ສະຫະພັນບານເຕະແຫ່ງຊາດລາວ ໄດ້ເຜີຍແຜ່ທິດທາງແຜນວຽກງານການຝຶກອົບຮົມກຳມະການຕັດສິນ ປະຈຳປີ 2024 ໃນກອງປະຊຸມສະໄຫມສາມັນ ສະຫະພັນບານເຕະແຫ່ງຊາດລາວ ປະຈຳປີ 2023,ເຊິ່ງປະກອບມີວຽກງານດັ່ງນີ້:

- ຝຶກອົບຮົມກຳມະການຕັດສິນ (ຂັ້ນພື້ນຖານ) 3 ແຂວງ

- ຝຶກອົບຮົມກຳມະການຕັດສິນ (ຍົກລະດັບລາວລີກ 2) 15 ແຂວງ

- ຝຶກອົບຮົມກຳມະການຕັດສິນ (ຍົກລະດັບ ສຳລັບ ການແຂ່ງຂັນບານເຕະ ລາວລີກ 1 ສົກປີ 2024-2025)

- ຝຶກອົບຮົມກຳມະການຕັດສິນ (ຍົກລະດັບ ສຳລັບ ການແຂ່ງຂັນບານເຕະ LFF U16 & U19)

- ຝຶກອົບຮົມກຳມະການຕັດສິນ (ຍົກລະດັບ ສຳລັບ ການແຂ່ງຂັນບານເຕະລາວລີກຍິງ ປີ 2024)

- ຝຶກອົບຮົມ ຜູ້ປະເມີນ ແລະ ຜູ້ຝຶກສອນກຳມະການຕັດສິນ 2024

- ສອບເສັງກຳມະການ FIFA 2024

- ຝຶກອົບຮົມກຳມະການຕັດສິນລະດັບສູງ (ຍົກລະດັບ) MA Course 2024 FIFA

- ໂຄງການກຳມະການຕັດສິນ ລຸ້ນສືບທອດ LFF Referee Academy

- ຝຶກຊ້ອມທຸກໆວັນພຸດ ສຳລັບ ກຳມະການລາວລີກ 1 ຊາຍ ແລະ ຍິງ

- ຝຶກອົບຮົມກຳມະການຕັດສິນ ຟຸດຊໍ (ຂັ້ນພື້ນຖານ) 1 ແຂວງ

- ຝຶກອົບຮົມກຳມະການຕັດສິນ ຟຸດຊໍ (ຍົກລະດັບ ສຳລັບການແຂ່ງຂັນບານເຕະຟຸດຊໍລີກ)

  ສຳລັບກຳມະການຕັດສິນໃໝ່ ຮຸ່ນສຶບທອບ ທ່ານໃດສົນໃຈເຂົ້າຮ່ວມຝຶກອົບຮົມໃນແຕ່ລະຮຸ່ນ ສາມາດມາພົວພັນ ໄດ້ທີ່ ພະແນກກຳມະການ ຕັດສິນ ສະຫະພັນບານເຕະແຫ່ງຊາດລາວ ໃນໂມງລັດຖະການ.

ໄມເຄິນ ວ່າງ ກອງກາງທີມຊາດລາວ ຍ້າຍຈາກ ພັອດແລນ ທິມເບີ ທີມໃນລີກອັນດັບ 3 ຂອງ ສະຫະລັດ ອາເມຣິກາ (MLS Next Pro) ມາຢູ່ກັບ ໄມອາມີ້ ເອັຟຊີ ທີມໃນລີກອັນດັບ 2 ຂອງ ອາເມຣິກາ (USL Championship).
ໄມເຄິນ ວ່າງ ຫລິ້ນໃນ MLS Next Pro ກັບ ໂຄລຳບັສ ຄິວ ປີ 2022 ແລະ ພັອດແລນ ທິມເບີ ປີ 2023 ໂດຍສະເພາະ ປີ 2022 ສາມາດພາ ໂຄລຳບັສ ຄິວ ຜ່ານເຂົ້າຮອບເພອັອຟ.

ພິທີເປີດສູນຝຶກກິລາບານເຕະ ຈໍາປີ-ຈໍາປາ ແຫ່ງທີ 4 ໄດ້ຈັດຂື້ນໃນຕອນເຊົ້າ ວັນທີ 17 ທັນວາ 2023 ທີ່ສະໜາມກິລາບານເຕະ ແຂວງຫຼວງນໍ້າທາ ພາຍໃຕ້ການສະໜັບສະໜູນຈາກໂຄງການ ພັດທະນາຄວາມອາດສາມາດຂອງສະຫະພັນບານເຕະນາໆຊາດຫຼືຟີຟາ( FIFA Talent Development Scheme)ໃຫ້ກຽດ ເປັນ ປະທານກ່າວເປີດໂດຍ ທ່ານ ວັນດີ ພົມທອງ ຮອງປະທານແນວລາວສ້າງຊາດແຂວງ ທັງເປັນ ຮອງປະທານ ສະຫະພັນບານເຕະແຂວງຫຼວງນໍ້າທາ. 

ທ່ານ ທ່ານ ວັນດີ ພົມທອງ ໄດ້ກ່າວເຖິງການເປີດສູນຝຶກໃນຄັ້ງນີ້ວ່າ: ຈຸດປະສົງຂອງການເປີດສູນຝຶກແຫ່ງນີ້ ແມ່ນເພື່ອພັດທະນາກິລາບານເຕະຂອງແຂວງໃຫ້ມີຄວາມກ້າວໜ້າ ແລະແຜ່ຂະຫຍາຍໄປທົ່ວທຸກແຂວງ ເພື່ອໃຫ້ນ້ອງໆ ນັກຮຽນມີສຸຂະພາບແຂງແຮງພ້ອມທັງເປັນການເປີດໂອກາດໃຫ້ ນັກກິລາໄດ້ສະແດງຄວາມ ສາມາດທາງດ້ານ ພອນສະຫວັນກິລາບານເຕະ ມາເປັນນັກກິລາຮຸ່ນສືບທອດ ກາຍເປັນນັກກິລາທີມຂອງແຂວງ ແລະ ກ້າວສູ່ການເປັນນັກກິລາທີມຊາດໃນອະນາຄົດ.

ໃນໂອກາດດັ່ງກ່າວທ່ານ ດຣ ໄຊຊະນະ ທອງຄຳຈັນ ຄະນະບໍລິຫານງານ ສະຫະ ພັນບານເຕະແຫ່ງຊາດລາວ,

ກໍ່ໄດ້ກ່າວຍ້ອງຍໍຊົມເຊີຍຕໍ່ການເປີດສູນຝຶກໃນຄັ້ງນີ້ທີ່ໄດ້ດໍາເນີນໄປຕາມຈຸດປະສົງຄາດໝາຍທີ່ວາງໄວ້ ແລະ ຫວັງວ່າສູນຝຶກແຫ່ງນີ້ຈະມີສວ່ນປະກອບທີ່ສຳຄັນໃນການພັດທະນາກິລາບານເຕະຂອງແຂວງໃຫ້ສູງຂື້ນທັງລະດັບນັກກິລາ ຮຸ່ນສືບຂອງແຂວງແລະທີມຊາດ. 

