![News Cover](https://laoff.org.la/storage/news/News_Image_1710480265703.webp)
ເຊີນເຂົ້າຮ່ວມແຂ່ງຂັນປະມູນ ໂຄງການສ້ອມແປງສະໜາມກິລາແຫ່ງຊາດ ຫຼັກ 16 (ສະໜາມໃຫຍ່)
ສະຫະພັນບານເຕະແຫ່ງຊາດລາວ ມີແຜນການໃນການປັບປຸງ ແລະ ຍົກລະດັບພື້ນຖານໂຄງລ່າງກິລາບານເຕະ ເພື່ອຮອງຮັບໃນການປະຕິບັດວຽກງານຕົວຈິງໃຫ້ມີປະສິດທິພາບ ໂດຍມີຈຸດປະສົງໃນການປະຕິບັດ ການຈັດຊື້-ຈັດຈ້າງ ທີ່ເຫມາະສົມພາຍໃຕ້ສັນຍາ ຕາມເອກະສານປະມູນທີ່ໄດ້ກໍານົດອອກມານີ້.
ສະຫະພັນບານເຕະແຫ່ງຊາດລາວ (ເຈົ້າຂອງໂຄງການ) ຂໍຖືເປັນກຽດເຊີນບໍລິສັດ ທີ່ມີຄວາມສົນໃຈ ແລະ ມີເງື່ອນໄຂ ທີ່ເໝາະສົມ ເຂົ້າຮ່ວມຍື່ນ ເອກະສານຂໍ້ມູນບໍລິສັດ (Company Profile) ເຊິ່ງຕ້ອງມີຄັດຕິດປະຫວັດໂຄງກາ່ນທີ່ໄດ້ເຮັດຜ່ານມາ (List of Clients) ແລະ ໃບຈົດທະບຽນທຸລະກິດ (Certificate of Business Registration), ແລະ ໜັງສືສະແດງເຈດຈໍານົງເຂົ້າຮ່ວມການປະມູນ ສໍາລັບລາຍການໃນໂຄງການດັ່ງຕໍ່ໄປນີ້:
“ໂຄງການສ້ອມແປງສະໜາມກິລາແຫ່ງຊາດ ຫຼັກ 16 (ສະໜາມໃຫຍ່)”
1. ບໍລິສັດທີ່ຕ້ອງການເຂົ້າຮ່ວມການປະມູນ ຈະເຂົ້າຮ່ວມປະມູນໄດ້ ຕາມເງື່ອນໄຂທີ່ໄດ້ລະບຸໄວ້ໃນເອກະສານປະມູນ.
2. ການປະມູນ ແມ່ນເປີດກວ້າງສໍາລັບບໍລິສັດເຂົ້າແຂ່ງຂັນປະມູນທັງຫມົດ ທີ່ມີຄຸນນະວຸດທິເຫມາະສົມ ແລະ ເງື່ອນໄຂ ພຽງພໍຕາມມາດຖານຂ້າງລຸ່ມນີ້:
- ລາຍການ - ເງື່ອນໄຂຕ່າງໆ ຂໍ້ຮຽກຮ້ອງ
- ລາຍການຮ່ວມທຸລະກິດ ບໍລິສັດເຂົ້າຮ່ວມຫຸ່ນສ່ວນກັນ ສາມາດເຂົ້າປະມູນໄດ້ ຖ້າວ່າຖືກຕ້ອງ ຕາມຂໍ້ຮຽກຮ້ອງທີ່ລະບຸໄວ້ໃນເອກະສານປະມູນ.
- ໃບອະນຸຍາດດໍາເນີນທຸລະກິດ ບໍລິສັດເຂົ້າຮ່ວມປະມູນຕ້ອງເປັນບໍລິສັດກໍ່ສ້າງທີ່ມີໃບອະນຸຍາດດໍາເນີນ ທຸລະກິດ ແລະ ໃບທະບຽນອາກອນທີ່ໃຊ້ໄດ້ ລ່າສຸດຕາມລະບຽບ ກົດຫມາຍ ສປປ ລາວ (ປີ 2022)
- ບໍລິສັດທີສ້າງຕັ້ງ - ກໍາເນີດ ບໍລິສັດທີ່ເຂົ້າຮ່ວມປະມູນຈະຕ້ອງເປັນບໍລິສັດທີ່ສ້າງຕັ້ງຂື້ນໃນ ສປປ ລາວ. ຄໍາສັບທີ່ວ່າ “ບໍລິສັດທີ່ສ້າງຕັ້ງ-ກໍາເນີດ” ໃນທີ່ນີ້ຫມາຍຄວາມວ່າ ເປັນບໍລິສັດລາວ ຫຼື ນິຕິບຸກຄົນທີ່ກໍ່ຕັ້ງບໍລິສັດຖືກຕ້ອງຕາມກົດຫມາຍ ແລະ ຂື້ນທະບຽນໃນ ສປປ ລາວ, ທີ່ມີບ່ອນຜະລິດສິນຄ້າ ຫຼື ສະຫນອງ ສິນຄ້າ ແລະ/ຫຼື ການບໍລິການໃນ ສປປ ລາວ ແລະ ໃນຕົວຈິງແລ້ວ ຕ້ອງດໍາເນີນທຸລະກິດພາຍໃນປະເທດນີ້.
ຜົນປະໂຫຍດຊ້ອນທັບ ຜູ້ເຂົ້າຮ່ວມແຂ່ງຂັນປະມູນ ຕ້ອງບໍ່ມີຜົນປະໂຫຍດຊ້ອນທັບ.
- ຜູ້ທີ່ບໍ່ມີຄວາມເຫມາະສົມໂດຍ ສະຫະພັນ ບານເຕະລາວ (LFF) ຕັດສິນ ຜູ້ທີ່ຈະເຂົ້າຮ່ວມແຂ່ງຂັນປະມູນ ຕ້ອງບໍ່ແມ່ນຜູ້ທີ່ໄດ້ຖືກປະກາດວ່າ ເປັນຜູ້ທີ່ບໍ່ມີຄວາມເຫມາະສົມໂດຍ ສະຫະພັນບານເຕະແຫ່ງຊາດລາວ.
- ປະຫວັດການບໍ່ປະຕິບັດສັນຍາ ຕ້ອງເປັນບໍລິສັດທີ່ບໍ່ມີປະຫວັດການບໍ່ປະຕິບັດຕາມສັນຍາທີ່ເປັນຜົນມາຈາກການລະເລີຍຂອງຜູ້ຮັບເຫມົາສັນຍາເອງ ພາຍໃນ (2) ປີຫຼັງ.
- ການຮ້ອງຟ້ອງທີ່ຍັງຄ້າງຄາ ຄະດີທີ່ຍັງຄ້າງຄາ ຄວນມີມູນຄ່າບໍ່ເກີນ ຫ້າສິບສ່ວນຮ້ອຍ (50%) ຂອງມູນຄ່າຊັບສິນສຸດທິ ແລະ ບັນຫາດັ່ງກ່າວຈະເປັນທີ່ຕົກລົງກັນໄດ້ ຕໍ່ກັບບໍລິສັດທີ່ຈະເຂົ້າຮ່ວມປະມູນ.
- ປະຫວັດການຮ້ອງຟ້ອງ ຕ້ອງບໍ່ມີປະຫວັດການຮ້ອງຟ້ອງ/ຄະດີຄວາມໃນສານ ໃນໄລຍະຜ່ານມາ ຕໍ່ກັບບໍລິສັດທີ່ຈະເຂົ້າຮ່ວມແຂ່ງຂັນການປະມູນ ພາຍໃນ (5) ປີຫຼັງ.
- ຄວາມສາມາດທາງດ້ານການເງີນ ເປັນຂໍ້ຮຽກຮ້ອງຕໍ່າສຸດ, ໂດຍມູນຄ່າຊັບສິນສຸດທິຂອງບໍລິສັດຜູ້ຈະເຂົ້າ ແຂ່ງຂັນປະມູນ ທີ່ຄິດໄລ່ຜົນລົບລະຫວ່າງ ຊັບສິນລວມ ແລະ ຫນີ້ລວມ ຕ້ອງອອກມາເປັນບວກ.
- ລາຍຮັບສະເລ່ຍປະຈໍາປີທີ່ໄດ້ຮັບຈາກການກໍ່ສ້າງ ຮັບເຫມົາຕ່າງໆ ມູນຄ່າຕໍ່າສຸດຂອງລາຍຮັບປະຈໍາປີສະເລ່ຍຈາກວຽກງານກໍ່ສ້າງ ຮັບເຫມົາ ຕ່າງໆ ສະເລ່ຍບໍ່ຫຼຸດ 500,000 ໂດລາ, ໂດຍຄິດໄລ່ຈາກໃບຢັ້ງຍືນການ ສໍາລະເງີນທີ່ບໍລິສັດໄດ້ຮັບຈາກວຽກສັນຍາ ທີ່ສໍາເລັດໄປແລ້ວ ຫຼື/ແລະ ຍັງດໍາເດີນຢູ່ ພາຍໃນ ສາມ (3) ປີຫຼັງແຕ່ປີ 2021 – 2023 ໂດຍການສະເລ່ຍ ແມ່ນທັງຫມົດມາຫານໃຫ້ສາມ (3) ປີ.
