ການແຂ່ງຂັນກິລາເຕະບານ ສະຫວັນນະເຂດ ລາວລີກ 2 ປະຈໍາປີ 2024 ໄດ້ດຳເນີນມາແຕ່ວັນທີ 8 ມິຖຸນາ 2024 ເປັນຕົ້ນມາ, ທີ່ສະໜາມກິລາແຂວງ ຫຼັກ 4, ໂດຍມີ 8 ທີມເຂົ້າຮ່ວມຊີງໄຊ ປະກອບມີ: ສະຫວັນ ຢູໄນເຕັດ, ອີໂວ້ ສະຫວັນ, ເຮືອເຫຼັກ, ໂພໄຊນ້ອຍ, ຮາຢີນາ, ເຊໂນ, ດັກວູ໋ບ ແລະ ມະຫາວິທະຍາໄລສະຫວັນນະເຂດ.

     ການແຂ່ງນັດສຸດທ້າຍໄດ້ມີຂຶ້ນ ວັນທີ 14 ກັນຍາ 2024 ທີ່ສະຫນາມ ກິລາແຂວງ ຫຼັກ 4 ໂດຍຄູ່ສຸດທ້າຍ ເປັນການພົບກັນລະຫວ່າງ ສະຫວັນ ຢູໄນເຕັດ ທີມອັນດັບ 1 ພົບ ເຮືອເຫຼັກທີມອັນດັບ2 . ຜ່ານການແຂ່ງຂັນຜົນປະກົດວ່າ ສະຫວັນ ຢູໄນເຕັດ ເອົາຊະນະ ເຮືອເຫຼັກ 4-0 ຄວ້າແຊ້ມສະໄຫມທີ 2 ລາວລີກ 2 ແຂວງສະຫວັນນະເຂດ ໄປຄອງ ຕໍ່ຈາກປີ 2023.

     ສະຫລຸບ ຕາຕະລາງຄະແນນ ສະຫວັນ ຢູໄນເຕັດ ແຂ່ງຂັນ 14 ນັດ ຊະນະ 13 ນັດ ເສຍ 1 ນັດ ມີ 39 ຄະແນນ ໄດ້ຮັບຂັນແຊ້ມ,ຫລຽນ ແລະ ເງິນ 20 ລ້ານກີບ, ອັນດັບ 2 ເຮືອເຫຼັກ ແຂ່ງ 14 ນັດ ຊະນະ 12 ເສຍ 2 ນັດ ມີ 36 ຄະແນນ ໄດ້ຮັບເງິນ 12 ລ້ານ, ອັນດັບ 3 ອີໂວ ສະຫວັນ ໄດ້ຮັບເງິນ 7 ລ້ານ, ອັນດັບ 4 ດັກວຸ໋ບ , ອັນດັບ 5 ເຊໂນ, ອັນດັບ 6 ໂພໄຊນ້ອຍ , ອັນດັບ 7 ຮາຢີນາ ແລະ ອັນດັບ 8 ມະຫາວິທະຍາໄລສະຫວັນນະເຂດ , ອັນດັບ 4-8 ແມ່ນໄດ້ຮັບເງິນທີມລະ 2 ລ້ານກີບ. ຂະນະ ທີ່ລາງວັນປະເພດບຸກຄົນ ມີ 4ລາງວັນຄືຕົກເປັນຂອງສະໂມສອນ ສະຫວັນ ຢູໄນເຕັດ ທັງຫມົດ ຜູ້ຮັກສາປະຕູດີເດັ່ນ ສັນຕິສຸກ ນ້ອຍວິໄລ, ຄູຝຶກດີເດັ່ນ ທ່ານ ອຸລະ ນ້ອຍວິໄລ ພ້ອມດ້ວຍຄະນະຄູຝຶກ , ຜູ້ຍິງປະຕູສູງສຸດ ຈິດຕະກອນ ວໍລະເດດ ຍິງໄດ້ 23 ປະຕູ ແລະ ນັກກິລາດີເດັ່ນ ເອກກະໄມ ລາດຊະຈັກ.

     ເຂົ້າຮ່ວມພິທີປິດການແຂ່ງຂັນມີ ທ່ານ ຄຳໄພ ປຣະເສີດ ຮອງປະທານ ສະຫະພັນບານເຕະແຫ່ງຊາດລາວ, ທ່ານ ທ່ອນແກ້ວ ພຸດທະໄກຍະລາດ ປະທານກິດຕິມະສັກ ສະຫະພັນບານເຕະແຂວງສະຫວັນນະເຂດ , ທ່ານ ໄພສານ ຈັນສີນາ ປະທານສະຫະພັນບານເຕະແຂວງສະຫວັນນະເຂດ ພ້ອມດ້ວຍແຂກຖືກເຊີນ, ສື່ມວນຊົນ ແລະ ແຟນບານເຂົ້າຮ່ວມ.