ໃຫ້ກຽດເຂົ້າຮວ່ມໃນງານນີ້ຍັງມີທ່ານ ທອງສອນ ອາດຜາສຸກ ຮອງຫົວໜ້າພະແນກສຶກສາທິການແລະ ກິລາແຂວງ ຫຼວງນໍ້າທາ, ທ່ານ Sundram Moorthy ຫົວໜ້າພະແນກເຕັກນິກວິທະຍາ ສຕລ,ພ້ອມດ້ວຍຄະນະຄູຝຶກ ສຕລ, ຄະນະຄູຝຶກ ສຕຂ,ນັກກິລາເຍົາວະຊົນແຂວງຫຼວງນໍ້າທາ ແລະ ພໍ່ແມ່ຜູ້ປົກຄອງນັກກິລາເຂົ້າຮ່ວມ.

#FIFATalentDevelopmentScheme

#ChampiChampaFootballTrainingCenter

#Luangnamthaprovince

ສະຫະພັນບານເຕະແຫ່ງຊາດລາວ ຮ່ວມກັບ ສະຫະພັນບານເຕະ ຍີ່ປຸ່ນ ( JFA ) ໄດ້ສຳເລັດການຈັດຝຶກອົບຮົມການເປັນຄູຝືກໃຫ້ກັບບັນດາຄູຝຶກຈຳປີ - ຈຳປາ ແລະ ບັນດາສະໂມສອນຕ່າງໆໃນວັນທີ15ທັນວານີ້,ພາຍຫຼັງດຳເນີນການຝຶກອົບຮົມເປັນເວລາ2ວັນ(14 - 15 ທັນວາ 2023),ໂດຍມີນັກຝຶກອົບຮົມ24 ຄົນເຂົ້າຮ່ວມ.

ການຝຶກອົບຮົມຄັ້ງນີ້ແມ່ນໄດ້ຮັບການຊວ່ຍເຫຼືອດ້ານການຖ່າຍທອດບົດຮຽນຈາກວິທະຍາກອນ ທີ່ມາຈາກ ສະຫະພັນບານເຕະ ຍີ່ປຸ່ນ (JFA ) ທ່ານ Yasuhiko Kimura ເຊິ່ງເປັນຄູຝຶກທີມຊາດຍີ່ປຸ່ນ ຮຸ່ນເຍົາວະຊົນ ເປັນຜູ້ສົ່ງຄວາມຮູ້ດ້ານທິດສະດີ ແລະພາກປະຕິບັດຕົວຈິງພ້ອມເຕັກນິກໃຫມ່ໆ ໃຫ້ກັບຄູຝຶກ ເພື່ອຖ່າຍທອດໃຫ້ກັບນັກກິລາເຍົາວະຊົນໃນຕໍ່ຫນ້າ,ໂດຍໄດ້ເນັ້ນໃສ່ 4 ຫົວຂໍ້ຄື:

1. ໂຄງຮ່າງຂອງກິລາບານເຕະ ແລະ ກິດຈະກຳກິລາບານເຕະ

2. ⁠ໂຄງຮ່າງການວິເຄາະເກມ ແລະ ການປັບປຸງການຝຶກຊ້ອມ

3. ⁠ການພັດທະນາເຍົາວະຊົນໃນຢີ່ປຸ່ນ

4. ⁠ການວິເຄາະຂໍ້ມູນຂອງບານໂລກ 2022

JFA ໄດ້ເລີ່ມປະຕິບັດໂຄງການສົ່ງຄູຝຶກໄປຕ່າງປະເທດເລີ່ມແຕ່ປີ 1999, ມາຮອດປະຈຸບັນໄດ້ສົ່ງໄປ 109ຄົນ, 28 ປະເທດໃນພູມີພາກ ຖືວ່າມີຜົນງານທີ່ສາມາດຊ່ວຍເຫລືອອັນໃຫຍ່ຫລວງຕໍ່ການພັດທະນາບານເຕະໃນບັນດາປະເທດໃນອາຊີແລະໃນເທື່ອນີ້ ກໍມີຈຸດປະສົງເພື່ອຮັດແຫນ້ນຄວາມສາມັກຄີ ແລະ ສືບຕໍ່ສົ່ງການແລກປ່ຽນກັບປະເທດຮ່ວມມືປາຍທາງ ດ້ວຍການເປີດສຳມະນາ ຝຶກອົບຮົມ ບັນຍາຍຫລັກສູດໄລຍະສັ້ນ ໃຫ້ກົງກັບຄວາມຕ້ອງການຂອງແຕ່ລະປະເທດ ໂດຍການສົ່ງຄູຝຶກທີ່ມີໃບອະນຸຍາດລາຍເຊັນທີ່ເປັນທາງການຂອງ JFA ເປັນຜູ້ໃຫ້ການຝຶກອົບຮົມໃຫ້ແກ່ສປປລາວແລະຕ່າງປະເທດ.

ການແຂ່ງຂັນເຕະບານ ລາວລີກ ປະຈຳປີ 2023 ເປັນຄັ້ງທໍາອິດ ທີ່ຈັດເປັນແບບລະບົບລີກ ເພື່ອເປັນການສົ່ງເສີມກິລາບານເຕະຍິງ ໄດ້ມີເວທີເຄື່ອນໄຫວຝຶກແອບແຂ່ງຂັນຢ່າງຕໍ່ເນື່ອງ ໂດຍງົບປະມານຫຼັກໃນການຈັດຄັ້ງນີ້ ແມ່ນໄດ້ຮັບການສະໜັບສະໜູນຈາກ ສະຫະພັນບານເຕະນາໆຊາດ ຫຼື(FIFA), ເພື່ອຈັດການແຂ່ງຂັນແບບຢືນຢົງ ແລະ ຈັດຂຶ້ນທຸກໆປີ ທັງນີ້ກໍເພື່ອພັດທະນານັກກີລາ ທັງເປັນການຄັດເລືອກນັກກິລາສູ່ທີມຊາດ ເຊິ່ງນັບແຕ່ປີ 2023 ເປັນຕົ້ນໄປ ລີກບານເຕະທີມຍິງ ຈະຈັດໃຫ້ຄຽງຄູ່ກັບທີມຊາຍ ແລະ ຈະເພີ່ມຈໍານວນທີມເຂົ້າຮ່ວມຂຶ້ນເລື້ອຍໆຕາມມາດຖານເງື່ອນໄຂ ແລະ ຈະມີການພິຈາລະນາວ່າຈະໃຫ້ມີການຕົກຊັ້ນ ເລື່ອນຊັ້ນໃນອະນາຄົດ. ໂດຍເລີ່ມແຂ່ງຂັນມາແຕ່ວັນທີ 21 ຕຸລາ ແລະ ຈະໄດ້ສຳເລັດວັນທີ 10 ທັນວາ 2023 ໂດຍມີ 8 ທີມເຂົ້າຮ່ວມຄື: ຊ້າງນ້ອຍ, ມາສເຕີ ເຊເວັ້ນ, ເອສຣາ, ກອງທັບ, ຫຼວງພະບາງ, ຈຳປາສັກ, ນໍ້າທາ ແລະ ວຽງຈັນ.