- ແຫຼ່ງສະໜອງທາງດ້ານການເງີນ ບໍລິສັດທີ່ຈະເຂົ້າຮ່ວມປະມູນ ຕ້ອງສະແດງເອກະສານໃຫ້ເຫັນວ່າຕົນ ສາມາດເຂົ້າເຖິງ ຫຼື ມີທຶນພຽງພໍເຊັ່ນ: ທຶນຫມູນວຽນ, ທຶນຄົງທີ່, ການ ຢັ້ງຍືນສະຫນອງສິນເຊື່ອຈາກທະນາຄານ ແລະ ຮູບການຢັ້ງຍືນການ ເງີນອື່ນໆ (ໂດຍບໍ່ໄດ້ລວມມູນຄ່າການຈ່າຍກ່ອນລ່ວງຫນ້າຂອງສັນຍາທີ່ກໍາລັງຈັດຕັ້ງປະຕິບັດຢູ່) ເຊິ່ງທຶນດັ່ງກ່າວຕ້ອງສາມາດໃຊ້ໄດ້ພຽງພໍກັບ ການກໍ່ສ້າງ ແລະ ປະຕິບັດວຽກງານໃຫ້ສໍາເລັດຄິດໄລ່ສະເລ່ຍບໍ່ຫຼຸດ 200,000 ໂດລາ ຕໍ່ສັນຍາ ລວມທັ່ງຂໍ້ຜູກມັດອື່ນໆນໍາ.
- ປະສົບການກໍ່ສ້າງວຽກທົ່ວໄປ ພາຍໃນ (5) ປີຫຼັງ ຕ້ອງມີປະສົບການຢ່າງຫນ້ອຍໃນວຽກງານການກໍ່ສ້າງ ສາມ (3) ສັນຍາທີ່ເປັນຜູ້ຮັບເຫມົາຫລັກ (ເປັນຜູ້ຮັບເຫມົາດ່ຽວ ຫຼື ຮ່ວມທຸລະກິດ) ຫຼື ເປັນຜູ້ຮັບເຫມົາຕໍ່ ຫຼື ເປັນຜູ້ບໍລິຫານວຽກງານສັນຍານັ້ນກໍໄດ້ ນັບຈາກປີ 2019 ຫາ 2023
ປະສົບການວຽກງານກໍ່ສ້າງສະເພາະ ພາຍໃນຫ້າ (5) ປີຫຼັງ ຕ້ອງມີປະສົບການຢ່າງຫນ້ອຍ ຫນຶ່ງ (1) ສັນຍາ ທີ່ ຄືກັນກັບວຽກງານແຕ່ລະວຽກງານຂ້າງລຸ່ມນີ້ ທີ່ໄດ້ເຮັດສໍາເລັດຮຽບຮ້ອຍແລ້ວ ໂດຍເປັນຜູ້ຮັບເຫມົາຫຼັກ (ເປັນຜູ້ຮັບເຫມົາດຽວ ຫຼື ຮ່ວມ ທຸລະກິດ) ນັບຈາກປີ 2019 ຫາ 2023 ຄື:
- ສັນຍາວຽກງານປຸກສ້າງຕຶກອາຄານການກິລາ ໂດຍມີເນື້ອທີ່ 300 ຕມ ສໍາລັບຮັບໃຊ້ສາທາລະນະ ຫຼື ທຸລະກິດ
- ສັນຍາວຽກງານປຸກສ້າງຕຶກອາຄານການກິລາ
3. ເອກະສານຂໍ້ມູນບໍລິສັດ (Company Profile) ຄົບຊຸດທັງຫມົດແມ່ນເປັນພາສາລາວ ຫຼື ອັງກິດ ເຊິ່ງບໍລິສັດທີ່ສົນໃຈເຂົ້າແຂ່ງຂັນປະມູນ ສາມາດຍື່ນໄດ້ຕາມທີ່ຢູ່ທີ່ລະບຸໄວ້ດ້ານລຸ່ມ.
ການຍືນເອກະສານ ວັນທີ 15 ມີນາ ເຖິງ 20 ມີນາ 2024 (ວັນລັດຖະການເທົ່ານັ້ນ)
ເວລາ: 08:30 – 12:00 ແລະ 13:30 – 17:00
ສົ່ງເຖິງ ຜູ້ບໍລິຫານໂຄງການ ທ່ານ ຈັນທະວົງ ສີລິມະໂນທໍາ, ຮັກສາການເລຂາທິການ ສະຫະພັນບານເຕະແຫ່ງຊາດລາວ.
ສະຖານທີ່ ຫ້ອງການຄະນະຫນ່ວຍງານຄຸ້ມຄອງໂຄງການ ທີ່ສະຫະພັນບານເຕະແຫ່ງຊາດລາວ
ບ້ານຫ້ວຍຫົງ, ເມືອງຈັນທະບູລີ, ນະຄອນຫຼວງວຽງຈັນ
ເບີໂທ ໂທ: 021 560 821
ອີເມວ [email protected]
ໝາຍເຫດ: ສະຫະພັນບານເຕະແຫ່ງຊາດລາວ ຈະຕິດຕໍ່ຫາບັນດາບໍລິສັດທີ່ຖືກຄັດເລືອກ ເຂົ້າສູ່ຮອບຍື່ນຊອງປະມູນພາຍໃນວັນທີ 20 ມີນາ 2024 ພ້ອມທັງເຊີນບັນດາບໍລິສັດ ເຂົ້າສໍາຫຼວດສະຖານທີ່ໂຄງການດັ່ງກ່າວ (Site Visit) ໃນວັນທີ 25 ມີນາ 2024.
![News Cover](https://laoff.org.la/storage/news/News_Image_1710228835871.webp)
ສຕລ ຝຶກອົບຮົມກຳມະການຕັດສິນຮຸ່ນສືບທອດ ( LFF Referee Academy) ຄັ້ງທໍາອິດ
ສະຫະພັນບານເຕະແຫ່ງຊາດລາວ(ສຕລ)ໄດ້ຈັດພິທີເປີດຝຶກອົບຮົມກໍາມະການຕັດສິນ ຮຸ່ນສືບທອດ( LFF Referee Academy )ເປັນຄັ້ງທຳອິດຂື້ນໃນຕອນເຊົ້າ ຂອງວັນທີ 12 ມີນາ 2024 ຢູ່ທີ່ຫ້ອງປະຊຸມຂອງສຕລ,ໃຫ້ກຽດເຂົ້າຮ່ວມຂອງທ່ານ ຄຳແພງ ວົງຂັນຕີ ຮອງປະທານ ສຕລ, ຫົວໜ້າອະນຸກໍາມະການຕັດສິນ ສຕລ, ທ່ານ ໂມຮາແມັດ ໂຣຊາຣີ ບິນຢາຄອບ (MOHAMAD RODZALI BIN YACOB) ຫົວໜ້າອະນຸກຳມະການພັດທະນາກໍາມະການຕັດສິນສະຫະພັນບານເຕະນາໆຊາດ(FIFA).
ໃນພິທີ ທ່ານ ໄຊປະເສີດ ພົງສະນິດ ຫົວໜ້າພະແນກກໍາມະການຕັດສິນ ສຕລ ໄດ້ລາຍງານການຝຶກອົບຮົມວ່າ: ອີງໃສ່ແຜນຍຸດທະສາດພັດທະນາກໍາມະການຕັດສິນ ໂຄງການ LFF Referee Academy ແມ່ນເພື່ອພັດທະນາ ແລະຍົກລະດັບກໍາມະການຕັດສິນຂອງ ສຕລ ໃຫ້ກ້າວໄປສູ່ລະດັບສາກົນ, ເພື່ອພັດທະນາກໍາມະການຕັດສິນຮຸ່ນສືບທອດໃຫ້ໄດ້ປະສິດທິພາບ ແລະປະສິດທິຜົນຢ່າງເປັນລະບົບຕໍ່ເນື່ອງກ້າວໄປສູ່ລະດັບມາດຖານຂອງ AFC ແລະ FIFA.ຊຶ່ງໂຄງການຈະໃຊ້ເວລາ 4ປີຄື: ປີ 2024-2027, ທຸກໆປີຈະໄດ້ມີການສອບເສັງຄັດເລືອກຜູ້ທີ່ມີເງື່ອນໄຂຄົບຖ້ວນ ເພື່ອສົ່ງເຂົ້າໂຄງການ AFC Acedemy.ຄາດໝາຍຂອງໂຄງການ LFF Referee Academy ແມ່ນເພື່ອພັດທະນາບຸກຄະລາກອນຜູ້ທີ່ມີພອນສະຫວັນ ແລະໃຈມັກທີ່ຈະເປັນກໍາມະການຕັດສິນ, ສ້າງກໍາມະການຕັດສິນທີ່ມີຄຸນນະພາບຮັບໃຊ້ການແຂ່ງຂັນລາຍການຕ່າງໆ ໂດຍສະເພາະການແຂ່ງຂັນລາວລີກ 1, ຄາດໝາຍວ່າຈະມີກໍາມະການຈາກ ສປປ ລາວ ມີລາຍຊື່ເປັນກໍາມະການຕັດສິນ AFC Elite 1 ທ່ານ.
ໃນໂອກາດກ່າວເປີດພິທີ, ທ່ານ ຄໍາແພງ ວົງຂັນຕີໄດ້ກ່າວເນັ້ນຕໍ່ກັບການຝຶກອົບຮົມຄັ້ງນີ້ແມ່ນຢາກໃຫ້ມີກໍາມະການຕັດສິນຮຸ່ນສືບທອດ,ພ້ອມໄດ້ຮຽກຮ້ອງໃຫ້ສໍາມະນາກອນທຸກຄົນຈົ່ງຕັ້ງໃຈຮຽນຮູ້ພັດທະນາຕົນເອງໃຫ້ປະສົບຜົນສໍາເລັດ, ຊຶ່ງເປັນໂອກາດທີ່ດີໃນການພັດທະນາກ້າວໄປສູ່ລະດັບສາກົນ.
