ກຳມະການຕັດສິນ

ການຝຶກອົບຮົມກໍາມະການຕັດສິນບານເຕະ

ຂ່າວສານກ່ຽວກັບ ກຳມະການຕັດສິນ

News Cover

ຝຶກອົບຮົມກໍາມະການຕັດສິນຟຸດຊໍ ກຽມພ້ອມຮັບໃຊ້ການແຂ່ງຂັນ ລາວ ຟຸດຊໍລີກ 2024

28/02/2024

        ສະຫະພັນບານເຕະແຫ່ງຊາດລາວ( ສຕລ) ໄດ້ຈັດພິທີເປີດການຝຶກອົບຮົມຍົກລະດັບກຳມະການຕັດສິນ ຟຸດຊໍ ໃນຕອນເຊົ້າ ວັນທີ 28 ກຸມພາ 2024 ທີ່ຫ້ອງປະຊຸມ ສຕລ,ໂດຍໃຫ້ກຽດເຂົ້າຮ່ວມພິທີເປິດຂອງ ທ່ານ ຈັນທະວົງ ສິລິມະໂນທຳ ຮັກສາການເລຂາທິການສະຫະພັນບານເຕະແຫ່ງຊາດລາວ.

       ທ່ານ ຄຳປະສົງ ໄຊຍະວົງສີ ໄດ້ລາຍງານໃຫ້ຮູ້ວ່າ: ການຝຶກອົບຮົມໃນຄັ້ງນີ້ແມ່ນເພື່ອຈຸດປະສົງກຽມຄວາມພ້ອມໃຫ້ແກ່ການແຂ່ງຂັນລາວ ຟຸດຊໍ ລີກ 2024 ທີ່ຈະເປີດຂື້ນຢ່າງເປັນທາງການໃນວັນທີ 02 ມີນາ 2024 ນີ້. ໄລຍະການຝຶກອົບຮົມເປັນເວລາ 3 ມື້ (28 ກຸມພາ ຫາ 01 ມີນາ 2024) ຜູ້ເຂົ້າຮ່ວມ ແມ່ນຈະໄດ້ຮຽນຮູ້ທາງດ້ານກົດລະບຽບກະຕິກາໃໝ່ຂອງກິລາບານເຕະຟຸດຊໍ ທີ່ FIFAສະບັບປັບປຸງ ແລະ ມີການທົດສອບພາລະກຳລັງພ້ອມດ້ວຍ ມີການ ສອບເສັງຄວາມຮູ້ດ້ານທິດສະດີ.

       ກ່າວມີຄຳເຫັນໃນກອງປະຊຸມ,ທ່ານຈັນທະວົງ ສິລິມະໂນທຳໄດ້ຍົກໃຫ້ເຫັນຄວາມໝາຍແລະຄວາມສຳຄັນຂອງການຝຶກອົບຮົມແລະເນັ້ນໃຫ້ຜູ້ເຂົ້າຮວ່ມຕັ້ງໃຈໃນການຮຽນ,ພ້ອມປະຕິບັດລະບຽບຂອງການຮຽນໃຫ້ເຄ່ງຄັດ,ປາສຈາກຂໍ້ຜິດພາດທີ່ອາດຈະເກີດຂຶ້ນ ເພື່ອກຽມຄວາມພ້ອມຕັດສິນ ການແຂ່ງຂັນ ລາວ ຟຸດຊໍ ລີກ 2024 ທີ່ຈະເປີດຂຶ້ນໃນອາທິດນີ້ດວ້ຍຜົນສຳເລັດ.

       ເຂົ້າຮວ່ມໃນກອງປະຊຸມຍັງມີທ່ານ ໄຊປະເສີດ ພົງຊະນິດ ຫົວຫນ້າພະແນກກຳມະການຕັດສິນ ສຕລ, ທ່ານ ຄຳປະສົງ ໄຊຍະວິງ ຜູ້ຮັບຜິດຊອບກໍາມະການຕັດສິນຟຸດຊໍ ທັງເປັນຜູ້ຝຶກສອນ ພ້ອມດ້ວຍຜູ້ປະເມີນກໍາມະການຕັດສິນ ແລະ ສໍາມະນາກອນ 25 ທ່ານ.


News Cover

ພຸດສະຫວັນ ຈັນທະວົງ ຜູ້ຊ່ວຍຜູ້ຕັດສິນກິລາບານເຕະຍິງຂອງລາວ ໄດ້ຮັບເລືອກໄປຕັດສິນລະດັບອາຊີ

28/02/2024

           ທ່ານ ນາງ ພຸດສະຫວັນ ຈັນທະວົງໄດ້ກາຍເປັນກຳມະການຕັດສິນຍິງຄົນທຳອິດຂອງສປປລາວລາວທີ່ໄດ້ຖືກຄັດເລືອກໃຫ້ຮ່ວມຕັດສິນລາຍການລະດັບທະວີບອາຊີ.ຖືວ່າເປັນອີກໜຶ່ງຂ່າວດີ ແລະ ເປັນຄວາມພາກພູມໃຈຂອງຄົນລາວ ທີ່ຈະໄດ້ເຫັນບຸກຄະລາກອນທີ່ເປັນຄົນລາວ ໄດ້ຮັບກຽດຖືກເຊີນໄປຮ່ວມຕັດສິນລະດັບທະວີບອາຊີຄັ້ງທຳອິດ ເຊິ່ງ ທ່ານ ນາງ ພຸດສະຫວັນ ຈັນທະວົງ ຜູ້ຊ່ວຍກຳມະການຕັດສິນລະດັບຟີຟ້າ(FIFA)ຈາກສປປລາວ ຈະໄດ້ໄປຮ່ວມຕັດສິນການແຂ່ງຂັນເຕະບານຍິງ ຮຸ່ນອາຍຸບໍ່ເກີນ 20 ປີ(U20) ຊິງແຊ້ມອາຊີ 2024 ຮອບສຸດທ້າຍ ໃນລະຫວ່າງ ວັນທີ 3-16 ມີນາ 2024 ນີ້.