 ສຳລັບພິທີປິດການແຂ່ງຂັນໄດ້ມີຂຶ້ນຢູ່ທີ່ສະຫນາມສູນຝຶກ ສະຫະພັນບານເຕະແຫ່ງຊາດລາວ ໃນວັນທີ 10 ທັນວາ 2023 ໂດຍເປັນກຽດເຂົ້າຮ່ວມຂອງ ທ່ານ ຄຳໄພ ປຣະເສີດ ຮອງປະທານ ສະຫະພັນບານເຕະແຫ່ງຊາດລາວ, ທ່ານ ນາງ ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດລາວ ພ້ອມດ້ວຍຄະນະບໍລິຫານງານ ສະຫະພັນບານເຕະແຫ່ງຊາດ, ຕະຫລອດຮອດຄູຝຶກ,ນັກກິລາ,ແຟນບານ ແລະ ສື່ມວນຊົນ ເຂົ້າຮ່ວມ.

 ຜົນການແຂ່ງຂັນບານເຕະ ລາວລີກຍິງ ປະຈຳປີ 2023 ທີມຊະນະເລີດ ຊ້າງນ້ອຍ ໄດ້ຮັບຂັນ,ຫລຽນຊະນະເລີດ ແລະ ໄດ້ຮັບເງິນລາງວັນ 100 ລ້ານກີບ ໂດຍລົງສະຫນາມ 14 ນັດ ຊະນະ 13 ນັດ ເສຍ 1 ນັດ ມີ 39 ຄະແນນ, ຮອງຊະນະເລີດອັນດັບ 1 ຫລື ອັນດັບ 2 ເອສະຣາ ໄດ້ຮັບເງິນ 50 ລ້ານກີບ ລົງສະຫນາມ 14 ນັດ ຊະນະ 8 ນັດ ສະເຫມີ 4 ນັດ ເສຍ 2 ນັດ ມີ 28 ຄະແນນ ເທົ່າກັບ ມາສເຕີ້ ເຊເວັ້ນ ແຕ່ ເອສະຣາ HEAD TO HEAD ດີກວ່າ, ຮອງຊະນະເລີດອັນດັບ 2 ຫລື ອັນດັບ 3 ມາສເຕີ້ ເຊເວັ້ນ ໄດ້ຮັບເງິນ 20 ລ້ານກີບ ລົງສະຫນາມ 14 ນັດ ຊະນະ 9 ນັດ ສະເຫມີ 1 ນັດ ເສຍ 4 ນັດ ມີ 28 ຄະແນນ, ອັນດັບ 5 ນໍ້າທາ ລົງສະຫນາມ 14 ນັດ ຊະນະ 6 ນັດ ສະເຫມີ 3 ນັດ ເສບ 4 ນັດ ມີ 21 ຄະແນນ, ອັນດັບ 6 ຈຳປາສັກ ລົງສະຫນາມ 14 ນັດ ຊະນະ 6 ນັດ ເສຍ 8 ນັດ ມີ 18 ຄະແນນ,ອັນດັບ 7 ກອງທັບ ລົງສະຫນາມ 14 ນັດ ຊະນະ 5 ນັດ ສະເຫມີ 3 ນັດ ເສຍ 6 ນັດ ມີ 18 ຄະແນນ, ອັນດັບ 7 ຫຼວງພະບາງ ລົງສະຫນາມ 14 ນັດ ຊະນະ 3 ນັດ ສະເຫມີ 1 ນັດ ເສບ 10 ນັດ ມີ 10 ຄະແນນ ແລະ ອັນດັບສຸດທ້າຍ ວຽງຈັນ ລົງສະຫນາມ 14 ນັດ ເສຍ 14 ນັດ ມີ 0 ຄະແນນ, ຂະນະ ທີ່ ລາງວັນປະເພດບຸກຄົນ ຄູຝຶກດີເດັ່ນຕົກເປັນຂອງ ພຸດປະສົງ ແສງດາລາວົງ ຄູຝຶກ ຈາກ ສະໂມສອນ ຊ້າງນ້ອຍ, ລາງວັນຜູ້ຮັກສາປະຕູດີເດັ່ນ ບັງອອນ ພອນໄຊ ຈາກ ສະໂມສອນ ກິລາບານເຕະ ຊ້າງນ້ອຍ ລົງສະຫນາມ 11 ນັດ ເສຍພຽງ 7 ປະຕູ, ລາງວັນນັກກິລາດີເດັ່ນ ວິລິນທອນ ວົງແສງທອງ ຈາກ ສະໂມສອນ ຊ້າງນ້ອຍ ລົງສະຫນາມ 14 ນັດ ຍິງໄດ້ 2 ປະຕູ ແລະ ລາງວັນຜູ້ຍິງປະຕູສູງສຸດ ໃຈຄຳ ໄຊຍະປະເສິດ ຈາກ ສະໂມສອນ ມາສເຕິ້ ເຊເວັ້ນ ລົງສະຫນາມ 14 ນັດ ຍິງໄດ້ 31 ປະຕູ. ການແຂ່ງຂັນຄັ້ງນີ້ແມ່ນໄດ້ຮັບການສະຫນັບສະຫນູນຫຼັກຈາກ ສະຫະພັນບານເຕະນາໆຊາດ ຫຼື ຟີຟາ, ບໍລິສັດລາວໂທລະຄົມມະຫາຄົມ ຈຳກັດ, ວຽງຈັນໄອສ໌, ບໍລິສັດ ວາຣີິ ແລະ ບໍລິສັດ ອີໂວ ສະຕໍ.

ກອງປະຊຸມໃຫຍ່ ສະໄໝສາມັນ ສະຫະພັນບານເຕະແຫ່ງຊາດລາວ(ສຕລ)ປະຈໍາປີ 2023 ໄດ້ໄຂຂຶ້ນໃນຕອນເຊົ້າວັນທີ 10 ທັນວາ 2023 ທີ່ ໂຮງແຮມ ເມືອງແທ໋ງ, ນະຄອນຫຼວງວຽງຈັນແລະໄດ້ອັດລົງດວ້ຍຜົນສຳເລັດໃນວັນດຽວກັນ,ພາຍໃຕ້ການເປັນປະທານຂອງທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ,ໂດຍໃຫ້ກຽດເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ປະທານກິຕິມະສັກ ສຕລ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ,ຄະນະບໍລິຫານງານ ສຕລ, ຜູ້ແທນຈາກບັນດາສະຫະພັນບານເຕະແຂວງ, ຜູ້ຕາງໜ້າຈາກສະໂມສອນກິລາບານເຕະລາວລີກ 1 ປະຈໍາປີ 2023, ບັນດາສື່ມວນຊົນ ພ້ອມດ້ວຍ ບັນດາວິຊາການ ສຕລ.