ການຝຶກອົບຮົມຄັ້ງນີ້ຈະນໍາໃຊ້ເວລາ 5 ວັນ ເລີ່ມວັນທີ 12-16 ມີນາ 2024 ຊຶ່ງຜູ້ເຂົ້າຮ່ວມຈະໄດ້ຮຽນຮູ້ພາກທິດສະດີ ແລະ ພາກປະຕິບັດຕົວຈິງ, ນອກນັ້ນຈະໄດ້ມີການທົດສອບພາລະກໍາລັງ ພ້ອມດ້ວຍທົດສອບກະຕິກາບານເຕະ.ເຂົ້າຮວ່ມກອງປະຊຸມນີ້,ຍັງມີທ່ານ Subkhiddin BIN MOHD SALLEH ຄູຝຶກ FIFA (FIFA Instructror), ທ່ານ Ganesan S/O Maniam ຄູຝຶກພາລະກໍາລັງ FIFA (FIFA Fitness Instructrur ) ແລະ ທ່ານ ສົມສະນຸກ ລຽນສະຫວັນ ຮອງເລຂາທິການ ສຕລ ພ້ອມດວ້ຍວິຊາການກໍາມະການຕັດສິນ ສຕລ ແລະນັກສຳມະນາກອນທັງຫມົດ 25 ທ່ານ ເປັນຍິງ 4 ທ່ານ.
![News Cover](https://laoff.org.la/storage/news/News_Image_1710142940345.webp)
ສຕລ ຝຶກອົບຮົມຄູຝຶກກິລາບານເຕະລະດັບ C ຢູ່ຫຼວງນ້ຳທາ
ສະຫະພັນບານເຕະແຫ່ງຊາດລາວ( ສຕລ) ໄດ້ຈັດພິທີເປີດການຝຶກອົບຮົມຄູຝຶກກິລາບານເຕະລະດັບຊີ(C) ຂື້ນໃນຕອນເຊົ້າວັນທີ 11 ມີນາ 2024 ທີ່ຫ້ອງປະຊຸມ ສະຫນາມກິລາແຂວງຫຼວງນ້ຳທາ,ໂດຍໃຫ້ກຽດເຂົ້າຮວ່ມຂອງ ທ່ານ ວັນດີ ພົມທອງ ຮອງປະທານ ສະຫະພັນແຂວງ ຫລວງນໍ້າທາ.
ໃນພິທີ,ທ່ານ ວັນດີ ພົມທອງ ໄດ້ກ່າວເປີດພິທີໂດຍໄດ້ຍົກໃຫ້ເຫັນຄວາມໝາຍສຳຄັນຂອງການຝຶກອົບຮົມຄັ້ງນີ້,ລວມທັງບົດບາດຄວາມສໍາຄັນຂອງຄູຝຶກ, ພ້ອມຮຽກຮ້ອງໃຫ້ຜູ້ເຂົ້າຮວ່ມການຝຶກອົບຮົມທຸກທ່ານຈົ່ງຕັ້ງໃຈຮຽນຮູ້ແລກປ່ຽນບົດຮຽນ,ປະສົບການ ເພື່ອນໍາເອົາບົດຮຽນໃນການຝຶກອົບຮົມຄັ້ງນີ້ ໄປນໍາໃຊ້ໃຫ້ເກີດປະໂຫຍດຫຼາຍເທົ່າທີ່ຈະຫຼາຍໄດ້ເພື່ອພັດທະນາວົງການບານເຕະລາວເວົ້າລວມ,ກໍຄືບານເຕະຂອງແຂວງຫຼວງນໍ້າທາໃຫ້ກ້າວສູ່ລະດັບດີຂື້ນໄປເລື້ອຍໆ.
ໄລຍະການຝຶກອົບຮົມ ແມ່ນແບ່ງອອກເປັນ 2 ພາກ ປະກອບມີ ພາກທິດສະດີ ແລະ ການປະຕິບັດຕົວຈິງພາກສະໜາມ, ໂດຍຈະມີການສອບເສັງ 6 ຄັ້ງ ( ຕົວຈິງ 3 ຄັ້ງ ແລະ ທິດສະດີ 2 ຄັ້ງ ແລະ ເສັງກໍາມະການ 1 ຄັ້ງ ), ຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບ ການພັດທະນາຄູຝຶກ, ຄວາມຕ້ອງການຄູຝຶກຂອງ AFC, ພາລະບົດບາດ ແລະ ໜ້າທີຮັບຜິດຊອບ, ເຕັກນິກ ແລະ ຍຸດທະວິທີຂອງການເຕະບານ, ຄວາມສຳພັນກັບບານ, ການສົ່ງບານ, ການຈັບບານ, ການຍິງບານ, ຫຼັກການຂອງການຝຶກສອນ, ບານເຕະຟຸດຊໍ, ກະຕິກາຂອງກິລາບານເຕະ, ອາຫານ ແລະ ສຸຂະພາບ, ການຝຶກແອບ, ການຝຶກແອບຜູ້ຮັກສາປະຕູ, ການວາງແຜນ, ບົດບາດສຳຄັນຂອງຜູ້ຮັກສາປະຕູ, ການຈະເລີນເຕີບໃຫຍ່ ແລະ ການປະຖົມພະຍາບານ, ແນະນຳພາກປະຕິບັດກິດຈະກຳບານເຕະພື້ນຖານ, ການຫຼີ້ນບານໃນເກມ. ສຳລັບການຝຶກອົບຮົມແມ່ນຈະດຳເນີນໄປແຕ່ວັນທີ 11ມີນາ ຈົນຮອດ ວັນທີ 22 ມີນາ 2024.
ເຂົ້າຮວ່ມພິທີນີ້ ຍັງມີທ່ານ ຊຸນດຣໍາ ມູນຕີ (Sundram Moorthy) ຫົວໜ້າພະແນກເຕັກນິກ - ວິທະຍາ ສຕລ, ທ່ານ ທະນົງສັກ ລາດສີທອງ ຫົວຫນ້າຂະແຫນງກິລາ-ກາຍະກຳ ແລະ ສີລະປະ ແຂວງຫຼວງນ້ຳທາ, ທ່ານ ວົງມີໄຊ ສຸບົວຄຳ ຜູ້ຝຶກສອນຫຼັກຈາກ ສຕລ ແລະ ທ່ານ ຈັນທະຄາດ ສ່ຽນຜ່ອງໃສ ຜູ້ຊ່ວຍຜູ້ຝຶກສອນ, ພ້ອມດ້ວຍພະນັກງານວິຊາການກ່ຽວຂ້ອງ ແລະ ນັກສຳມະກອນຈໍານວນ 24 ທ່ານ ມາຈາກແຂວງຫຼວງນ້ຳທາ 13 ທ່ານ, ແຂວງອຸດົມໄຊ 3 ທ່ານ, ແຂວງບໍ່ແກ້ວ 2 ທ່ານ ແລະ ປະເທດໄທ 6 ທ່ານ.
![News Cover](https://laoff.org.la/storage/news/News_Image_1709970511472.webp)
ສຕລ ແລະບໍລິຄຳໄຊ ຈັດກິດຈະກໍາສະຫຼອງວັນແມ່ຍິງສາກົນ
ສະຫະພັນບານເຕະແຫ່ງຊາດລາວ(ສຕລ) ແລະ ສະຫະພັນບານເຕະແຂວງບໍລິຄຳໄຊ(ສຕຂ)ໄດ້ຈັດ ພິທີເປີດ ກິດຈະ ກໍາບານເຕະຍິງ ສະຫລອງວັນແມ່ຍິງສາກົນຄົບຮອບ114ປີຂຶ້ນພາຍໃຕ້ໂຄງການ AFC Women's Footbal Day ທີ່ສະຫນາມກິລາແຂວງທີ່ ເມືອງປາກຊັນ,ແຂວງບໍລິຄຳໄຊ ໃນວັນທີ8ມີນາ 2024 ໂດຍເປັນກຽດເຂົ້າຮ່ວມຂອງ ທ່ານ ພັນໂທ ຖາວອນ ຫຼວງຈັນດາວົງ ຄະນະບໍລິຫານງານ ສຕລ. ທ່ານ ເລື່ອນວິໄລ ຈັນທະລາພັນ ປະທານສະຫະພັນບານເຕະແຂວງບໍລິຄຳໄຊ ພ້ອມດ້ວຍຄະນະບໍລິຫານງານ, ຄະນະຄູຝຶກ ນັກກິລາ ແລະ ພໍ່ແມ່ຜູ້ປົກຄອງນັກກິລາເຂົ້າຮ່ວມຢ່ງຫຼວງຫຼາຍ.