          ທ່ານ ນາງ ພຸດສະຫວັນ ຈັນທະວົງ ໃຫ້ຮູ້ຕື່ມວ່າ: ກ່ອນຈະຖືກຄັດເລືອກໄປຮ່ວມຕັດສິນຄັ້ງນີ້ ຕົນເອງຕ້ອງອົດທົນຝຶກຝົນຮຽນຮູ້ດ້ານວິຊາສະເພາະໜັກສົມຄວນ ໂດຍສະເພາະດ້ານພາສາອັງກິດ, ກົດກະຕິກາ, ພະລະກຳລັງ, ຈິດໃຈ ແລະ ການເຮັດວຽກເປັນທີມ ຖືວ່າຈະເປັນປະສົບການອັນໃໝ່ໃຫ້ກັບຕົນເອງ ເພື່ອຕໍ່ຍອດສູ່ການຕັດສິນລະດັບພາກພື້ນ ແລະ ສາກົນຕໍ່ໄປ.


         ສຳລັບປະສົບການຜ່ານມາຂອງ ພຸດສະຫວັນ ຈັນທະວົງ ເລີ່ມຕົ້ນດ້ວຍການເປັນນັກກິລາແລ່ນລານ, ຈາກນັ້ນໄດ້ຮັບການອົບຮົມ ຮຽນຮູ້ ເລື່ອງການເປັນກຳມະການຕັດສິນບານເຕະ, ເຄີຍຕັດສິນລາຍການຕ່າງໆພາຍໃນປະເທດ ລວມທັງລະດັບອາຊຽນ ແລະ ອາຊີ ຈຳນວນໜຶ່ງ, ໄດ້ຮັບໃບຢັ້ງຢືນການເປັນຜູ້ຊ່ວຍຜູ້ຕັດສິນລະດັບຟີຟ້າໃນປີ 2019.

         ການແຂ່ງຂັນເຕະບານຍິງ ຮຸ່ນອາຍຸບໍ່ເກີນ 20 ປີ ຊິງແຊ້ມອາຊີ 2024 ຮອບສຸດທ້າຍ ມີທີມເຂົ້າຮ່ວມທັງຫມົດ 8 ທີມ ປະກອບມີ: ອຸດເບກກິດສະຖານ, ໄຕ້ຫວັນ(ສປຈີນ), ສ.ເກົາຫລີ, ອົສຕຣາລີ, ຍີ່ປຸ່ນ, ສປປ ເກົາຫລີ, ສປຈີນ ແລະ ຫວຽດນາມ.


News Cover

ຝຶກອົບຮົມກຳມະການຕັດສິນຂັ້ນພື້ນຖານທີ່ເມືອງຄຳເກີດ

19/02/2024

               ສະຫະພັນບານເຕະແຫ່ງຊາດລາວ(ສຕລ)ຮ່ວມກັບ ສະຫະພັນບານເຕະແຂວງ ບໍລິຄໍາໄຊ ໄດ້ມີພິທີເປີດຝຶກອົບຮົມກຳມະການຕັດສິນຂັ້ນພື້ນຖານຂື້ນໃນຕອນເຊົ້າ ຂອງວັນທີ 19 ກຸມພາ 2024 ຢູ່ທີ່ຫ້ອງປະຊຸມ ຫ້ອງການສຶກສາທິການ ແລະ ກິລາ ເມືອງ ຄໍາເກີດ,ໃຫ້ກຽດເຂົ້າຮ່ວມຂອງ ທ່ານ ແສງທອງ ລໍມະນີ ຮອງຫົວຫນ້າຫ້ອງການສຶກສາ ແລະ ກິລາ ເມືອງຄໍາເກີດ.



              ໃນພິທີ ທ່ານ ໄຊປະເສີດ ພົງຊະນິດ ຫົວຫນ້າພະແນກກໍາມະການຕັດສິນ ສຕລໄດ້ ຂຶ້ນລາຍງານໃຫ້ຮູ້ວ່າ: ການຝຶກອົບຮົມໃນຄັ້ງນີ້ແມ່ນໂຄງການປະຈຳປີຂອງ ສະຫະພັນບານເຕະແຫ່ງຊາດລາວ, ເພື່ອເປັນການພັດທະນາທັກສະຄວາມຮູ້ຄວາມສາມາດທາງດ້ານທິດສະດີ ແລະ ການປະຕິບັດຕົວຈິງໃຫ້ແກ່ກຳມະການຕັດສິນ, ພ້ອມດຽວກັນນັ້ນ ຜູ້ເຂົ້າຮ່ວມຈະໄດ້ຮຽນຮູ້ກະຕິກາ ກິລາບານເຕະທີ່ມີການປັບປຸງໃໝ່ ປະຈຳປີ 2023 / 2024, ການຂຽນບົດລາຍງານຂອງກໍາມະການຕັດສິນໃຫ້ຖືກຕ້ອງຕາມຫລັກການຂອງ FIFA.