ໃນໂອກາດກ່າວເປີດກອງປະຊຸມຢ່າງເປັນທາງການ ທ່ານວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວໃນນາມປະທານກອງປະຊຸມໄດ້ຍົກໃຫ້ເຫັນຜົນງານການເຄືອນໄຫວຂອງສຕລໃນໄລຍະ 12 ເດືອນທີ່ຜ່ານມາ,ໂດຍໄດ້ມີຜົນງານໃນການພັດທະນາກິລາບານເຕະລາວໃນທຸກລະດັບ,ໄດ້ຈັດການແຂ່ງຂັນບານເຕະລາວລີກ1,ລາວລີກ2,ໄປຄຽງຄູ່ກັບວຽກງານເຕັກນິກວິທະຍາ ແລະ ພັດທະນາ,ສົ່ງເສີມ,ຕິດຕາມທີມຊາດລາວຊາຍແລະຍິງທີ່ໄປແຂ່ງຂັນຢູ່ຕ່າງປະເທດ,ພັດທະນາຄູຝຶກ,ກໍາມະການຕັດສິນ,ວຽກງານນິຕິກໍາ,ວຽກງານສື່ມວນຊົນ,ວຽກງານການຕະຫຼາດ, ການພັດທະນາໂຄງລ່າງພື້ນຖານ ແລະ ວຽກງານອື່ນໆ, ນອກນັ້ນ,ຍັງໄດ້ຂະຫຍາຍສູນຝຶກກິລາບານເຕະຈໍາປີ-ຈໍາປີ ໃຫ້ເປັນອີກໜຶ່ງວຽກງານບູລິມະສິດຂອງ ສຕລ ເຊິ່ງໃນປັດຈຸບັນ ກໍ່ໄດ້ເປີດແລ້ວ 5 ສູນ,ສະເພາະຢູ່ຕ່າງແຂວງມີ 3 ສູນທີ່ຫຼວງພະບາງ,ຈໍາປາສັກ ແລະ ຫຼວງນໍ້າທາ.ພິເສດພາຍໃນປີ 2023,ບັນດາບຸກຄະລາກອນຂອງ ສຕລ ກໍ່ໄດ້ມີຜົນງານອັນພົ້ນເດັ່ນກໍ່ຄືທ່ານ ນາງ ກັນຍາ ແກ້ວມະນີ ເລຂາທິການ ສຕລ ໄດ້ຮັບການເລືອກຕັ້ງໃຫ້ເປັນຄະນະບໍລິຫານງານ AFC ແລະ FIFA,ປະທານສຕລໄດ້ຮັບເລືອກໃຫ້ເປັນຄະນະບໍລິຫານງານ AFF ທັງເປັນຫົວໜ້າອະນຸກໍາມະການພັດທະນາ AFF, ຄະນະໃນອະນຸກໍາມະການພັດທະນາ ຂອງ AFC,ທ່ານ ຄໍາແພງ ວົງຂັນຕີ ຮອງປະທານ ສຕລ ໄດ້ຮັບເລືອກໃຫ້ເປັນຄະນະໃນອະນຸກໍາມະການບານເຕະເພື່ອສັງຄົມ (CSR) ຂອງ AFC,ທ່ານ ຈັນທະວົງ ສີລິມະໂນທໍາ ຮອງເລຂາທິການ ສຕລ ໄດ້ຮັບເລືອກໃຫ້ເປັນຄະນະໃນອະນຸກໍາມະການສະຫະພັນບານເຕະ ຂອງ AFC. ນອກນັ້ນ,ໃນວຽກງານກໍາມະການຕັດສິນ ທ່ານ ນາງ ພຸດສະຫວັນ ຈັນທະວົງ ສາມາດຜ່ານການຄັດເລືອກກໍາມະການຕັດສິນ ລະດັບ Elite ຂອງ AFC.ໃນວຽກງານເຕັກນິກວິທະຍາແລະທ່ານ ວົງມີໄຊ ສຸບົວຄໍາ ກໍ່ໄດ້ຮັບການຮັບຮອງຈາກ AFC ໃນການເປັນຜູ້ຝຶກສອນ ການຝຶກອົບຮົມຄູຝຶກ ລະດັບ C.

ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວຍັງໄດ້ຂຶ້ນສະເໜີ ແຜນງົບປະມານສຳລັບປີ 2024 ພ້ອມດຽວນັ້ນໃນປີ 2024ຈະໄດ້ມີການເລືອກຕັ້ງຄະນະບໍລິຫານງານ ສຕລ ສົກປີ 2024 – 2028 ເຊິ່ງຈະມີການເລືອກຕັ້ງໃນເດືອນ ກຸມພາ 2024.ສຳລັບແຜນການແຂ່ງຂັນປະຈຳປີ 2024ຈະມີ7 ລາຍການປະກອບມີ:

• ການແຂ່ງຂັນບານເຕະ ເປບຊີ ລາວລີກ 1 ປີ 2024/25

• ການແຂ່ງຂັນບານເຕະ ເຍົາວະຊົນຮຸ່ນອາຍຸບໍ່ເກີນ 16

• ການແຂ່ງຂັນບານເຕະເຍົາວະຊົນຮຸ່ນອາຍຸບໍ່ເກີນ 19 ປີ

• ບານເຕະຊິງຂັນ ພະນະທ່ານນາຍົກລັດຖະມົນຕີ ແຫ່ງ ສປປລາວ ປະຈຳປີ 2024/25

• ການແຂ່ງຂັນບານເຕະ ລາວລີກຍິງ 2024

• ຈັດການແຂ່ງຂັນບານເຕະ ລາວຟຸດຊໍ ລີກ 2024

• ການແຂ່ງຂັນບານເຕະ ລາວລີກ2 ປະຈໍາປີ 2024 ແລະ ການແຂ່ງຂັນມັດທະຍົມຕົ້ນ-ປາຍ.

ທ່ານ ສົມສະຫວາດ ເລັ່ງສະຫວັດ ປະທານກິຕິມະສັກ ສຕລ ໄດ້ກ່າວໂອ້ລົມຕໍ່ກອງປະຊຸມ,ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍມາຍັງປະທານພ້ອມຄະນະນຳແລະພະນັກງານສຕລທີ່ຍາດໄດ້ຜົນງານຕະຫຼອດ1ປີຜ່ານມາແລະດຳເນີນກອງປະຊຸມຢ່າງຖືກຕ້ອງຕາມລະບຽບຂອງສຕລໄດ້ກຳນົດໄວ້.ໃນນັ້ນທ່ານສົມສະຫວາດເລັ່ງສະຫວັດໄດ້ສະແດງຄວາມປິຕິຍິນດີມາຍັງປະທານແລະຄະນະນຳສຕລທີ່ໄດ້ຮັບເລືອກຕັ້ງເປັນຄະນະບໍລິຫານງານຂອງ AFCແລະFIFA.