ໃນພິທີ,ຄະນະຮັບຜິດຊອບການຈັດງານລາຍງານໃຫ້ຮູ້ວ່າ:ງານດັ່ງກ່າວແມ່ນຈັດຂື້ນໂດຍການຮວ່ມມືລະຫວ່າງສຕລແລະສຕຂບໍລິຄຳໄຊ,ພາຍໃຕ້ການສະຫນັບສະຫນຸນ ຈາກໂຄງການ AFC Women's Football Day ,ໂຄງການນີ້ແມ່ນ ເປີດໃຫ້ເດັກນ້ອຍ ເພດຍິງໄດ້ມີໂອກາດຝຶກຊ້ອມ ແລະ ຫລິ້ນກິລາບານເຕະ ໂດຍມີເປົ້າໝາຍເພື່ອເສີມ ສ້າງພັດທະນານັກກິລາບານເຕະຮຸ່ນສຶບ ທອດໃຫ້ໄດ້ທົ່ວຂົງເຂດທີ່ຫ່າງໄກສອກຫຼີກ ແລະເຂດພູດອຍຢ່າງທົ່ວເຖິງ
ການຝຶກສອນທັກສະກິລາບານເຕະຂັ້ນພື້ນຖານດັ່ງກ່າວນີ້ແມ່ນຖືກຕ້ອງຕາມຂັ້ນຕອນ ແລະມີຄວາມຄ່ອງແຄ້ວ, ປັບປຸງພັດທະນາຄູຝຶກໃຫ້ມີຄວາມຮູ້ຄວາມສາມາດໃນການເຂົ້າຮ່ວມອົບຮົມຄູຝຶກລະດັບພາກພື້ນໃນອະນາຄົດ, ເພື່ອຊອກຫາເດັກນ້ອຍບຍທີ່ມີພອນສະຫວັນໃນດ້ານກິລາບານເຕະ ມາເປັນນັກກິລາສືບທອດ ແລະ ພັດທະນາຕົນເອງຈົນກາຍເປັນນັກກິລາຕົວແທນທີມຊາດໃນອະນາຄົດ.
ການເປີດກິດຈະກໍາສະເຫລີມສະຫລອງບານເຕະຍິງທີ່ແຂວງບໍລິຄຳໄຊ ນີ້ແມ່ນການຕົກລົງເຫັນດີຂອງຄະນະບໍລິຫານງານ ສະຫະພັນບານເຕະແຫ່ງຊາດລາວ ໃນກອງປະຊຸມໃຫຍ່ສະໄຫມສາມັນປະຈໍາປີ 2023 ໂດຍເລັ່ງເຫັນວ່ານັກກິລາເຍົາວະຊົນເພດຍິງຂອງ ແຂວງບໍລິຄຳໄຊ ແມ່ນມີທັກສະຄວາມສາມາດດ້ານກິລາບານເຕະທີ່ດີເດັນ ໂດຍມີຈຸດປະສົງແມ່ນເພື່ອພັດທະນາບານເຕະຍິງໃຫ້ມີຄວາມກ້າວໜ້າ ແລະແຜ່ຂະຫຍາຍໄປທົ່ວປະເທດໃນໄວໆນີ້, ໃຫ້ການຝຶກສອນນັບມື້ນັບມີມາດຖານ ຮັບປະກັນດ້ານປະລິມານແລະຄຸນນະພາບ, ໃຫ້ນ້ອງນັກຮຽນໄດ້ມີສຸຂະພາບແຂງແຮງ ແລະ ມັກກິລາບານເຕະ, ມີໃຈມັກໃນກິລາ, ມ່ວນຊື່ນກັບການຫຼື້ນກິລາ ແລະຫ່າງໃກຈາກສິ່ງອະໄບຍະມຸກຕ່າງໆ ແລະເພື່ອກ້າວໄປເປັນນັກກິລາອາຊີບໃນອະນາຄົດ.
ໃນໂອກາດກ່າວເປີດພິທີ ທ່ານ ເລື່ອນວິໄລ ຈັນທະລາພັນ ປະທານສະຫະພັນບານເຕະແຫ່ງແຂວງ ໄດ້ກ່າວຂອບໃຈຕໍ່ທາງສະຫະພັນແຫ່ງຊາດລາວທີ່ປີນີ້ໄດ້ ຍາດໂອກາດ ແລະ ມາຈັດງານກິດຈະກໍາວັນແມ່ຍິງສາກົນທີ່ມີຄວາມໝາຍຄວາມສໍາຄັນນີ້ ຢູ່ແຂວງບໍລິຄຳໄຊ ຖືເປັນກິດຈະກໍາດີໆທີ່ໃຫ້ເອື້ອຍນ້ອງແມ່ຍິງໄດ້ພັດທະນາຕົນເອງ, ກ້າສະແດງອອກ ເປີດໂອກາດໄດ້ເຂົ້າຮ່ວມໃນກິດຈະກໍາບານເຕະ ເຊິ່ງທີ່ຜ່ານມາແຂວງບໍບໍລິຄຳໄຊໄດ້ສົ່ງນັກກິລາເຂົ້າຮ່ວມໃນລາຍການ, ໃນການແຂ່ງຂັນຕ່າງໆ ຖືເປັນປະສົບການ ເພື່ອພັດທະນາຕົນເອງ ກໍຄືປະເທດຊາດ.
ພາຍໃນງານສຕລຍັງໄດ້ມອບບານເຕະໃຫ້ບັນດາໂຮງຮຽນທີ່ເຂົ້າຮ່ວມທັງ 10 ພາກສ່ວນຄື: ປະຖົມປາກຊັນໃຕ້, ໄຊມຸງຄຸນ, ສີວິໄລ, ໂພນໄຊເໜືອ, ແຕ່ງທອງ, ສວນສະຫວັນ, ສີສະອາດ, ນາສົ້ມມໍ, ໄຊສົມບູນ ແລະປະຖົມຊະນະໄຊ. ນອກນັ້ນຍັງໄດ້ຫລິ້ນກິດຈະກໍາຫລາຍຢ່າງ ບໍ່ວ່າຈະເປັນຫລອກບານ, ຊຸດບານ, ສົ່ງບານ, ເກມມ່ວນຊື່ນແລະຈັບບານ.
![News Cover](https://laoff.org.la/storage/news/News_Image_1709794303402.webp)
ລາວ ຟຸດຊໍ ລີກ 2024 ອາທິດທຳອິດ ມີປະຕູເກີດຂຶ້ນທັງຫມົດ 63 ປະຕູ
ການແຂ່ງຂັນ ລາວ ຟຸດ ລີກ 2024 ແມ່ນໄດ້ເລີ້ມເປີດເປັນທາງການ ອາທິດຜ່ານມາ ໂດຍໄດ້ເລີ່ມແຂ່ງຂັນ ວັນທີ 02 ມີນາ 2024 ຫາ 02 ມິຖຸນາ 2024 ແລະ ນໍາໃຊ້ສະຫນາມກິລາຟຸດຊໍຂອງ ສຕລ ເປັນສະຫນາມແຂ່ງຂັນ ກຳນົດເອົາ 12 ທີມເຂົ້າຮ່ວມການແຂ່ງຂັນ ປະກອບມີ: ເບ ສະຫວັນ ( ແຊ້ມເກົ່າ ), ລະຊະຕະ , ມາສະດາ ຈີບີ, ເຫນືອ - ໃຕ້, ຊີທີເອ ພາວເວີ້ , ນະຄອນຫຼວງ, ວີເຊີນ, ອາສາ ພາວເວີ້, ເຄເອັມທີ, ເອັສທີທີ, ຈັນສີ ແລະ ຊີໄອທີ.
ການແຂ່ງຂັນໃນອາທິດທຳອິດ ມີປະຕູເກີດຂຶ້ນທັງຫມົດ 63 ປະຕູ ມີການແຂ່ງຂັນທັງຫມົດ 6 ຄູ່ ສາມາດ ສະຫລຸບໄດ້ດັ່ງນີ້: ວັນເສົາ 02 ມີນາ 2024 ເບສະຫວັນ ຊະນະ ເຄເອັມທີ 8-4, ເອັສທີທີ ຊະນະ ຊີທີເອັ ພາວເວີ້ 10-0, ເຫນືອ-ໃຕ້ ຊະນະ ອາສາ ພາວເວີ້ 5-1 ແລະ ວັນອາທິດ 03 ມີນາ 2024 ຊີໄອທີ ຊະນະ ຈັນສີ 7-5, ມາສະດາ ຈີບີ ເສຍໃຫ້ ນະຄອນຫລວງ 4-8 ແລະ ລະຊະຕະ ເສຍໃຫ້ ວີເຊີນ 4-7.
ສຳລັບຮູບແບບການແຂ່ງຂັນຄັ້ງນີ້ແມ່ນແຂ່ງຂັນແບບລີກພົບກັນຫມົດ 1 ຮອບ ສະສົມຄະແນນ,ແລ້ວຄັດເລືອກເອົາສະໂມສອນ ອັນດັບ 1 ແລະ 2 ເຂົ້າຮອບ 4 ທີມໂດຍອັດຕະໂນມັດ ສ່ວນອັນດັບ 3-6 ແມ່ນປະຄົບຄູ່ແຂ່ງຂັນຮອບຕົກແລ້ວຄັດອອກ( Play-off) ນັດດຽວ.ສວ່ນສະໂມສອນ ທີ່ຊະນະຈະໄດ້ຜ່ານເຂົ້າສູ່ຮອບ 4 ທີມ ໂດຍຈະພົບກັບທີມອັນດັບ 1 ແລະ ອັນດັບ 2 ທີ່ເປັນທີມຢືນ, ຮອບ 4 ທີມ ແລະ ຮອບຊີງຊະນະເລີດ ຕາມລຳດັບ .