               ໃນໂອກາດກ່າວເປີດພິທີ, ທ່ານ ແສງທອງ ລໍມະນີ ໄດ້ກ່າວວ່າ: ການຝຶກອົບຮົມຄັ້ງນີ້ແມ່ນມີຄວາມສຳຄັນຕໍ່ການພັດທະນາກຳມະການຕັດສິນຢູ່ທີ່ເມືອງ ຄໍາເກີດ ເພື່ອຕອບສະໜອງໃນການແຂ່ງຂັນກິລາບານເຕະໃນຂອບເຂດຕົວເມືອງທີ່ນັບມື້ມີການຂະຫຍາຍຕົວແລະຟົດຟື້ນຂຶ້ນເລື້ອຍໆ.ແຕ່ຍ້ອນເວລາໃນການຝຶກອົບຮົມສັ້ນ,ດັ່ງນັ້ນ,ຈິ່ງຮຽກ ຮ້ອງໃຫ້ທຸກຄົນຈົ່ງເອົາໃຈໃສ່ຕັ້ງໜ້າຮຽນ,ຈົດຈຳເອົາຄວາມຮູ້ທາງທິດສະດີ ແລະ ພາກປະຕິບັດຕົວຈິງ ເພື່ອໄປຍົກລະດັບຕົນເອງໃຫ້ສູງເທົ່າທີ່ຈະສູງໄດ້.ການຝຶກອົບຮົມຄັ້ງນີ້ແມ່ນໃຊ້ເວລາ 5 ມື້ ເຊິ່ງເລີ່ມແຕ່ວັນທີ 19-23 ກຸມພາ 2024.


               ເຂົ້າຮວ່ມກອງປະຊຸມນີ້,ຍັງມີທ່ານ ຄໍາປະສົງ ໄຊຍະວົງສີ ວິຊາການພະແນກກຳມະການຕັດສິນ ສຕລ, ທ່ານ ກິຫຼ້າ ລາດຊະວົງ ວິຊາການພະແນກກຳມະການຕັດສິນ ສຕລ, ພ້ອມດວ້ຍນັກສຳມະນາກອນທັງຫມົດ 25 ທ່ານ, ຍິງ 2 ທ່ານທີ່ ມາຈາກຂອບເຂດຕົວເມືອງ ຄໍາເກີດ.


News Cover

ຈັດຝຶກອົບຮົມກຳມະການຕັດສິນຂັ້ນພື້ນຖານຢູ່ເມືອງສິງ

12/02/2024

ສະຫະພັນບານເຕະແຫ່ງຊາດລາວ(ສຕລ)ຮ່ວມກັບ ສະຫະພັນບານເຕະແຂວງຫຼວງນ້ຳທາຈັດຝືກອົບຮົມກຳມະການຕັດສີນ ຂັ້ນພື້ນຖານ ທີ່ເມືອງສີງ ແຂວງຫລວງນໍ້າທາ ເມື່ອວັນທີ 12 ກຸມພາ 2024 ,ເຊິ່ງໃຫ້ກຽດເຂົ້າຮວ່ມພິເປີດຝືກອົບຮົມໂດຍທ່ານ ວັນດິ ພົມທອງ ຮອງປະທານແນວລາວສ້າງຊາດແຂວງ, ຮອງປະທານສະຫະພັນບານເຕະແຂວງ,ທ່ານ ໄຊປະເສີດ ພົງຊະນິດ ຫົວຫນ້າພະແນກກຳມະການຕັດສີນ ຈາກ ສຕລ, ທ່ານ ທອງປະເສີດ ພອນສີຣິຍະວົງ ຫົວຫນ້າຫ້ອງການນິຕິກໍາ ສຕລ, ທ່ານ ຄໍາຕັນ ສີງດາວເຮືອງ ຮອງຫົວຫນ້າຫ້ອງການສືກສາທິການ ແລະ ກິລາເມືອງສີງ,ພ້ອມດ້ວຍທີມງານນັກສຳມະນາກອນເຂົ້າຮ່ວມທັງຫມົດ 25 ທ່ານທີ່ມາຈາກຫ້ອງການສືກສາທິການແລະກິລາເມືອງສີງ ແລະ ຈາກໂຮງຮຽນອ້ອມຂ້າງເມືອງ.

 ການຝືກອົບຮົມຄັ້ງນີ້ ແມ່ນໃຊ້ເວລາ 5 ວັນນັບຕັ້ງແຕ່ວັນທີ 12-16 ກຸມພາ 2024 ຈຶ່ງຈະສຳເລັດ, ,ໂດຍສຳມະກອນຈະໄດ້ຮຽນຮູ້ທາງດ້ານທິດສະດີ ແລະພາກປະຕິບັດຕົວຈິງແລະຕະຫຼອດການຝຶກອົບຮົມສຳມະກອນທີ່ມີຜົນງານດີເດ່ນຈະມີໂອກາດໄດ້ຖືກຄັດເລືອກໃຫ້ເຂົ້າຮວ່ມຕັດສິນການແຂ່ງຂັນລາຍການຕ່າງໆທີ່ທາງ ສະຫະພັນບານເຕະແຂວງຫຼວງນ້ຳທາຈັດຂຶ້ນ.