ທ່ານ ສົມສະຫວາດ ເລັ່ງສະຫວັດກ່າວຕື່ມວ່າ:ເຖິງພວກເຮົາມີຜົນງານປະສົບຜົນສຳເລັດຫຼາຍກວ່າປິຜ່ານມາ,ແຕ່ທຽບໃສ່ຄວາມມຸ້ງຫວັງແລະຄວາມຄອງຄອຍຂອງປະຊາຊົນ,ພວກເຮົາຕ້ອງບຸກບືນສູ້ຊົນໃຫ້ມີຜົນງານຫຼາຍກວ່ານີ້.ນະໂອກາດນີ້,ຂ້າພະເຈົ້າສະເໜີບາງບັນຫາເພື່ອເລ່ງໃສ່ພັດທະນາກິລາບານເຕະລາວ.ໜຶ່ງ,ສະເໜີມາຍັງການນໍາກະຊວງສຶກສາທິການແລະກິລາໃຫ້ກຳນົດແຈ້ງນະໂຍບາຍຂອງລັດຕໍ່ວຽກງານພັດທະນາກິລາໃຫ້ມີການຊຸກຍູ້ສົ່ງເສີມເລີ່ມແຕ່ໄວເດັກຂື້ນໄປ,ໂດຍສະເພາະແມ່ນສົ່ງເສີມດ້ານໂພສະນາການ,ເພາະເດັກແຂງແຮງຈິ່ງເປັນນັກກິລາທີ່ແຂງແຮງໄດ້.ສອງ,ສະເໜີໃຫ້ອຳນາດການປົກຄອງທ້ອງຖິ່ນພິຈາລະນາໃນການປະສານສົມທົບລະຫວ່າງພະແນກສຶກສາທິການແລະກິລາແຂວງກັບສະຫະພັນບານເຕະແຂວງ,ສະໂມສອນໃຫ້ດີຂື້ນກວ່າເກົ່າ.ສາມ,ນຳສະເໜີບັນດາຫົວໜວ່ຍທຸລະກິດທີ່ມີເງື່ອນໄຂໃຫ້ຊວ່ຍການອຸປະຖໍາວົງການກິລາບານເຕະໃຫ້ຫຼາຍຂື້ນແລະສີ່,ໃຫ້ສຕລມີການເຄື່ອນໄຫວທີ່ຫ້າວຫັນ,ມີຜົນງານເດັ່ນຫຼາຍຂື້ນທັງພາຍໃນ,ຕ່າງປະເທດ,ພ້ອມກັນສູ້ຊົນຜ່ານຜ່າຄວາມຫຍຸ້ງຍາກແລະຊຸກຍູ້ໃຫ້ກ້າວໜ້າຂື້ນໄປເພື່ອຈຸດປະສົງເຮັດໃຫ້ກິລາບານເຕະຂອງປະເທດເຮົາກາຍເປັນກິລາຍອດນິຍົມຂອງມວນຊົນຢ່າງແທ້ຈິງ.

ສະຫະພັນບານເຕະແຫ່ງຊາດລາວ (ສຕລ) ໄດ້ຈັດກອງປະຊຸມພັດທະນາກິລາບານເຕະທົ່ວປະເທດ ປະຈໍາປີ 2023 ຂຶ້ນຢ່າງເປັນທາງການ ໃນຕອນເຊົ້າຂອງວັນທີ 09 ທັນວາ 2023 ທີ່ຫ້ອງປະຊຸມ ສຕລ ພາຍໃຕ້ການເປັນປະທານຂອງທ່ານ ວີເພັດ ສີຫາຈັກຣ໌ ປະທານສະຫະພັນບານເຕະແຫ່ງຊາດລາວ ໂດຍມີຜູ້ເຂົ້າຮ່ວມຈາກສະຫະພັນບານເຕະແຕ່ລະແຂວງ/ນະຄອນຫຼວງວຽງຈັນ ພ້ອມດ້ວຍສື່ມວນຊົນ ເຂົ້າຮ່ວມ.

  ກ່າວເປີດກອງປະຊຸມຢ່າງເປັນທາງການ ທ່ານ ວີເພັດ ສີຫາຈັກຣ໌ ປະທານສະຫະພັນບານເຕະແຫ່ງຊາດລາວ ໄດ້ກ່າວວ່າ: ກອງປະຊຸມຄັ້ງນີ້ ພວກເຮົາຈະໄດ້ພ້ອມກັນສັງເກດຕີລາຄືນບັນດາຜົນງານການເຄື່ອນໄຫວໃນວຽກງານການພັດທະນາກິລາບານເຕະທົ່ວປະເທດໃນໄລຍະຫນຶ່ງປີທີ່ຜ່ານມາ. ໂດຍໃນປີ 2024 ສຕລ ຈະສືບຕໍ່ໃຫ້ງົບປະມານຈັດການແຂ່ງຂັນ ຈໍານວນ 120 ລ້ານກີບ ໃຫ້ແກ່ທຸກໆສະຫະພັນບານເຕະແຂວງ ແລະ ນະຄອນຫຼວງວຽງຈັນ ເພື່ອນໍາໄປຈັດການແຂ່ງຂັນ 5 ລາຍການ ດັ່ງຕໍ່ໄປນີ້:

• ການແຂ່ງຂັນ ລາວລີກ 2 (ການແຂ່ງຂັນປະຈໍາປີຂອງບັນດາແຂວງ/ນະຄອນຫຼວງ)

• ການແຂ່ງຂັນ ລະດັບມັດທະຍົມ ຕອນຕົ້ນ ປະເພດຊາຍ ພາຍໃນແຂວງ/ນະຄອນຫຼວງ

• ການແຂ່ງຂັນ ລະດັບມັດທະຍົມ ຕອນປາຍ ປະເພດຊາຍ ພາຍໃນແຂວງ/ນະຄອນຫຼວງ

• ການແຂ່ງຂັນ ລະດັບມັດທະຍົມ ຕອນຕົ້ນ ປະເພດຍິງ ພາຍໃນແຂວງ/ນະຄອນຫຼວງ

• ການແຂ່ງຂັນ ລະດັບມັດທະຍົມ ຕອນປາຍ ປະເພດຍິງ ພາຍໃນແຂວງ/ນະຄອນຫຼວງ

 ສະຫະພັນບານເຕະແຫ່ງຊາດລາວ ຮຽກຮ້ອງໃຫ້ບັນດາສະຫະພັນບານຄົ້ນຄວ້າ, ປຶກສາຫາລື ເພື່ອໃຫ້ການແຂ່ງຂັນດັ່ງກ່າວ ສາມາດຈັດຂຶ້ນໄດ້ໃນປີ 2024 ທີ່ຈະມາຮອດນີ້.

   ໃນງານດັ່ງກ່າວ, ທ່ານ ນາງ ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດລາວ ຍັງໄດ້ລາຍງານເຖິງຈຸດປະສົງຂອງກອງປະຊຸມ ແມ່ນສືບຕໍ່ຈັດຕັ້ງປະຕິບັດແຜນຍຸດທະສາດ ແລະ ແຜນການຂອງ ສຕລ ທີ່ນຳກົດໄວ້ໃຫ້ປະກົດຜົນເປັນຈິງ ໃນນັ້ນແມ່ນການປະສານສົມທົບກັບສະຫະພັນບານເຕະແຕ່ລະແຂວງ/ນະຄອນຫຼວງ.