ສ່ວນເງິນລາງວັນຊະນະເລີດ ແມ່ນຈະໄດ້ຮັບເງິນ 50 ລ້ານກີບ, ຮອງຊະນະເລີດ ອັນດັບ 1 ໄດ້ຮັບເງິນ 25 ລ້ານກີບ ແລະ ຮອງຊະນະເລີດອັນດັບ 2 ໄດ້ຮັບເງິນ 10 ລ້ານກີບ ຂະນະທີ່ລາງວັນປະເພດບຸກຄົນ ມີລາງວັນຜູ້ຮັກສາປະຕູດີເດັ່ນ, ລາງວັນນັກກິລາດີເດັ່ນ, ລາງວັນຄູຝຶກດີເດັ່ນ ແລະ ລາງວັນຜູ້ຍິງປະຕູສູງສຸດ.
ຕາຕະລາງ ການແຂ່ງຂັນ ລາວ ຟຸດຊໍ ລີກ 2024 LAO FUTSAL LEAGUE 2024 ອາທິດ ທີ 2
- ວັນເສົາ 09 ມີນາ 2024
ເວລາ 14:00 ຊີທີເອ ພາວເວີ້ ພົບ ເບສະຫວັນ
ເວລາ 16:00 ເຄເອັມທີ ພົບ ອາສາ ພາວເວີ
ເວລາ 18:00 ເອັສທີທີ ພົບ ຈັນສີ
- ວັນອາທິດ 10 ມີນາ 2024
ເວລາ 14:00 ເຫນືອ-ໃຕ້ ພົບ ນະຄອນຫຼວງ
ເວລາ 16:00 ຊີໄອທີ ພົບ ວີເຊີນ
ເວລາ 18:00 ມາສະດາ ຈີບີ ພົບ ລະຊະຕະ
ທຸກໆຄູ່ແມ່ນແຂ່ງຂັນຢູ່ທີ່ສະຫນາມກິລາໃນຮົ່ມ ສູນຝຶກຫ້ວຍຫົງ ສຕລ, ສາມາດໄປຊົມ ແລະ ເຊຍ ຕິດຂອບສະຫນາມທີມທີ່ຕົນເອງມັກໄດ້, ເຂົ້າຊົມຟຣີ ແລະ ສາມາດຕິດຕາມຮັບຊົມ ການຖ່າຍທອດສົດໄດ້ຜ່ານທາງເພສ ເຟສບຸກ LAO FUTSAL LEAGUE, LAOFF TV ສະຫະພັນບານເຕະແຫ່ງຊາດລາວ ແລະ ເວບໄຊ ສະຫະພັນບານເຕະແຫ່ງຊາດລາວ www.laoff.org.la
![News Cover](https://laoff.org.la/storage/news/News_Image_1709786570857.webp)
ສຕລ ແຕ່ງຕັ້ງ ທ່ານ ຈັນທະວົງ ສິລິມະໂນທຳ ເປັນຮັກສາການເລຂາທິການ
ກອງປະຊຸມໃຫຍ່ ສະຫະພັນບານເຕະແຫ່ງຊາດລາວ ປະຈຳປີ 2024 ໄດ້ຈັດຂຶ້ນໃນທ້າຍເດືອນ ກຸມພາ ທີ່ຜ່ານມາ ສະມາຊິກ ສຕລ ໄດ້ເລືອກຕັ້ງເອົາຄະນະບໍລິຫານງານສຕລຊຸດໃໝ່ ທີ່ມີວາລະ 4 ປີ (2024-2028). ໃນນັ້ນ, ທ່ານ ວີເພັດ ສີຫາຈັກຣ ຖືກເລືອກໃຫ້ເປັນປະທານ ສຕລ ອີກຄັ້ງໃໝ່ ແລະ ປະກອບມີຮອງປະທານ 4 ທ່ານຄື ທ່ານ ປະສາດໄຊ ພິລາພັນເດດ, ທ່ານ ຄໍາໄພ ປະເສີດ, ທ່ານ ຄໍາແພງ ວົງຂັນຕີ ແລະ ທ່ານ ນາງ ກັນຍາ ແກ້ວມະນີ (ຜູ້ໃໝ່) ແລະ ກໍາມະການ ໃນຄະນະບໍລິຫານງານ ສຕລ ປະກອບມີ 6 ທ່ານຄື: ທ່ານ ດຣ.ໄຊຊະນະ ທອງຄໍາຈັນ, ທ່ານ ປອ. ບຸນຍູ້ ສີສານ, ທ່ານ ນາງ ພູໄຊ ແພງພົງ, ທ່ານ ພັນໂທ ຖາວອນ ຫຼວງຈັນດາວົງ, ທ່ານ ແກ້ວລັດຕະນະ ສີຫາວົງ (ຜູ້ໃໝ່)ແລະ ທ່ານ ຄໍລະເດດ ພອນພະຈັນ(ຜູ້ໃໝ່).
ຄະນະບໍລິຫານງານ ສະຫະພັນບານເຕະແຫ່ງຊາດລາວ ໄດ້ແຕ່ງຕັ້ງ ທ່ານ ຈັນທະວົງ ສິລິມະໂນທຳ ຂຶ້ນເປັນຮັກສາເລຂາທິການ ສະຫະພັນບານເຕະແຫ່ງຊາດ ແທນທ່ານ ນາງ ກັນຍາ ແກ້ວມະນີ ທີ່ໄດ້ຮັບການເລືອກຕັ້ງໃຫ້ເປັນ ຮອງປະທານສະຫະພັນບານເຕະແຫ່ງຊາດລາວ.
ທ່ານ ຈັນທະວົງ ສີລິມະໂນທຳ ຮູ້ສຶກເປັນກຽດ ແລະ ດີໃຈເປັນຢ່າງຍິ່ງ ທີ່ໄດ້ຮັບຄວາມໄວ້ວາງໃຈຈາກຄະນະບໍລິຫານງານ ສະຫະພັນບານເຕະແຫ່ງຊາດລາວ ເປີດໃຫ້ໂອກາດໃຫ້ຕົນເອງໄດ້ຮັບຕຳແຫນ່ງດັ່ງກ່າວ ຕະຫຼອດໄລຍະເວລາ 8 ປີຜ່ານມາ ສຕລ ໄດ້ມອບໂອກາດໃຫ້ຕົນໄດ້ຮຽນຮູ້, ເສີມສ້າງທັກສະຄວາມສາມາດ ແລະ ລົງປະຕິບັດຕົວຈິງໃນຫຼາຍວຽກງານປິ່ນອ້ອມ ຂອງ ສຕລ. ທ່ານ ຈັນທະວົງ ພ້ອມທີ່ຈະນໍາເອົາຄວາມຮູ້ໃນການຮຽນ ແລະ ຜ່ານການປະຕິບັດຕົວຈິງ ທັງພາຍໃນ ແລະ ຕ່າງປະເທດ ເພື່ອປະຕິບັດໜ້າທີ່ອັນຍິ່ງໃຫຍ່ນີ້ ຢ່າງສຸດຄວາມສາມາດ ແລະ ພ້ອມຈະເຮັດວຽກຢ່າງມີຄວາມຮັບຜິດຊອບ ຕາມການມອບໝາຍຈາກຄະນະບໍລິຫານງານ ສະຫະພັນບານເຕະແຫ່ງຊາດລາວຊຸດໃໝ່ ໃຫ້ປະສົບຜົນສຳເລັດຕາມແຜນການທີ່ວາງໄວ້.
ປະຫວັດຂອງທ່ານ ຈັນທະວົງ ສິລິມະໂນທຳ ໃນການກ້າວເຂົ້າມາສູ່ວົງການບານເຕະ ແລະ ເຮັດວຽກຢູ່ ສຕລ ມີດັ່ງນີ້:
ປີ 2016: ເລີ້ມເຂົ້າເຮັດວຽກຢູ່ທີ່ ສະຫະພັນບານເຕະແຫ່ງຊາດລາວ, ເປັນຜູ້ຊ່ວຍ ຜູ້ບໍລິຫານ ລາວພຣີເມຍລີກ
ປີ 2017: ເປັນຜູ້ຈັດການ ອອກໃບອະນຸຍາດສະໂມສອນ (Club Licensing)
ປິ 2017 – 2023 ເປັນຜູ້ຈັດການລະບົບໂອນຍ້າຍນັກກິລາຕ່າງປະເທດ (FIFA TMS)
ປີ 2018 – 2023 ເປັນຜູ້ຊ່ວຍເລຂາທິການ
ປີ 2020 – 2022 ເປັນຫົວໜ້າຝ່າຍພົວພັນສາກົນ
ປິ 2022 – 2024 ເປັນຮອງເລຂາທິການ
ປີ 2023 – 2027 ເປັນສະມາຊິກ AFC ASSOCIATIONS COMMITTEE.
ປິ 2024: ຮັບໜ້າທີ່ເປັນຮັກສາການເລຂາທິການ ສະຫະພັນບານເຕະແຫ່ງຊາດລາວ.
![News Cover](https://laoff.org.la/storage/news/News_Image_170971499780.webp)
ສຕລ ສຳເລັດການຝຶກອົບຮົມພັດທະນາຜູ້ຝຶກສອນ ແລະ ກ້າວໄປເປັນຜູ້ຝຶກສອນລະດັບ LFF / AFC ‘’ C ‘’ DIPLOMA
ສະຫະພັນບານເຕະແຫ່ງຊາດລາວ(ສຕລ) ໄດ້ຈັດພິທີປີດຝຶກອົບຮົມພັດທະນາຜູ້ຝຶກສອນແລະກ້າວໄປເປັນຜູ້ຝຶກສອນລະດັບ LFF / AFC ‘’ C ‘’ DIPLOMA ຂື້ນໃນວັນທີ 05 ມີນາ 2024,ໂດຍການໃຫ້ກຽດເຂົ້າຮ່ວມຂອງ ທ່ານ ດຣ. ໄຊຊະນະ ທອງຄຳຈັນ ຄະນະບໍລິຫານ ສະຫະພັນບານເຕະແຫ່ງຊາດລາວ.