 ໂອກາດກ່າວເປີດພິທີ, ທ່ານ ຄໍາຈັນ ສິງດາວເຮືອງ ຮອງຫົວຫນ້າ ສຶກສາທິການ ແລະ ກິລາ ເມືອງ ສິງ, ໄດ້ກ່າວວ່າ ການຝຶກອົບຮົມຄັ້ງນີ້ແມ່ນມີເວລາສັ້ນດັ່ງນັ້ນ,ຮຽກຮ້ອງໃຫ້ທຸກຄົນຈົ່ງເອົາໃຈໃສ່ຕັ້ງໜ້າຮຽນເອົາຄວາມຮູ້ທາງທິດສະດີ ແລະ ພາກປະຕິບັດຕົວຈິງ ເພື່ອໄປຍົກລະດັບຕົວເອງໃຫ້ສູງເທົ່າທີ່ຈະສູງໄດ້

 ເຂົ້າຮວ່ມກອງປະຊຸມນີ້,ຍັງມີທ່ານ ຄໍາປະສົງ ໄຊຍະວົງສີ ວິຊາການພະແນກກຳມະການຕັດສິນ ສຕລ, ທ່ານ ສອນສິນ ຈັນທະວົງສາ ເລຂາທິການ ສະຫະພັນບານເຕະແຂວງ ຫລວງນໍ້າທາ.

News Cover

ສຕລ ຈັດຝຶກອົບຮົມຜູ້ປະເມີນກໍາມະການຕັດສິນ( LFF REFEREE ASSESSOR COURSE )

22/01/2024

ສະຫະພັນບານເຕະແຫ່ງຊາດລາວ(ສຕລ)ໄດ້ຈັດພິທີເປີດຝຶກອົບຮົມຜູ້ປະເມີນກໍາມະການຕັດສິນ( LFF REFEREE ASSESSOR COURSE )ຂື້ນໃນຕອນເຊົ້າ ຂອງວັນທີ 22 ມັງກອນ 2024 ຢູ່ທີ່ຫ້ອງປະຊຸມຂອງສຕລ,ເຊິ່ງໃຫ້ກຽດເຂົ້າຮ່ວມຂອງທ່ານ ນາງ ກັນຍາ ແກ້ວມະນີ ເລຂາທິີການ ສຕລ , ທ່ານ ໂມຮາແມັດ ໂຣຊາຣີ ບິນຢາຄອບ (MOHAMAD RODZALI BIN YACOB) ຫົວໜ້າອະນຸກຳມະການພັດທະນາກໍາມະການຕັດສິນສະຫະພັນບານເຕະນາໆຊາດ(FIFA).
  ໃນພິທີ ທ່ານ ໄຊປະເສີດ ພົງສະນິດ ຫົວໜ້າພະແນກກໍາມະການຕັດສິນ ສຕລ ໄດ້ຂຶ້ນລາຍງານວ່າ:ການຝຶກອົບຮົມໃນຄັ້ງນີ້ແມ່ນມີຈຸດປະສົງເພື່ອພັດທະນາ ແລະ ຍົກລະດັບຜູ້ປະເມີນກໍາມະການຕັດສິນຂອງ ສຕລ ໃຫ້ກ້າວໄປສູ່ລະດັບສາກົນ, ເພື່ອຮຽນຮູ້ພາລະບົດບາດການປະຕິບັດໜ້າທີ່ຂອງຜູ້ປະເມີນກໍາມະການຕັດສິນ,ທັງເປັນການຄັດເລືອກຜູ້ທີ່ມີເງື່ອນໄຂຄົບຖ້ວນ ເພື່ອເປັນຜູ້ປະເມີນຂອງ ສຕລປະຈຳປີ 2024.
  ໃນໂອກາດກ່າວເປີດພິທີ, ທ່ານ ນາງ ກັນຍາ ແກ້ວມະນີ ເລຂາທິການ ສຕລ ໄດ້ກ່າວວ່າ: ການຝຶກອົບຮົມຄັ້ງນີ້ ເປັນຄັ້ງທີ່ສໍາຄັນ ຊຶ່ງວຽກງານການພັດທະນາຍົກລະດັບກຳມະການຕັດສິນເປັນວຽກທີ່ມີຄວາມທ້າທາຍ ແລະສໍາຄັນຫຼາຍ, ດັ່ງນັ້ນ ຈຶ່ງຮຽກຮ້ອງໃຫ້ທຸກທ່ານຈົ່ງເອົາໃຈໃສ່ຕັ້ງໜ້າຮຽນຮູ້ຜ່ານການຝຶກອົບຮົມຄັ້ງນີ້ ເພື່ອພັດທະນາຍົກລະດັບຕົນເອງໃຫ້ກ້າວໄປເປັນຜູ້ປະເມີນກໍາມະການຕັດສິນໃນລະດັບສາກົນ.
  ການຝຶກອົບຮົມຄັ້ງນີ້ຈະນໍາໃຊ້ເວລາ 5 ວັນ ເລີ່ມວັນທີ 22-26 ມັງກອນ 2024ຈຶ່ງຈະສິ້ນສຸດ, ເຂົ້າຮວ່ມກອງປະຊຸມນີ້,ຍັງມີທ່ານ ສົມສະນຸກ ລຽນສະຫວັນ ຮອງເລຂາທິການ ສຕລ,ທ່ານ ທອງປະເສີດ ພອນສິຣິຍະວົງ ຫົວຫ້ອງການນິຕິກຳ ສຕລ ພ້ອມດວ້ຍນັກສຳມະນາກອນທັງຫມົດ 25 ທ່ານ ເປັນຍິງ 3 ທ່ານ, ຜູ້ປະເມີນ 8 ທ່ານແລະມາຈາກຕ່າງແຂວງ 12 ທ່ານ ທີ່ມາຈາກ ສະຫະພັນບານເຕະແຫ່ງຊາດລາວ, ມະຫາວິທະຍາໄລແຫ່ງຊາດລາວ, ສະຖາບັນວິຈິດສິນແຫ່ງຊາດ, ວິທະຍາໄລເຕັກນິກປາກປາສັກ, ກົມກິລາລະດັບສູງ, ຄະນະວີທະຍາສາດການກິລາ-ກາຍະກຳ, ວິທະຍາໄລສິນລະປະສຶກສາ, ແຂວງບໍ່ແກ້ວ, ແຂວງຫຼວງນ້ຳທາ, ແຂວງອຸດົມໄຊ, ແຂວງຊຽງຂວາງ, ແຂວງຄຳມ່ວນ, ແຂວງສະຫວັນນະເຂດ, ແຂວງສາລະວັນ, ແຂວງເຊກອງ, ແຂວງຈຳປາສັກ, ແຂວງໄຊຍະບູລີ, ແຂວງຜົ້ງສາລີ ແລະ ແຂວງວຽງຈັນ.