   ທ່ານ ສັນຕິກອນ ແສງດາລາ ຫົວຫນ້າພະແນກຈັດການແຂ່ງຂັນ ສຕລ ໄດ້ລາຍງານກ່ຽວກັບການຈັດແຂ່ງຂັນຂອງ ສຕລ ຮ່ວມກັບ ສຕຂ/ນວ ປະຈຳປີ 2023 ເຊິ່ງປະກອບມີການແຂ່ງຂັນລາວລີກ 2 ມີທັງຫມົດ 9 ແຂວງທີ່ສາມາດຈັດແຂ່ງຂັນໄດ້ ໂດຍມີທັງຫມົດ 62 ທີມ ມີນັກກິລາທັງຫມົດ 1740, ນັດແຂ່ງຂັນທັງຫມົດ 500 ນັດ, ສະຫນາມແຂ່ງຂັນ 9 ສະຫນາມ ແລະ ຄະນະຄູຝຶກທັງຫມົດ 121 ຄົນ, ມັດທະຍົມຕອນຕົ້ນ ຕອນຕົ້ນ - ຕອນປາຍ ຍິງ - ຊາຍ ມີທັງຫມົດ 246 ທີມຈາກທັງຫມົດ 8 ແຂວງ.

  ໃນກອງປະຊຸມ ບັນດາຜູ້ຕາງໜ້າ ສະຫະພັນບານເຕະແຕ່ລະແຂວງ/ນະຄອນຫຼວງວຽງຈັນ ໄດ້ປະກອບຄວາມຄິດເຫັນໃນການປະຕິບັດວຽກງານໃນໄລຍະປີ 2023 ຜ່ານມາ ແລະ ຜ່ານແຜນຈັດຕັ້ງປະຕິບັດໃນປີ 2024, ເຊິ່ງໃນກອງປະຊຸມ ແມ່ນໄດ້ຕົກລົງເຫັນດີເລືອກ ແຂວງບໍລິຄຳໄຊ ຈັດກິດຈະກຳ AFC WOMEN’S FOOTBALL DAY 2024 ໃນເດືອນມີນາ ແລະ ແຂວງຜົ້ງສາລີ ຈັດກິດຈະກຳ AFC GRASSROOTS FOOTBALL DAY 2024 ໃນເດືອນພຶດສະພາ.

Vientiane, 05 December 2023

Request for Proposals

To: The interested service providers,

Lao Football Federation is pleased to invite the interested service providers to submit their proposals to providing the Air Ticket Services for the following Schedule:

17-29 June 2024 Vientiane-Jakarta-Vientiane (AFF U16 BOY’S CHAMPIONSHIP 2024)

20 June-3 July 2024 Vientiane-Jakarta-Vientiane (AFF U19 BOY’S CHAMPIONSHIP 2024)

List of required documents:

- Company profile

- List of clients

- Business registration certificate

- Tax Payment certificate

- Price proposal

- Payment term and condition

- Other Services Condition

All interested parties are required to submit the set of required documents to [email protected] no later than 20 December 2023.

ນະຄອນຫຼວງວຽງຈັນ ວັນທີ 30 ພະຈິກ 2023 ຢູ່ທີ່ສູນຝຶກຈໍາປີ - ຈໍາປາ ສະຫນາມກິລາແຫ່ງຊາດຫຼັກ 16 ສະຫະພັນບານເຕະແຫ່ງຊາດລາວ ຮ່ວມກັບ ສະຫະພັນບານເຕະນາໆຊາດ ຈັດພິທີເປີດໂຄງການກິລາບານເຕະໃນໂຮງຮຽນ FIFA FOOTBALL FOR SCHOOLS ໂດຍການໃຫ້ກຽດເຂົ້າຮ່ວມໂດຍມີ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ, ທ່ານ ນ. ຟັດມາ ຊາມູຣາ ( Fatma Samba Diouf Samoura ) ເລຂາທິການ ສະຫະພັນບານເຕະນາໆຊາດ ພ້ອມດ້ວຍຄະນະ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະບໍລິຫານງານ ສະຫະພັນບານເຕະແຫ່ງຊາດລາວ, ແຂກຖືກເຊີນ, ສື່ມວນຊົນ, ຄູອາຈານ ແລະ ນັກກິລາເຍົາວະຊົນ 300 ຄົນ ເຂົ້າຮ່ວມ.

 ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ກ່າວເປີດພິທີຢ່າງເປັນທາງການ ສຳລັບຈຸດປະສົງຂອງໂຄງການນີ້ ແມ່ນຈະສຸ່ມໃສ່ການພັດທະນາກິລາບານເຕະໃນໂຮງຮຽນຫຼັກ ຊຶ່ງໄດ້ເນັ້ນໃຫ້ບັນດາຄູພາລະ ໄດ້ຮັບການຝຶກແອບບຢ່າງຖືກວິທີ ແລະ ສົ່ງເສີມນ້ອງນັກຮຽນ ທີ່ມີຄວາມຮັກໃນກິລາບານເຕະ ທີ່ມີຄວາມຮັກມັກໃນກິລາບານເຕະ ສາມາດເຂົ້າເຖິງການຫລິ້ນບານເຕະໃນໂຮງຮຽນໃຫ້ຫລາຍຂຶ້ນ ແລະ ຮຽນຮູ້ທັກສະນະໃນການດຳລົງຊີວິດ. ໃນສອງມື້ທີ່ຜ່ານ,ໄດ້ມີການຈັດຝຶກອົບຮົມພາກທິດສະດີ ແລະ ຝຶກແອບພາກປະຕິບັດຕົວຈິງໃຫ້ແກ່ບັນດາຄູຝຶກພາລະ ຈຳນວນ 80 ທ່ານ ມາຈາກ 80 ໂຮງຮຽນ ພາຍໃນນະຄອນຫຼວງວຽງຈັນ ເຊິ່ງບັນດາຄູຝຶກເຫລົ່ານີ້ຈະເປັນຜູ້ນຳເອົາຄວາມຮູ້ທີ່ໄດ້ຝຶກອົບຮົມໃນຄັ້ງນິ້ ໄປຂະຫຍາຍສິດຕໍ່ບັນດາຄູພາລະຜູ້ອື່ນໆຕື່ມອີກ ແລະ ຈະໄດ້ມີໂຄງການນິ້ຍັງສຶບຕໍ່ຈັດຕັ້ງປະຕິບັດໃຫ້ແກ່ບັນດາໂຮງຮຽນຢູ່ຕ່າງແຂວງໃນຕໍ່ຫນ້າ.

  ຂະນະທີ່ ທ່ານ ນ. ຟັດມາ ຊາມູຣາ ( Fatma Samba Diouf Samoura ) ເລຂາທິການ ສະຫະພັນບານເຕະນາໆຊາດ ໄດ້ເວົ້າເຖິງ ໂຄງການບານເຕະໃນໂຮງຮຽນ FIFA FOOTBALL FOR SCHOOLS ແມ່ນໄດ້ເລີ້ມຕົ້ນໂຄງການໃນປີ 2019 ໂດຍໃນປັດຈຸບັນ ມີຫຼາຍກວ່າ 100 ປະເທດສະມາຊິກ ທີ່ເຂົ້າຮ່ວມໂຄງການດັ່ງກ່າວ ຂ້າພະເຈົ້າຫວັງວ່າ ຈະໄດ້ນັກກິລາເຍົາວະຊົນ, ຄູອາຈານ ເປັນຕົວແທນຂອງປະທດ ( FIFA F4S AMBASSADORS ) ແລະ ຈະໄດ້ຮຽນຮູ້ທັກສະການຫລິ້ນກິລາບານເຕະ ເພື່ອກ້າວເປັນນັກກິລາອາຊີບໃນຕໍ່ຫນ້າ.

  ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ກ່າວວ່າ: ຂໍສະແດງຄວາມຂອບໃຈມາຍັງ ສະຫະພັນບານເຕະນາໆຊາດ ຫຼື ຟີຟາ ທີ່ໄດ້ໃຫ້ການສະຫນັບສະຫນູນຊ່ວຍເຫລືອໂຄງການບານເຕະໃນໂຮງຮຽນ FIFA FOOTBALL FOR SCHOOLS ຊຶ່ງໄດ້ສ້າງເງື່ອນໄຂໃຫ້ກັບບັນດາເຍົາວະຊົນໃຫ້ເຂົ້າເຖິງການຫລິ້ນກິລາບານເຕະພາຍໃນໂຮງຮຽນ ທັງນີ້ກໍເສີມສ້າງຄວາມເຂັ້ມແຂງທາງສະມາທິ, ທາງດ້ານກຳລັງເຫື່ອແຮງ ເພາະວ່າການຫລິ້ນກິລາຊ່ວຍໃຫ້ສຸຂະພາບແຂງແຮງ ເຊິ່ງເປັນປັດໃຈຕົ້ນຕໍອັນຫນຶ່ງທີ່ຊ່ວຍໃຫ້ມີຊິວິດທີ່ສົດໃສ ກໍຄືເປັນກຳລັງແຮງໃຫ້ເຮົາໄດ້ເຂົ້າໂຮງຮຽນ, ສຳລັບຈຸດປະສົງທີ 2 ໄດ້ໃຫ້ຄູອາຈານ ຄູພາລະສຶກສາ ໄດ້ຮຽນຮູ້ກ່ຽວກັບພາກທິດສະດີ ແລະ ພາກປະຕິບັດຕົວຈິງໃນການສິດສອນກິລາບານເຕະໃຫ້ຖືກວິທີ ເຊິ່ງໂຄງການ FIFA FOOTBALL FOR SCHOOLS ເຊິ່ງໄດ້ສອດຄ່ອງກັບນະໂຍບາຍການພັດທະນາກິລາ ໂດຍສະເພາະແມ່ນກິລາບານເຕະຢູ່ໃນ ສປປລາວ ແລະ ຂ້າພະເຈົ້າຫວັງວ່າທັງຄູຝຶກ ແລະ ນັກກິລາ ຈະເອົາໃຈໃສ່ຮ່ວມໃນກິດຈະກຳດັ່ງກ່າວນີ້ ເພື່ອສ້າງເງື່ອນໄຂໃຫ້ກາຍເປັນນັກກິລາດີເດັ່ນທີ່ພອນສະຫວັນ ເພື່ອສະຫນອງໃຫ້ກັບ ທີມຊາດລາວ ໃນທຸກຮຸ່ນອາຍຸ ໃນອະນາຄົດນີ້.

  ໂຄງການກິລາບານເຕະໃນໂຮງຮຽນ FIFA FOOTBALL FOR SCHOOLS ຈັດຂຶ້ນໃນຫລາຍປະເທດ ເຊິ່ງໄດ້ເນັ້ນຢໍ້າຕື່ມວ່າ ໂຄງການດັ່ງກ່າວ ບໍ່ພຽງແຕ່ຝຶກແອບບານເຕະໃຫ້ນັກຮຽນເທົ່ານັ້ນ ແຕ່ຍັງຈະສອນໃຫ້ເຂົາເຈົ້າໄດ້ຮັບຮູ້ເຖິງທັກສະການໃຊ້ຊີວິດອີກດ້ວຍ. ທ່ານຫວັງຢ່າງຍິ່ງວ່າ ຜູ້ເຂົ້າຮ່ວມຈະນຳເອົາຄວາມຮູ້ໃນການເຂົ້າຮ່ວມໃນຄັ້ງນີ້ ເພື່ອໄປພັດທະນາ ໂຮງຮຽນຂອງຕົນເອງ ໄປສິດສອນບານເຕະໃຫ້ ກັບບັນດາເຍົາວະຊົນ. ສຳລັບໂຄງການດັ່ງກ່າວຖືວ່າເປັນໂຄງການໄລຍະຍາວ ແລະ ການເປັນຮ່ວມມືລະຫວ່າງ ສະຫະພັນບານເຕະນາໆຊາດ ຫຼື ຟີຟາ ຮ່ວມມືກັບ ສະຫະພັນບານເຕະແຫ່ງຊາດລາວ ແລະ ກົມກິລາມວນຊົນ, ພະລະ ແລະ ສິລະປະ ເພື່ອພັດທະນາບານເຕະລະດັບເຍົາວະຊົນ.

ທ່ານ ນ. ຟັດມາ ຊາມູຣາ ( Fatma Samba Diouf Samoura ) ເລຂາທິການ ສະຫະພັນບານເຕະນາໆຊາດ(FIFA) ພ້ອມດ້ວຍຄະນະ ໄດ້ເດີນທາງຢ້ຽມຢາມສໍານັກງານສະຫະພັນບານເຕະແຫ່ງຊາດລາວ ໃນຕອນເຊົ້າ ວັນທີ29 ພະຈິກ 2023,ໂດຍໃຫ້ກຽດຕ້ອນຮັບຈາກທ່ານ ວີເພັດ ສິຫາຈັກຣ ປະທານ ສະຫະພັນບານເຕະແຫ່ງຊາດລາວ ພ້ອມດ້ວຍທ່ານ ນ. ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດລາວ ແລະ ທ່ານ ຈັນທະວົງ ສິລິມະໂນທຳ ຮອງເລຂາທິການ ສະຫະພັນບານເຕະແຫ່ງຊາດລາວ.

ການມາຢ້ຽມຢາມຂອງທ່ານ ນ. ຟັດມາ ຊາມູຣາພ້ອມຄະນະຄັ້ງນີ້ແມ່ນຕອບສະໜອງຕາມການເຊີນຂອງຄະນະນຳສະຫະພັນບານເຕະແຫ່ງຊາດລາວ,ເພື່ອຈຸດປະສົງເຂົ້າຮ່ວມພິທີເປີດໂຄງການກິລາບານເຕະໃນໂຮງຮຽນ FIFA FOOTBALL FOR SCHOOLS ໂດຍຈະເປີດຢ່າງເປັນທາງການໃນຕອນເຊົ້າ ວັນທີ 30 ພະຈິກ 2023 ຢູ່ທີ່ສູນຝຶກຈໍາປີ - ຈໍາປາຂອງສະຫນາມກິລາແຫ່ງຊາດລາວ.

  ໂຄງການດັ່ງກ່າວເປັນໂຄງການຮວ່ມມືໄລຍະຍາວລະຫວ່າງ ສະຫະພັນບານເຕະນາໆຊາດ ຫຼື FIFA ກັບສະຫະພັນບານເຕະແຫ່ງຊາດລາວ ແລະ ກົມກິລາມວນຊົນ, ພະລະ ແລະ ສິລະປະຂອງກະຊວງສຶກສາທິການແລະກິລາ ເພື່ອເປົ້າໝາຍພັດທະນາບານເຕະລະດັບເຍົາວະຊົນລາວໃຫ້ກ້າວສູ່ລະດັບພາກພື້ນແລະສາກົນ.