ທ່ານ ວົງມີໄຊ ສຸບົວຄຳ ໄດ້ຂື້ນລາຍງານໃຫ້ຮູ້ວ່າ: ການຝຶກອົບຮົມຄັ້ງນີເປັນຄັ້ງທໍາອິດທີ່ຈັດຂື້ນຢູ່ລາວໂດມີ ຈຸດປະສົງຂອງການຝຶກອົບຮົມແມ່ນເພື່ອສ້າງບຸກຄະລາກອນທາງດ້ານຄູຝຶກເພື່ອຕໍ່ຍອດໄປສູ່ ເປັນຜູ້ຝຶກສອນ LFF / AFC '' C '' DIPLOMA ໃນອະນາຄົດ. ການຝຶກອົບຮົມແມ່ນໃຊ້ເວລາ 5 ວັນ ເລີ່ມວັນທີ 1-5 ມີນາ 2024 ໂດຍມີຜູ້ເຂົ້າຮ່ວມຝຶກອົບຮົມ 15 ທ່ານ, ການຝຶກອົບຮົມແມ່ນມີທັງພາກທິດສະດີ ແລະ ພາກປະຕິບັດຕົວຈິງ ເຊີ່ງເປັນການຮຽນຮູ້ແບບໃໝ່ພາຍໃຕ້ຫຼັກສູດການຮຽນຮູ້ຈາກ AFC ແລະ FIFA. ຊຶ່ງໃນປີໜ້າ ຈະມີການສົ່ງຕົວແທນ 2 ທ່ານໃນ 15 ທ່ານນີ້ ເຂົ້າຮ່ວມການຝຶກອົບຮົມຂອງ FIFA ແລ້ວກັບມາເປັນຜູ້ຝຶກສອນ LFF / AFC '' C '' DIPLOMA ໃນອະນາຄົດ. ແລະ ອີກຈຸດໜຶ່ງຈະໄດ້ນໍາໃຊ້ທັງ 15 ທ່ານ ເຂົ້າເປັນຜູ້ຊ່ວຍຝຶກສອນ LFF / AFC '' C '' DIPLOMA ໃນການຝຶກອົບຮົມທີ່ຈະມາເຖິງນີ້.
ໃນໂອກາດດັ່ງກ່າວ ທ່ານ ດຣ ໄຊຊະນະ ທອງຄໍາຈັນ ໄດ້ໃຫ້ຄໍາເຫັນວ່າ ການຝຶກອົບຮົມໃນຄັ້ງນີ້ສໍາຄັນຫຼາຍໂດຍບັນດາຄູຝຶກຮຸ່ນໃຫມ່ ເພື່ອສ້າງບົດບາດໃຫ້ບັນດາຄູຝຶກ ລາວ ມີຜູ້ຝຶກສອນລະດັບ LFF / AFC '' C '' DIPLOMA ໃຫ້ຫລາຍໆຂຶ້ນ, ສຳລັບຢູ່ ສປປລາວ ມີບຸກຄະລາກອນທີ່ເປັນຄົນລາວ ພຽງຄົນດຽວຄື: ທ່ານ ວົງມີໄຊ ສຸບົວຄຳ ເປັນຜູ້ຝຶກສອນລະດັບ LFF / AFC ‘’ C ‘’ DIPLOMA.
ເຂົ້າຮວ່ມກອງປະຊຸມນີ້ຍັງມີ ທ່ານ ຊຸນດຣໍາ ມູນຕີ (Sundram Moorthy) ຫົວໜ້າພະແນກເຕັກນິກ - ວິທະຍາ ສຕລ ເປັນວິທະຍາກອນ, ທ່ານ Mohammad Herman B Zailani ຫົວໜ້າວຽກງານພັດທະນາຄູຝຶກ ສຕລ ເປັນວິທະຍາກອນ , ທ່ານ ວົງມີໄຊ ສຸບົວຄຳ ຄະນະພັດທະນາຄູຝຶກ ພ້ອມດ້ວຍພະນັກງານວິຊາການກ່ຽວຂ້ອງ ແລະ ນັກສຳມະນາກອນ ເຂົ້າຮ່ວມ 15 ຄົນເປັນຍິງ 1 ຄົນ ທີ່ມາຈາກ ສຕລ, ບັນດາສະໂມສອນ ອ້ອມຂ້າງນະຄອນຫລວງວຽງຈັນ ແລະ ແຂວງສະຫວັນນະເຂດ.
![News Cover](https://laoff.org.la/storage/news/News_Image_170946984867.webp)
ຮອງປະທານ ສຕລ ເຂົ້າຮ່ວມກອງປະຊຸມໃຫຍ່ IFAB
ທ່ານ ນາງ ກັນຍາ ແກ້ວມະນີ ຮອງປະທານ ສະຫະພັນບານເຕະແຫ່ງຊາດລາວ(ສຕລ) ທັງເປັນຄະນະບໍລິຫານງານຂອງສະຫະພັນບານເຕະນາໆຊາດ (FIFA) ໄດ້ເຂົ້າຮ່ວມກອງປະຊຸມໃຫຍ່ ຂອງ ຄະນະກຳມະການສະຫະພັນບານເຕະສາກົນ(The International Football Association Board) (IFAB) ຄັ້ງທີ 138 ທີ່ສະກ໋ອດແລນ.
ສໍາລັບ IFAB ມີໜ້າທີ່ຮັບຜິດຊອບໃນການສ້າງ, ຄຸ້ມຄອງ ແລະ ດັດແກ້ ກະຕິກາກິລາບານເຕະ(Laws of the Game)ໃຫ້ເປັນມາດຕະຖານສາກົນ ເພື່ອນໍາໃຊ້ເຂົ້າໃນການແຂ່ງຂັນກິລາບານເຕະທົ່ວໂລກ,ໄດ້ຖືກສ້າງຕັ້ງຂື້ນໃນປີ1886ໂດຍສະຫະພັນບານເຕະອັງກິດ, ສະຫະພັນບານເຕະສະກ໋ອດແລນ, ສະຫະພັນບານເຕະເວລ໌ ແລະ ສະຫະພັນບານເຕະໄອຣ໌ແລນ.
ໃນປັດຈຸບັນ IFAB ປະກອບມີທັງໝົດ 8 ສຽງ ເຊິ່ງ 4 ສຽງມາຈາກ 4 ສະຫະພັນບານເຕະຜູ້ກໍ່ຕັ້ງ ສະຫະພັນລະ 1 ສຽງ ແລະ ອີກ 4 ສຽງ ມາຈາກຄະນະບໍລິຫານງານຂອງ FIFA ເຊິ່ງທ່ານ ນາງ ກັນຍາ ແກ້ວມະນີ ໄດ້ຖືກແຕ່ງຕັ້ງຈາກ FIFA ໃຫ້ເປັນ 1 ໃນຄະນະກຳມະການ 4 ທ່ານ ໂດຍເປັນຄົນລາວຄົນທໍາອິດ ທີ່ຖືກແຕ່ງຕັ້ງໃຫ້ປະຕິບັດໜ້າທີ່ດັ່ງກ່າວ.
ສະເພາະກອງປະຊຸມໃນປີ 2024 ນີ້ ມີການຮັບຮອງການດັດແກ້ໃນຫຼາຍຫົວຂໍ້ຂອງກະຕິກາກິລາບານເຕະ ໂດຍສະເພາະກະຕິກາທີ3(Law3) ວ່າດ້ວຍນັກກິລາ ເຊິ່ງຈະມີການເພີ່ມຈໍານວນການປ່ຽນຕົວສໍາຮອງ ໃນກໍລະນີທີ່ມີການກະທົບຫົວ (concussion).
ສໍາລັບກະຕິກາກິລາບານເຕະ(Laws of the Game) ປະກອບມີທັງໝົດ 17 ຂໍ້ ເຊິ່ງທ່ານສາມາດເຂົ້າເບີ່ງທັງໝົດໄດ້ທີ່: https://downloads.theifab.com/downloads/laws-of-the-game-2023-24?l=en
![News Cover](https://laoff.org.la/storage/news/News_Image_1709539631743.webp)
ສຕລ ຈັດຝຶກອົບຮົມພັດທະນາຜູ້ຝຶກສອນ ແລະ ກ້າວໄປເປັນຜູ້ຝຶກສອນລະດັບ LFF / AFC ‘’ C ‘’ DIPLOMA ເປັນຄັ້ງທຳອິດ
ສະຫະພັນບານເຕະແຫ່ງຊາດລາວ(ສຕລ)ໄດ້ຈັດພິທີເປີດຝຶກອົບຮົມພັດທະນາຜູ້ຝຶກສອນແລະກ້າວໄປເປັນຜູ້ຝຶກສອນລະດັບ LFF / AFC ‘’ C ‘’ DIPLOMAຂື້ນໃນທ້າຍເດືອນກຸມພາຜ່ານມາທີ່ສຕລ,ໂດຍການໃຫ້ກຽດເຂົ້າຮ່ວມຂອງທ່ານ ຈັນທະວົງ ສິລິມະໂນທຳ ຮັກສາການເລຂາທິການ ສະຫະພັນບານເຕະແຫ່ງຊາດລາວ.