News Cover

ລາຍຊື່ ກຳມະການຕັດສິນ ຟີຟາ 2024

18/01/2024

  ສະຫະພັນບານເຕະນານາຊາດ ຫລື FIFA ໄດ້ຕົກລົງແຕ່ງຕັ້ງກຳມະການຕັດສິນ ແລະ ຜູ້ຊ່ວຍກໍາມະການຕັດສິນບານເຕະ FIFA 2024 ແລະ ກໍາມະການຕັດສິນຟຸດຊໍ FIFA 2024 ຂອງສປປລາວມີທັງຫມົດຈຳນວນ 10 ທ່ານ ເຊິ່ງໃນນັ້ນມີກຳມະການໃຫມ່ 1 ທ່ານຄື : ທ່ານ ລຸນ ສຸດທິວົງ ຈາກ ມະຫາວິທະຍາໄລແຫ່ງຊາດລາວ ເຊິ່ງເປັນຄົນພື້ນຖານແຂວງອຸດົມໄຊ.

ສຳລັບລາຍລະອຽດກຳມະການ ມີດັ່ງລຸ່ມນີ້:

– ກຳມະການຕັດສິນ (ຊາຍ) FIFA ຈຳນວນ 2 ທ່ານ:

1. ທ່ານ ສວຍ ວົງຄຳ

2. ທ່ານ ຄຳສິງ ໄຊຍະວົງສີ

- ກຳມະການ (ຍິງ) FIFA ຈຳນວນ 1 ທ່ານ

1. ທ່ານ ນາງ ແກ້ວມະນີ ເພັງເມືອງຄູນ

– ຜູ້ຊ່ວຍກຳມະການຕັດສິນ (ຊາຍ) FIFA ຈຳນວນ 5 ທ່ານ:

1. ທ່ານ ພອນສຸກສັນ ເຕໂຊ

2. ທ່ານ ກິຫລ້າ ລາດຊະວົງ

3. ທ່ານ ບຸນເຊີນ ມອນອາລັກ

4. ທ່ານ ບຸນອູ້ມ ລາດຊະວົງ

5. ທ່ານ ລຸນ ສຸດທິວົງ ( ກຳມະການຟີຟາໃຫມ່ )

– ຜູ້ຊ່ວຍກຳມະການ (ຍິງ) FIFA ຈຳນວນ 1 ທ່ານ:

1. ທ່ານ ນາງ ພຸດສະຫວັນ ຈັນທະວົງ

– ກຳມະການຟຸດຊໍ FIFA ຈຳນວນ 1 ທ່ານ:

1. ທ່ານ ຄຳປະສົງ ໄຊຍະວົງສີ

 ສຳລັບກຳມະການຕັດສິນທັງຫມົດ ກຽມພ້ອມຕັດສິນລາຍການຕ່າງໆທີ່ ສະຫະພັນບານເຕະແຫ່ງຊາດລາວ ຈັດຂຶ້ນທັງພາຍໃນ ແລະ ຕ່າງປະເທດ.


News Cover

ແຜນວຽກງານກຳມະການ ຕັດສິນ ປະຈໍາປີ 2024

19/12/2023

ສະຫະພັນບານເຕະແຫ່ງຊາດລາວ ໄດ້ເຜີຍແຜ່ທິດທາງແຜນວຽກງານການຝຶກອົບຮົມກຳມະການຕັດສິນ ປະຈຳປີ 2024 ໃນກອງປະຊຸມສະໄຫມສາມັນ ສະຫະພັນບານເຕະແຫ່ງຊາດລາວ ປະຈຳປີ 2023,ເຊິ່ງປະກອບມີວຽກງານດັ່ງນີ້:

- ຝຶກອົບຮົມກຳມະການຕັດສິນ (ຂັ້ນພື້ນຖານ) 3 ແຂວງ

- ຝຶກອົບຮົມກຳມະການຕັດສິນ (ຍົກລະດັບລາວລີກ 2) 15 ແຂວງ

- ຝຶກອົບຮົມກຳມະການຕັດສິນ (ຍົກລະດັບ ສຳລັບ ການແຂ່ງຂັນບານເຕະ ລາວລີກ 1 ສົກປີ 2024-2025)

- ຝຶກອົບຮົມກຳມະການຕັດສິນ (ຍົກລະດັບ ສຳລັບ ການແຂ່ງຂັນບານເຕະ LFF U16 & U19)

