕະຫຼອດຮອດຄອບຄົວແລະ ແຟນບານ.