ນີ້ແມ່ນການຝຶກອົບຮົມເປັນຄັ້ງທຳອິດໃນການພັດທະນາຜູ້ຝຶກສອນ ແລະ ກ້າວໄປເປັນຜູ້ຝຶກສອນລະດັບ LFF / AFC ‘’ C ‘’ DIPLOMA ,ໂດຍມີຈຸດປະສົງເພື່ອສ້າງບຸກຄະລາກອນທາງດ້ານຄູຝຶກເພື່ອຕໍ່ຍອດໄປສູ່ ເປັນຜູ້ຝຶກສອນ LFF / AFC ‘’ C ‘’ DIPLOMA ໃນອະນາຄົດ.
ການຝຶກອົບຮົມດັ່ງກ່າວແມ່ນຈະຝຶກໃນລະຫວ່າງ ວັນທີ 29 ກຸມພາ ຫາ 05 ມີນາ 2024 , ມີທັງພາກທິດສະດີ, ການປະຕິບັດຕົວຈິງ ແລະ ການສອບເສັງວັດລະດັບ ຖ້າຫາກຜູ້ໃດມີຜົນງານດີ ກໍມີໂອໄດ້ເປັນຜູ້ຝຶກສອນ ໃນອະນາຄົດ, ສຳລັບຢູ່ ສປປລາວ ມີບຸກຄະລາກອນທີ່ເປັນຄົນລາວ ພຽງຄົນດຽວຄື: ທ່ານ ວົງມີໄຊ ສຸບົວຄຳ ເປັນຜູ້ຝຶກສອນລະດັບ LFF / AFC ‘’ C ‘’ DIPLOMA.
ເຂົ້າຮວ່ມກອງປະຊຸມນີ້ຍັງມີ ທ່ານ ຊຸນດຣໍາ ມູນຕີ (Sundram Moorthy) ຫົວໜ້າພະແນກເຕັກນິກ - ວິທະຍາ ສຕລ ເປັນວິທະຍາກອນ, ທ່ານ Mohammad Herman B Zailani ຫົວໜ້າວຽກງານພັດທະນາຄູຝຶກ ສຕລ ເປັນວິທະຍາກອນ , ທ່ານ ວົງມີໄຊ ສຸບົວຄຳ ຄະນະພັດທະນາຄູຝຶກ ພ້ອມດ້ວຍພະນັກງານວິຊາການກ່ຽວຂ້ອງ ແລະ ນັກສຳມະນາກອນ ເຂົ້າຮ່ວມ 15 ຄົນເປັນຍິງ 1 ຄົນ ທີ່ມາຈາກ ສຕລ, ບັນດາສະໂມສອນ ອ້ອມຂ້າງນະຄອນຫລວງວຽງຈັນ ແລະ ແຂວງສະຫວັນນະເຂດ.
ສຳລັບຢູ່ ສປປລາວ ມີບຸກຄະລາກອນທີ່ເປັນຄົນລາວ ພຽງຄົນດຽວຄື: ທ່ານ ວົງມີໄຊ ສຸບົວຄຳ ທີ່ເປັນຜູ້ສອນ LFF / AFC ‘’ C ‘’ DIPLOMA.
![News Cover](https://laoff.org.la/storage/news/News_Image_1709095661289.webp)
ຝຶກອົບຮົມກໍາມະການຕັດສິນຟຸດຊໍ ກຽມພ້ອມຮັບໃຊ້ການແຂ່ງຂັນ ລາວ ຟຸດຊໍລີກ 2024
ສະຫະພັນບານເຕະແຫ່ງຊາດລາວ( ສຕລ) ໄດ້ຈັດພິທີເປີດການຝຶກອົບຮົມຍົກລະດັບກຳມະການຕັດສິນ ຟຸດຊໍ ໃນຕອນເຊົ້າ ວັນທີ 28 ກຸມພາ 2024 ທີ່ຫ້ອງປະຊຸມ ສຕລ,ໂດຍໃຫ້ກຽດເຂົ້າຮ່ວມພິທີເປິດຂອງ ທ່ານ ຈັນທະວົງ ສິລິມະໂນທຳ ຮັກສາການເລຂາທິການສະຫະພັນບານເຕະແຫ່ງຊາດລາວ.
ທ່ານ ຄຳປະສົງ ໄຊຍະວົງສີ ໄດ້ລາຍງານໃຫ້ຮູ້ວ່າ: ການຝຶກອົບຮົມໃນຄັ້ງນີ້ແມ່ນເພື່ອຈຸດປະສົງກຽມຄວາມພ້ອມໃຫ້ແກ່ການແຂ່ງຂັນລາວ ຟຸດຊໍ ລີກ 2024 ທີ່ຈະເປີດຂື້ນຢ່າງເປັນທາງການໃນວັນທີ 02 ມີນາ 2024 ນີ້. ໄລຍະການຝຶກອົບຮົມເປັນເວລາ 3 ມື້ (28 ກຸມພາ ຫາ 01 ມີນາ 2024) ຜູ້ເຂົ້າຮ່ວມ ແມ່ນຈະໄດ້ຮຽນຮູ້ທາງດ້ານກົດລະບຽບກະຕິກາໃໝ່ຂອງກິລາບານເຕະຟຸດຊໍ ທີ່ FIFAສະບັບປັບປຸງ ແລະ ມີການທົດສອບພາລະກຳລັງພ້ອມດ້ວຍ ມີການ ສອບເສັງຄວາມຮູ້ດ້ານທິດສະດີ.
ກ່າວມີຄຳເຫັນໃນກອງປະຊຸມ,ທ່ານຈັນທະວົງ ສິລິມະໂນທຳໄດ້ຍົກໃຫ້ເຫັນຄວາມໝາຍແລະຄວາມສຳຄັນຂອງການຝຶກອົບຮົມແລະເນັ້ນໃຫ້ຜູ້ເຂົ້າຮວ່ມຕັ້ງໃຈໃນການຮຽນ,ພ້ອມປະຕິບັດລະບຽບຂອງການຮຽນໃຫ້ເຄ່ງຄັດ,ປາສຈາກຂໍ້ຜິດພາດທີ່ອາດຈະເກີດຂຶ້ນ ເພື່ອກຽມຄວາມພ້ອມຕັດສິນ ການແຂ່ງຂັນ ລາວ ຟຸດຊໍ ລີກ 2024 ທີ່ຈະເປີດຂຶ້ນໃນອາທິດນີ້ດວ້ຍຜົນສຳເລັດ.
ເຂົ້າຮວ່ມໃນກອງປະຊຸມຍັງມີທ່ານ ໄຊປະເສີດ ພົງຊະນິດ ຫົວຫນ້າພະແນກກຳມະການຕັດສິນ ສຕລ, ທ່ານ ຄຳປະສົງ ໄຊຍະວິງ ຜູ້ຮັບຜິດຊອບກໍາມະການຕັດສິນຟຸດຊໍ ທັງເປັນຜູ້ຝຶກສອນ ພ້ອມດ້ວຍຜູ້ປະເມີນກໍາມະການຕັດສິນ ແລະ ສໍາມະນາກອນ 25 ທ່ານ.
![News Cover](https://laoff.org.la/storage/news/News_Image_1709091001448.webp)
ພຸດສະຫວັນ ຈັນທະວົງ ຜູ້ຊ່ວຍຜູ້ຕັດສິນກິລາບານເຕະຍິງຂອງລາວ ໄດ້ຮັບເລືອກໄປຕັດສິນລະດັບອາຊີ
ທ່ານ ນາງ ພຸດສະຫວັນ ຈັນທະວົງໄດ້ກາຍເປັນກຳມະການຕັດສິນຍິງຄົນທຳອິດຂອງສປປລາວລາວທີ່ໄດ້ຖືກຄັດເລືອກໃຫ້ຮ່ວມຕັດສິນລາຍການລະດັບທະວີບອາຊີ.ຖືວ່າເປັນອີກໜຶ່ງຂ່າວດີ ແລະ ເປັນຄວາມພາກພູມໃຈຂອງຄົນລາວ ທີ່ຈະໄດ້ເຫັນບຸກຄະລາກອນທີ່ເປັນຄົນລາວ ໄດ້ຮັບກຽດຖືກເຊີນໄປຮ່ວມຕັດສິນລະດັບທະວີບອາຊີຄັ້ງທຳອິດ ເຊິ່ງ ທ່ານ ນາງ ພຸດສະຫວັນ ຈັນທະວົງ ຜູ້ຊ່ວຍກຳມະການຕັດສິນລະດັບຟີຟ້າ(FIFA)ຈາກສປປລາວ ຈະໄດ້ໄປຮ່ວມຕັດສິນການແຂ່ງຂັນເຕະບານຍິງ ຮຸ່ນອາຍຸບໍ່ເກີນ 20 ປີ(U20) ຊິງແຊ້ມອາຊີ 2024 ຮອບສຸດທ້າຍ ໃນລະຫວ່າງ ວັນທີ 3-16 ມີນາ 2024 ນີ້.