- ຝຶກອົບຮົມກຳມະການຕັດສິນ (ຍົກລະດັບ ສຳລັບ ການແຂ່ງຂັນບານເຕະລາວລີກຍິງ ປີ 2024)

- ຝຶກອົບຮົມ ຜູ້ປະເມີນ ແລະ ຜູ້ຝຶກສອນກຳມະການຕັດສິນ 2024

- ສອບເສັງກຳມະການ FIFA 2024

- ຝຶກອົບຮົມກຳມະການຕັດສິນລະດັບສູງ (ຍົກລະດັບ) MA Course 2024 FIFA

- ໂຄງການກຳມະການຕັດສິນ ລຸ້ນສືບທອດ LFF Referee Academy

- ຝຶກຊ້ອມທຸກໆວັນພຸດ ສຳລັບ ກຳມະການລາວລີກ 1 ຊາຍ ແລະ ຍິງ

- ຝຶກອົບຮົມກຳມະການຕັດສິນ ຟຸດຊໍ (ຂັ້ນພື້ນຖານ) 1 ແຂວງ

- ຝຶກອົບຮົມກຳມະການຕັດສິນ ຟຸດຊໍ (ຍົກລະດັບ ສຳລັບການແຂ່ງຂັນບານເຕະຟຸດຊໍລີກ)

  ສຳລັບກຳມະການຕັດສິນໃໝ່ ຮຸ່ນສຶບທອບ ທ່ານໃດສົນໃຈເຂົ້າຮ່ວມຝຶກອົບຮົມໃນແຕ່ລະຮຸ່ນ ສາມາດມາພົວພັນ ໄດ້ທີ່ ພະແນກກຳມະການ ຕັດສິນ ສະຫະພັນບານເຕະແຫ່ງຊາດລາວ ໃນໂມງລັດຖະການ.


News Cover

ກໍາມະການຕັດສິນກຽມພ້ອມຮັບໃຊ້ການແຂ່ງຂັນກິລາບານເຕະລາວລີກຍິງ 2023 ທີ່ຈະເປີດສາກ 21 ຕຸລານີ້

18/10/2023

ກໍາມະການຕັດສິນກຽມພ້ອມຮັບໃຊ້ການແຂ່ງຂັນກິລາບານເຕະລາວລີກຍິງ 2023 ທີ່ຈະເປີດສາກ 21 ຕຸລານີ້.

ສະຫະພັນບານເຕະແຫ່ງຊາດລາວ(ສຕລ)ໄດ້ສໍາເລັດການຝຶກອົບຮົມກໍາມະການຕັດສິນການແຂ່ງຂັນກິລາບານເຕະລາວລີກຍິງ 2023 ຕອນແລງວັນທີ 18 ສິງຫາ 2023 ທີ່ຫ້ອງປະຊຸມ ສຕລ,ໂດຍໃຫ້ກຽດເຂົ້າຮ່ວມເປັນປະທານກ່າວປິດພິທີຂອງທ່ານ ນາງ ກັນຍາ ແກ້ວມະນີ ເລຂາທິການ ສຕລ.

ໃນໂອກາດນີ້ ທ່ານ ນາງ ກັນຍາ ແກ້ວມະນີ ໄດ້ສະແດງຄວາມຊົມເຊີຍມາຍັງຜົນສຳເລັດຂອງການຝຶກອົບຮົມຄັ້ງນີ້ ແລະ ຮຽກຮ້ອງໃຫ້ທຸກທ່ານທີ່ຜ່ານການຝຶກອົບຮົມໃຫ້ສຶບຕໍ່ພັດທະນາຝຶກຝົນຕົນເອງໃຫ້ປະສົບຜົນສໍາເລັດໃນການເຂົ້າຮ່ວມເປັນກໍາມະການຕັດສິນໃນການແຂ່ງຂັນ ລາວລີກຍິງ 2023 ຊຶ່ງເປັນຄັ້ງປະຫວັດສາດຂອງການຈັດການແຂ່ງຂັນກິລາບານເຕະລາວລີກຍິງຂອງສປປລາວ,ຂໍໃຫ້ທຸກທ່ານຈົ່ງຕັ້ງໃຈແລະ ມີຜົນສຳເລັດໃນການເປັນກໍາມະການຕັດສິນ.

ສໍາລັບການຝຶກອົບຮົມຄັ້ງນີ້ແມ່ນດຳເນີນເປັນເວລາ 3ວັນ ແຕ່ວັນທີ 16-18 ຕຸລາ 2023,ເຊິ່ງມີນັກຝຶກອົບຮົມເຂົ້າຮ່ວມທັງໝົດ26 ຄົນ.ເຂົ້າຮວ່ມກອງປະຊຸມນີ້ຍັງມີທ່ານ ໄຊປະເສີດ ພົງຊະນິດ ຫົວໜ້າພະແນກກຳມະການຕັດສິນທັງເປັນຜູ້ຝຶກສອນກຳມະການຕັດສິນ ສຕລ, ພ້ອມດວ້ຍຜູ້ຊ່ວຍຄູຝຶກສອນແລະວິຊາການພະແນກກໍາມະການຕັດສິນສຕລ.