     ສຳລັບສະໂມສອນ ສະຫວັນ ຢູໄນເຕັດ ຊະນະເລີດ ສະຫວັນນະເຂດ ລີກ 2 ແມ່ນໄດ້ຮັບສິດເຂົ້າຮ່ວມການແຂ່ງຂັນ ຊິງຂັນພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ລະດູການ 2024/25 ເຊິ່ງຈະເລີ່ມການແຂ່ງຂັນໃນທ້າຍປີ 2024 ນີ້.

ການແຂ່ງຂັນກິລາເຕະບານລາວລີກ 2 ປະຈໍາປີ 2024 ແມ່ນໄດ້ດຳເນີນການແຂ່ງຂັນ ນັບຕັ້ງແຕ່ວັນທີ 8 ມິຖຸນາ 2024 ເປັນຕົ້ນມາທີ່ສະໜາມກິລາແຂວງສະຫວັນນະເຂດ (ຫຼັກ 4) ໂດຍມີ 8 ທີມເຂົ້າຮ່ວມຊີງໄຊ ປະກອບມີເຮືອເຫຼັກ ເອັບຊີ, ສະຫວັນ ຢູໄນເຕັດ, ໂພໄຊນ້ອຍ, ຮາຢີນາ, ມະຫາວິທະຍາໄລສະຫວັນນະເຂດ, ເຊໂນ, ອີໂວ້ ແລະ ດັກວູ໋ບ. ສະຫລຸບຕາຕະລາງ ຄະແນນ ຮອບຂາໄປ ສະຫວັນ ຢູໄນເຕັດ ລົງສະຫນາມ 7 ນັດ ຊະນະ 6 ນັດ ເສຍ 1 ນັດ ມີ 18 ຄະແນນ, ອັນດັບ 2 ເຮືອເຫລັກ ລົງສະຫນາມ 7 ນັດ ຊະນະ 6 ນັດ ເສຍ 1 ນັດ ມີ 18 ຄະແນນ, ອັນດັບ 3 ອີໂວ ລົງສະຫນາມ 7 ນັດ ຊະນະ 5 ນັດ ເສຍ 2 ນັດ ມີ 15 ຄະແນນ, ອັນດັບ 4 ເຊໂນ ລົງສະຫນາມ 7 ນັດ ຊະນະ 3 ນັດ ສະເຫມີ 1 ນັດ ເສຍ 3 ນັດ ມີ 10 ຄະແນນ, ອັນດັບ 5 ດັກວຸ໋ບ ລົງສະຫນາມ 7 ນັດ ຊະນະ 2 ນັດ ສະເຫມີ 2 ນັດ ເສຍ 3 ນັດ ມີ 8 ຄະແນນ, ອັນດັບ 6 ໂພໄຊນ້ອຍ ລົງສະຫນາມ 7 ນັດ ຊະນະ 1 ນັດ ສະເຫມີ 2 ນັດ ເສຍ 4 ນັດ ມີ 5 ຄະແນນ, ອັນດັບ 7 ຮາຢີນາ ລົງສະຫນາມ 7 ນັດ ສະເຫມີ 4 ນັດ ເສຍ 3 ນັດ ມີ 4 ຄະແນນ ແລະ ອັນດັບ ສຸດທ້າຍ ມະຫາວິທະຍາໄລສະຫວັນນະເຂດ ລົງສະຫນາມ 7 ນັດ ສະເຫມີ 1 ນັດ ເສຍ 6 ນັດ ມີ 1 ຄະແນນ. ໃນຂະນະ ທີ່ນັກເຕະທີ່ຍິງປະຕູສູງສຸດອັນດັບ 1 ໄດ້ແກ່ຈິດຕະກອນ ວໍລະເດດ ຈາກ ສະຫວັນ ຢູໄນເຕັດ ຍິງໄດ້ 9 ປະຕູ ແລະ ອັນດັບ 2 ສຸລິສັກ ຈາກ ອີໂວ ຍິງໄດ້ 8 ປະຕູ. ສຳລັບຕາຕະລາງການແຂ່ງຂັນຮອບຂາກັບແມ່ນຈະແຂ່ງຂັນໃນວັນທີ 27 ກໍລະກົດ 2024 ເວລາ 14:00 ດັກວຸ໋ບ ພົບ ເຮືອເຫຼັກ , ເວລາ 16:30 ອີໂວ ພົບ ສະຫວັນ ຢູໄນເຕັດ ແລະ ວັນອາທິດ 28 ກໍລະກົດ 2024 ເວລາ 14:00 ເຊໂນ ພົບ ໂພໄຊນ້ອຍ ແລະ ເວລາ 16:30 ມະຫາວິທະຍາໄລສະຫວັນນະເຂດ ພົບ ຮາຍີນາ ທຸກໆຄູ່ແມ່ນແຂ່ງຂັນຢູ່ທີ່ສະຫນາມກິລາແຂວງສະຫວັນນະເຂດ.