ທ່ານ ນາງ ພຸດສະຫວັນ ຈັນທະວົງ ໃຫ້ຮູ້ຕື່ມວ່າ: ກ່ອນຈະຖືກຄັດເລືອກໄປຮ່ວມຕັດສິນຄັ້ງນີ້ ຕົນເອງຕ້ອງອົດທົນຝຶກຝົນຮຽນຮູ້ດ້ານວິຊາສະເພາະໜັກສົມຄວນ ໂດຍສະເພາະດ້ານພາສາອັງກິດ, ກົດກະຕິກາ, ພະລະກຳລັງ, ຈິດໃຈ ແລະ ການເຮັດວຽກເປັນທີມ ຖືວ່າຈະເປັນປະສົບການອັນໃໝ່ໃຫ້ກັບຕົນເອງ ເພື່ອຕໍ່ຍອດສູ່ການຕັດສິນລະດັບພາກພື້ນ ແລະ ສາກົນຕໍ່ໄປ.
ສຳລັບປະສົບການຜ່ານມາຂອງ ພຸດສະຫວັນ ຈັນທະວົງ ເລີ່ມຕົ້ນດ້ວຍການເປັນນັກກິລາແລ່ນລານ, ຈາກນັ້ນໄດ້ຮັບການອົບຮົມ ຮຽນຮູ້ ເລື່ອງການເປັນກຳມະການຕັດສິນບານເຕະ, ເຄີຍຕັດສິນລາຍການຕ່າງໆພາຍໃນປະເທດ ລວມທັງລະດັບອາຊຽນ ແລະ ອາຊີ ຈຳນວນໜຶ່ງ, ໄດ້ຮັບໃບຢັ້ງຢືນການເປັນຜູ້ຊ່ວຍຜູ້ຕັດສິນລະດັບຟີຟ້າໃນປີ 2019.
ການແຂ່ງຂັນເຕະບານຍິງ ຮຸ່ນອາຍຸບໍ່ເກີນ 20 ປີ ຊິງແຊ້ມອາຊີ 2024 ຮອບສຸດທ້າຍ ມີທີມເຂົ້າຮ່ວມທັງຫມົດ 8 ທີມ ປະກອບມີ: ອຸດເບກກິດສະຖານ, ໄຕ້ຫວັນ(ສປຈີນ), ສ.ເກົາຫລີ, ອົສຕຣາລີ, ຍີ່ປຸ່ນ, ສປປ ເກົາຫລີ, ສປຈີນ ແລະ ຫວຽດນາມ.
![News Cover](https://laoff.org.la/storage/news/News_Image_1708782853526.webp)
ຈັດພິທີເປີດສູນຝຶກກິລາບານເຕະຈຳປີ - ຈຳປາຢ່າງເປັນທາງການ
ສະຫະພັນບານເຕະແຫ່ງຊາດລາວ(ສຕລ)ໄດ້ຈັດພິທີເປີດສູນຝຶກກິລາບານເຕະຈຳປີ-ຈຳປາຂື້ນຢ່າງເປັນທາງການໃນຕອນບ່າຍຂອງວັນທີ 24 ກຸມພາ 2024 ຢູ່ທີ່ສູນດັ່ງກ່າວ,ເຊິ່ງມີທີ່ຕັ້ງຢູ່ສະຫນາມກິລາແຫ່ງຊາດລາວ(ຫຼັກ16)ໂດຍໃຫ້ກຽດເຂົ້າຮ່ວມຂອງທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ວີເພັດ ສີຫາຈັກຣປະທານສະຫະພັນບານເຕະແຫ່ງຊາດລາວ, ທ່ານ Kenny JEAN-MARIE ຕົວແທນຈາກ ສະຫະ ພັນບານເຕະນາໆຊາດFIFA, ຕົວແທນຈາກສະຫະພັນບານເຕະອາຊີAFC, ຕົວແທນ ສະຫະພັນບານເຕະອາຊຽນAFF ພ້ອມດ້ວຍ ຄະນະບໍລິຫານງານ ສຕລ,ບັນດາສະຫະພັນບານເຕະແຂວງ ແລະ ສື່ມວນຊົນເຂົ້າຮ່ວມ.
ໃນພິທີ,ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ກ່າວວ່າ: ສູນກິລາຈຳປີ - ຈຳປາ ເປັນຫມາກຜົນແບບຢ່າງທາງດ້ານການພັດທະນາກິລາບານເຕະລາວ, ເຊິ່ງພາກລັດ ກໍ່ຄືກະຊວງສຶກສາທິການ ແລະ ກິລາ ໄດ້ມອບສິດສຕລໄດ້ນຳໃຊ້ສະຫນາມກິລາແຫ່ງຊາດຫຼັກ 16 ລວມທັງຫມົດເປັນເນື້ອທີ່ດິນຈຳນວນ 105,446 ຕາແມັດ. ຫລັງຈາກນັ້ນ ສຕລ ໄດ້ຍາດແຍ່ງທຶນຊ່ວຍເຫລືອຈາກ ສະຫະພັນນາໆຊາດ ພາຍໃຕ້ໂຄງການ FIFA FORWARD 3 ໄລຍະຄື:
1. ໂຄງການກໍ່ສ້າງຕຶກຫໍພັກນັກກິລາພາຍໃຕ້ໂຄງການ FIFA FORWARD 1.0 ສຳເລັດໃນປີ 2017.
2. ໂຄງການກໍ່ສ້າງເດີ່ນຝຶກຊ້ອມຂະຫນາດມາດຕະຖານ 2 ເດີ່ນພາຍໃຕ້ໂຄງການ FIFA FORWARD 1.0 ສຳເລັດໃນປີ 2021.
3. ໂຄງການພາກຂະຫຍາຍ ສູນຝຶກກິລາບານເຕະ ຈໍາປີິ - ຈໍາປາ ພາຍໃຕ້ໂຄງການ FIFA FORWARD 2.0 ສຳເລັດໃນປີທີ່ຜ່ານມາ.
ຈຸດປະສົງຂອງສູນຝຶກນີ້ ແມ່ນເພື່ອເປັນບ່ອນຝຶກແອບນັກກິລາບານເຕະທີມຊາດລາວ ທັງຍິງ ແລະ ຊາຍ ຕັ້ງແຕ່ລຸ້ນໃຫຍ່ ຈົນຮອດ ລຸ້ນເຍົາວະຊົນ ເພື່ອຈຸດປະສົງຍົກລະດັບຂີດຄວາມສາມາດຂອງນັກກິລາໂດຍການມີສູນຝຶກທີ່ໄດ້ມາດຕະຖານທີ່ປະກອບໄປດ້ວຍ ຫໍພັກ, ຫ້ອງອາຫານ, ຫ້ອງປະຊຸມ, ຫ້ອງອອກກຳລັງກາຍ. ສູນຝຶກແຫ່ງນີ້ ຈະເປັນບ່ອນຫລໍ່ຫລອມທັກສະ, ຄວາມສາມາດຂອງນັກກິລາບານເຕະທີມຊາດລາວ ນັບແຕ່ນີ້ໄປສູ່ຫລາຍສະໄໝໃນອະນາຄົດ. ນອກນັ້ນ ສູນຝຶກແຫ່ງນີ້ ຍັງຈະເປັນສະຖານທີ່ຈັດກິດຈະກຳພັດທະນາບານເຕະຂັ້ນພື້ນຖານ, ນຳໃຊ້ເຂົ້າໃນການຝຶກຊ້ອມນັກກິລາຂອງສູນພັດທະນາກິລາບານເຕະຈຳປີ - ຈຳປາ ພາຍໃຕ້ໂຄງການ FIFA TDS, ຈັດກິດຈະກຳວັນກິລາບານເຕະ ສຕລ LFF FOOTBALL DAY ແລະ ອື່ນໆ.
ຂະນະທີ່ທ່ານ Kenny JEAN-MARIE ຕົວແທນຈາກ ສະຫະພັນບານເຕະຟີຟາ ໄດ້ກ່າວສະແດງຄວາມຊົມເຊີຍຕໍ່ຜົນສຳເລັດຂອງການສ້າງສູນຝຶກແຫ່ງດັ່ງກ່າວ, ສະຫະພັນບານເຕະແຫ່ງຊາດລາວ ໄດ້ມີຄວາມມຸ້ງຫມັ້ນ ພັດທະນາບານເຕະລາວ ໃນໄລຍະຍາວ ໃນທຸກໆລໍາດັບ , ພວກເຮົາຍິນດີທີ່ຈະປະກອບສ່ວນ ໂດຍຜ່ານໂຄງການ FIFA FORWARD ດ້ວຍການຮ່ວມມືທີ່ດີພວກເຮົາ ເຮັດວຽກຮ່ວມກັນເພື່ອສ້າງວິໃສທັດທາງດ້ານບານເຕະໂສມຫນ້າໃຫມ່ໃນປະເທດ ເຊິ່ງໄດ້ເປີດໂອກາດໃຫ້ເຍົາວະຊົນທັງຍິງ ແລະ ຊາຍ ໄດ້ມີໂອກາດໄດ້ສະແດງຄວາມສາມາດໃນເກມການແຂ່ງຂັນ, ທ່ານ Kenny JEAN-MARIE ຍັງກ່າວຕື່ມວ່າສະຫະພັນບານເຕະນາໆຊາດFIFAພ້ອມສືບຕໍ່ໃຫ້ການສະໜັບສະໜູນດ້ານທຶນຮອນ,ວິຊາການໃນການຊວ່ຍເຫຼືອສຕລດ້ານຕ່າງໆນັບທັງການຝຶກສອນນັກກິລາລາວຕື່ມອີກ ຜ່ານໂຄງການ FIFA FORWARD.