 ການແຂ່ງຂັນບານເຕະ ລາວລີກຍິງ ປະຈຳປີ 2023 Lao Women's League 2023 ຈະເລີ່ມເປີດສາກຢ່າງເປັນທາງການໃນວັນເສົາ 21/10/2023 ເຊິ່ງໃຊ້ສະຫນາມຫຍ້າທຽມສະຫະພັນບານເຕະແຫ່ງຊາດລາວ ສະຫນາມ 1 ແລະ ສະຫນາມ 2 ເປັນສະຫນາມທີ່ແຂ່ງຂັນໂດຍມີທີມເຂົ້າຮ່ວມທັງຫມົດ 8 ທີມປະກອບມີ:

1. ຊ້າງນ້ອຍ

2. ມາສເຕີ້ ເຊເວັ້ນ

3. ເອສະຣາ

4. ກອງທັບ

5. ຫຼວງພະບາງ

6. ຈຳປາສັກ

7. ນໍ້າທາ

8. ວຽງຈັນ

ສາມາດໄປຊົມ ແລະ ເຊຍ ຕິດຂອບສະຫນາມທີມທີ່ຕົນເອງມັກໄດ້, ເຂົ້າຊົມບໍ່ເສຍຄ່າ(FREE) ແລະ ສາມາດຮັບຊົມ

ການຖ່າຍທອດສົດໄດ້ທີ່ ເພສເຟສບຸກ LAOWOMEN'SLEAGUE ລາວລີກຍິງ ,Youtube LAOFF TV ແລະ Application LTC PLAY.

News Cover

ຝຶກອົບຮົມກຳມະການຕັດສິນ ເພື່ອກະກຽມ ການແຂ່ງຂັນບານເຕະ ລາວລີກຍິງ ປະຈຳປີ 2023 ທີ່ຈະເປີດສາກຂຶ້ນໃນທ້າຍອາທິດນີ້

16/10/2023

ຕອນເຊົ້າ ວັນທີ 16 ຕຸລາ 2023 ຢູ່ທີ່ຫ້ອງປະຊຸມ ສະຫະພັນບານເຕະແຫ່ງຊາດລາວ ໄດ້ມີພິທີເປີດ ຊຸດຝຶກອົບກຳມະການຕັດສິນ ເພື່ອກະກຽມ ການແຂ່ງຂັນບານເຕະ ລາວລີກຍິງ ປະຈຳປີ 2023 Lao Women's League 2023 ໂດຍເຂົ້າຮ່ວມພິທີເປີດໂດຍມີ ທ່ານ ຄໍາແພງ ວົງຂັນຕິ ຮອງປະທານ ສະຫະພັນບານເຕະແຫ່ງຊາດລາວ ທັງເປັນຫົວຫນ້າອະນຸກຳມະການຕັດສິນ ສຕລ, ທ່ານ ທອງປະເສີດ ພອນສິຣິຍະວົງ ຫົວໜ້າຫ້ອງການນິຕິກຳ ແລະ ທ່ານ ໄຊປະເສີດ ພົງຊະນິດ ຫົວໜ້າພະແນກກຳມະການຕັດສິນທັງເປັນຜູ້ຝຶກສອນກຳມະການຕັດສິນ ສຕລ, ພ້ອມດວ້ຍຜູ້ຊ່ວຍຄູຝຶກສອນ, ວິຊາການພະແນກກໍາມະການຕັດສິນ ສຕລ ແລະ ຜູ້ຝຶກອົບຮົມເຂົ້າຮ່ວມທັງໝົດ 24 ຄົນ ເປັນຍິງ 7 ຄົນ.

 ທ່ານ ຄຳແພງ ວົງຂັນຕີ ໄດ້ກ່າວວ່າ: ຖືວ່າເປັນໂອກາດດີອັນຫນຶ່ງຂອງ ສະຫະພັນບານເຕະແຫ່ງຊາດລາວ ເວົ້າລວມ ເວົ້າສະເພາະກໍຄືບານເຕະຍິງ ທີ່ທາງພວກເຮົາມີິຄວາມສາມາດຈັດການແຂ່ງຂັນຂຶ້ນ ເຊິ່ງເປັນຄັ້ງທຳອິດທີ່່ຈັດລາຍການແຂ່ງຂັນນີ້ຂຶ້ນ ສະນັ້່ນຂໍສະເຫນີໃຫ້ກຳມະການຕັດສິນທີ່ຝຶກອົບຮົມຄັ້ງດັ່ງກ່າວໃຫ້ເອົາໃຈໃສ່ໃຫ້ລະອຽດກ່ຽວກັບກົດລະບຽບກະຕິກາຕ່າງໆ

 ສຳລັບຈຸດປະສົງແມ່ນກໍເພື່ອກະກຽມຄວາມພ້ອມເຂົ້າຮ່ວມຕັດສິນ ການແຂ່ງຂັນບານເຕະ ລາວລີກຍິງ ປະຈຳປີ 2023, ກຽມຄວາມພ້ອມທາງດ້ານກະຕິການ, ພາລະກໍາລັງ ເຊິ່ງການຝຶກອົບຮົມແມ່ນໄດ້ດໍາເນີນການຝຶກອົບຮົມ 3 ມື້ຄື: ນັບຕັ້ງແຕ່ວັນທີ 16 -18 ຕຸລາ 2023.