                   ສະຫະພັນກິລາບານເຕະ ແຂວງສະຫວັນນະເຂດ ໄດ້ຈັດກອງປະຊຸມປຶກສາຫາລືດ້ານອະນຸກໍາມະການຄວາມຮັບຜິດຊອບແຕ່ລະໜ້າວຽກຮ່ວມກັບຄະນະຄູຝືກທີ່່ຈະສົ່ງທີມເຂົ້າຮ່ວມແຂ່ງຂັນກິລາເຕະບານລາວລີກ 2 ປະຈໍາປີ 2024 ໃນວັນທີ 5 ມີຖຸນາ ຜ່ານມາ ໂດຍການເປັນປະທານຂອງທ່ານ ໄພສານ ຈັນສີນາ ປະທານສະຫະພັນບານເຕະແຂວງສະຫວັນນະເຂດ, ມີທ່ານ ສົມສິດ ຫວັນນະບົວທອງ ຕາງໜ້າພະແນກສຶກສາທິການ ແລະ ກິລາແຂວງ, ພ້ອມດ້ວຍກໍາມະການຕັດສິນ, ຄະນະຄູຝຶກເຂົ້າຮ່ວມ.

                  ການຈັດກອງປະຊຸມໃນຄັ້ງນີ້, ແມ່ນເພື່ອກະກຽມຄວາມພ້ອມດ້ານຕ່າງໆໃຫ້ແກ່ການແຂ່ງຂັນກິລາເຕະບານລາວລີກ 2 ປະຈໍາປີ 2024 ຊຶ່ງຈະຈັດຂຶ້ນໃນວັນທີ 8 ມິຖຸນາ 2024 ທີ່ສະໜາມກິລາແຂວງສະຫວັນນະເຂດ (ຫຼັກ 4).

              ໃນກອງປະຊຸມ, ທ່ານ ສຸພີ ເຄືອບມະວົງ ອະນຸກໍາມະການຈັດງານແຂ່ງຂັນກິລາເຕະບານລາວລີກ 2 ປະຈໍາປີ 2024 ໄດ້ຜ່ານຮ່າງກົດລະບຽບຕ່າງໆໃຫ້ກັບຄະນະຄູຝຶກແຕ່ລະທີມທີ່ຈະເຂົ້າຮ່ວມແຂ່ງຂັນໄດ້ຮັບຊາບ ພ້ອມພາກັນຈັດຕັ້ງປະຕິບັດໃຫ້ປະກົດເປັນຈິ່ງ. ນອກຈາກນັ້ນ, ຄະນະຄູຝຶກແຕ່ລະທີມໄດ້ຜັດປ່ຽນກັນປະກອບຄໍາເຫັນຕ່າງໆເຂົ້າໃສ່ຮ່າງກົດລະບຽບໃຫ້ໜັກແໜ້ນກ່າວເກົ່າຕື່ມອີກ.

               ໂອກາດດັ່ງກ່າວ, ທ່ານ ປະທານ ໄດ້ຜັດປ່ຽນກັນໃຫ້ຄຳຄິດຄຳເຫັນ ປຶກສາຫາລື ເພື່ອຈະເຮັດໃຫ້ງານແຂ່ງຂັນກິລາເຕະບານລາວລີກ 2 ປະຈໍາປີ 2024 ຄັ້ງນີ້ ສຳເລັດລຸລ່ວງໄປດ້ວຍດີ. ດັ່ງນັ້ນ, ຈຶ່ງເປັນສິ່ງທ້າທາຍຫຼາຍດ້ານໃນງານຄັ້ງນີ້້ ໂດຍເນັ້ນໜັກໃຫ້ບັນດາຄະນະກຳມະການຕັດສິນ ແລະ ຄະນະຄູຝຶກໃນແຕ່ລະທີມທີ່ເຂົ້າຮ່ວມການແຂ່ງຂັນ ຕ້ອງປະຕິບັດກົດລະບຽບໂມງເວລາໃນການລົງແຂ່ງຂັນໃຫ້ທ່ວງທັນທຸກໆຄັ້ງ ແລະ ຂໍໃຫ້ທຸກຄົນເປັນເຈົ້າການຕື່ມອີກ.

                 ສໍາລັບການແຂ່ງຂັນກິລາເຕະບານລາວລີກ 2 ປະຈໍາປີ 2024 ແມ່ນຈະຈັດຂຶ້ນໃນວັນທີ 8 ມິຖຸນາ 2024 ທີ່ສະໜາມກິລາແຂວງສະຫວັນນະເຂດ (ຫຼັກ 4) ໂດຍມີ 8 ທີມເຂົ້າຮ່ວມຊີງໄຊ ປະກອບມີ ເຮືອເຫຼັກ ເອັບຊີ, ສະຫວັນ ຢູໄນເຕັດ, ໂພໄຊນ້ອຍ, ຮາລີນ້າ, ມະຫາວິທະຍາໄລສະຫວັນນະເຂດ, ເຊໂນ, ອີໂວ້ ແລະ ດັບວູບ. ການແຂ່ງຂັນໃນຄັ້ງນີ້, ຄາດວ່າ ຈະສຳເລັດພາຍໃນເດືອນກໍລະກົດ 2024.