ສະຫະພັນບານເຕະນາໆຊາດຮ່ວມກັບສະຫະພັນບານເຕະແຫ່ງຊາດລາວ(ສຕລ)ໄດ້ຈັດພິທີເປີດຝຶກອົບຮົມບານເຕະໃນໂຮງຮຽນ FIFA FOOTBALL FOR SCHOOLS ຂື້ນໃນວັນທີ 28 ພະຈິກ 2023 ທີ່ໂຮງແຮມ ແລນມາກ ໂດຍເປັນກຽດເຂົ້າຮ່ວມຂອງ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ, ທ່ານ ນາງ ຟາຕີມາຕາ ໂຊ ຊີດີເບ່ Fatimata Sow Sidibe ຫົວຫນ້າໂຄງການກິລາບານເຕະໃນໂຮງຮຽນ,ຜູ້ຕາງຫນ້າກະຊວງສຶກສາທິການ ແລະ ກິລາ ພ້ອມດ້ວຍບັນດາຄູອາຈານທີ່ສິດສອນວິຊາພະລາສຶກສາຈຳນວນ 80 ທ່ານ ຈາກ 80 ໂຮງຮຽນທົ່ວນະຄອນຫຼວງວຽງຈັນ ເຂົ້າຮ່ວມ.

ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ກ່າວເປີດພິທີວ່າ:ສຳລັບການຝຶກອົບຮົມກິລາບານເຕະໃນໂຮງຮຽນໃນໂຄງການດັ່ງກ່າວນີ້ແມ່ນມີຈຸດປະສົງສົ່ງເສີມໃຫ້ນັກຮຽນ ໄດ້ເຂົ້າເຖິງການຫລິ້ນກິລາບານເຕະພາຍໃນໂຮງຮຽນຫລາຍຂຶ້ນ ແລະ ໄດ້ຮັບການຝຶກແອບຢ່າງຖືກວິທີ ສອນໂດຍຄູອາຈານພາລະສຶກສາພາຍໃນໂຮງຮຽນ ເພື່ອເປັນຕົວແບບ ແລະເປັນອີກໂຄງການໜຶ່ງສຳລັບປີຕໍ່ໆໄປ, ພາຍຫຼັງການຝຶກອົບຮົມສຳເລັດລົງ,ພວກເຮົາຈະໄດ້ມີພິທີເປີດພິທີໂຄງການ ກິລາບານເຕະໃນໂຮງຮຽນ FIFA FOOTBALL FOR SCHOOLS ໃນວັນທີ 30 ພະຈິກ 2023.

 ສະຫະພັນບານເຕະແຫ່ງຊາດລາວຍາມໃດກໍໄດ້ເອົາໃຈໃສ່ ແລະ ໃຫ້ຄວາມສຳຄັນໃນການພັດທະນາບານເຕະຂັ້ນພື້ນຖານໃຫ້ແກ່ນັກຮຽນ,ເຊິ່ງທີ່ຜ່ານມາ ໄດ້ມີການລົງເຮັດກິດຈະກຳບານເຕະຂັ້ນພື້່ນຖານ ແລະ ຈັດຝຶກອົບຮົມຄູຝຶກລະດັບ D ໃນທຸກໆແຂວງທົ່ວປະເທດ. ສໍາລັບໂຄງການນີ້ແມ່ນຈະສຸມໃສ່ການພັດທະນາບານເຕະໃນໂຮງຮຽນເປັນຫຼັກ ໂດຍແມ່ນບັນດານັກຮຽນ ແລະ ຄູພາລະເປັນເປົ້າຫມາຍຫລັກຂອງໂຄງການດັ່ງກ່າວ.

ທ່ານ ນາງ ຟາຕີມາຕາ ໂຊ ຊີດີເບ(Fatimata Sow Sidibe) ຫົວຫນ້າ ໂຄງການກິລາບານເຕະໃນໂຮງຮຽນ ໄດ້ກ່າວວ່າ ຮູ້ສຶກເປັນກຽດທີ່ໄດ້ມາປະເທດລາວແລະໄດ້ເຂົ້າຮ່ວມຝຶກອົບຮົມກິລາບານເຕະໃນໂຮງຮຽນ FIFA FOOTBALL FOR SCHOOLS ເຊິ່ງໂຄງການດັ່ງກ່າວໄດ້ຈັດຂຶ້ນໃນຫລາຍປະເທດ.ທ່ານ ນາງ ຟາຕີມາຕາ ໂຊ ຊີດີເບ ກ່າວຢໍ້າຕື່ມວ່າ ໂຄງການນີ້ບໍ່ພຽງແຕ່ຝຶກແອບບານເຕະໃຫ້ນັກຮຽນເທົ່ານັ້ນ, ແຕ່ຍັງຈະສອນໃຫ້ເຂົາເຈົ້າໄດ້ຮັບຮູ້ເຖິງທັກສະການໃຊ້ຊີວິດອີກດ້ວຍ.ຫວັງຢ່າງຍິ່ງວ່າ ຜູ້ເຂົ້າຮ່ວມຈະນຳເອົາຄວາມຮູ້ໃນການເຂົ້າຮ່ວມໃນຄັ້ງນີ້ ເພື່ອໄປພັດທະນາ ໂຮງຮຽນຂອງຕົນເອງ ໄປສິດສອນບານເຕະໃຫ້ ກັບບັນດາເຍົາວະຊົນແລະສະແດງຄວາມຊົມເຊີມມາຍັງ ສຕລ ທີ່ສາມາດສ້າງແຜນຍຸດທະສາດພັດທະນາກິລາບານເຕະຍິງ ແລະ ຈັດການແຂ່ງຂັນລາວລີກຍິງ ເປັນຄັັ້ງທໍາອິດ.

  ການຝຶກອົບຮົມດັ່ງກ່າວແມ່ນຈະດຳເນີນໄປເປັນເວລາ 2 ມື້ນັບຕັ້ງແຕ່ວັນທີ 28 – 29 ພະຈິກ 2023 ເຊິ່ງລວມມີພາກທິດສະດີ ແລະພາກປະຕິບັດຕົວຈິງຢູ່ທີ່ສະຫນາມ, ແລະ ຈະໄດ້ເປີດພີທີໂຄງການ FIFA FOOTBALL FOR SCHOOLS ໃນວັນທີ 30 ພະຈິກ 2023.

ສຳລັບໂຄງການດັ່ງກ່າວຖືວ່າເປັນໂຄງການໄລຍະຍາວ ແລະເປັນໂຄງການຮ່ວມມືລະຫວ່າງ ສະຫະພັນບານເຕະນາໆຊາດ(FIFA)ກັບ ສະຫະພັນບານເຕະແຫ່ງຊາດລາວ ແລະ ກົມກິລາມວນຊົນ, ພະລະ ແລະ ສິລະປະ ເພື່ອພັດທະນາບານເຕະລະດັບເຍົາວະຊົນຂອງສປປລາວ.