  ການແຂ່ງຂັນບານເຕະ ລາວລີກຍິງ ປະຈຳປີ 2023 Lao Women's League 2023 ຈະເລີ້ມເປີດສາກຄວາມມັນໃນວັນເສົາ 21/10/2023 ເຊິ່ງໃຊ້ສະຫນາມຫຍ້າທຽມສະຫະພັນບານເຕະແຫ່ງຊາດລາວ ສະຫນາມ 1 ແລະ ສະຫນາມ 2 ເປັນສະຫນາມທີ່ແຂ່ງຂັນໂດຍມີທີມເຂົ້າຮ່ວມທັງຫມົດ 8 ທີມປະກອບມີ:

1. ຊ້າງນ້ອຍ

2. ມາສເຕີ້ ເຊເວັ້ນ

3. ເອສະຣາ

4. ກອງທັບ

5. ຫຼວງພະບາງ

6. ຈຳປາສັກ

7. ນໍ້າທາ

8. ວຽງຈັນ

ສາມາດໄປຊົມ ແລະ ເຊຍ ຕິດຂອບສະຫນາມທີມທີ່ຕົນເອງມັກໄດ້, ເຂົ້າຊົມຟຣີ ແລະ ສາມາດຮັບຊົມ ການຖ່າຍທອດສົດໄດ້ທີ່ ເພສເຟສບຸກ LAOWOMEN'SLEAGUE ລາວລີກຍິງ ,Youtube LAOFF TV ແລະ Application LTC PLAY.


News Cover

ພຸດສະຫວັນ ຈັນທະວົງ ກຳມະການຕັດສິນ ຈາກ ສປປລາວ ໄດ້ຖືກຄັດເລືອກຕັດສິນຮອບຮອງຊະນະເລີດ

06/10/2023

ນາງ ພຸດສະຫວັນ ຈັນທະວົງ ຜູ້ຊ່ວຍກຳມະການຕັດສິນ FIFA Elite ຈາກ ສປປລາວ ໄດ້ຖືກຄັດເລືອກໃຫ້ລົງຕັດສິນ ການແຂ່ງຂັນກິລາບານເຕະ ງານມະຫະກໍາກິລາເອຊຽນເກມ ຄັ້ງທີ 19 ທີ່ຫາງໂຈວ່ ສປ ຈີນ ຮອບຮອງຊະນະເລີດ ລະຫວ່າງ ອຸດສະເບກິດສະຖານ ພົບ ສປປ ເກົາຫລີ ເຊິ່ງການແຂ່ງຂັນຈະມີຂຶ້ນໃນວັນທີ 03 ຕຸລາ 2023.

#RefereeLFF

#LaoFootballFederation

#asiangames2023

News Cover

ຄຳປະສົງ ໄຊຍະວົງສີ ກຳມະການຕັດສິນຟຸດຊໍ ຈາກລາວ ສຳເລັດ ການຕັດສິນ ລາຍການ International Futsal Friendly Match ທີ່ ປະເທດໄທ

04/10/2023

ໃນລະຫວ່າງວັນທີ 26-30/9/2023 ສະຫະພັນບານເຕະແຫ່ງຊາດລາວ ໄດ້ສົ່ງ ທ່ານ ຄໍາປະສົງ ໄຊຍະວົງສີ ກໍາມະການຕັດສິນຟູດຊໍ FIFA ເຂົ້າຮ່ວມຕັດສິນລາຍການ International Futsal Friendly Match ທີ່ ປະເທດໄທ

News Cover

ນາງ ພຸດສະຫວັນ ຈັນທະວົງຖືກຄັດເລືອກ ເຂົ້າຮ່ວມຕັດສິນກິລາບານເຕະໃນເອຊຽນເກມຄັ້ງທີ 19

20/09/2023

ນາງ ພຸດສະຫວັນ ຈັນທະວົງ ຜູ້ຊ່ວຍກໍາມະການຕັດສິນລະດັບສູງຂອງສະຫະພັນບານເຕະສາກົນ ຫລື FIFA Elite ໄດ້ຖືກຄັດເລືອກຈາກສະຫະພັນບານເຕະອາຊີ (AFC) ໃຫ້ເຂົ້າຮ່ວມຕັດສິນໃນງານມະຫະກຳກິລາບານເຕະເອຊຽນເກມ ຄັ້ງທີ19 ທີ່ຫາງໂຈວ່, ສປ ຈີນ ໃນລະຫວ່າງວັນທີ 19 ກັນຍາ - 7 ຕຸລາ 2023.

ຈາກການຖືຄັດເລືອກຄັ້ງນີ້,ນາງ ພຸດສະຫວັນ ຈັນທະວົງ ກາຍເປັນກໍາມະການຕັດສິນຍິງ

 1 ດຽວຂອງສປປລາວ ແລະ ເປັນຄັ້ງທຳອິດຂອງນາງພຸດສະຫວັນ ໄດ້ເຂົ້າຮ່ວມຕັດສິນກິລາບານເຕະໃນເອຊຽນເກມຄັ້ງນີ້.

 ກ່ອນໜ້ານີ້ນາງ ພຸດສະຫວັນ ໄດ້ໄປຮ່ວມຕັດສິນການແຂ່ງຂັນກິລາບານເຕະຍິງ ຮຸ່ນອາຍຸບໍ່ເກີນ 20 ປີ ຊິງແຊ້ມອາຊີ 2024 ຮອບຄັດເລືອກ ຮອບທີໜຶ່ງ ກຸ່ມ D ທີ່ປະເທດຈໍແດນ (ຊັອກດານີ) ໃນວັນທີ 6-12 ມີນາ 2023,ກາຍເປັນກຳມະການຕັດສິນຍິງລາວຄົນທຳອິດ ໄດ້ຖືກຄັດເລືອກໃຫ້ເຂົ້າຮ່ວມຕັດສິນລາຍໃນການຊົງກຽດນີ້ໃນລະດັບທະວີບອາຊີ.

 ພິເສດ,ສຳລັບປີນີ້ ນາງ ພຸດສະຫວັນ ທີ່ໄດ້ຖືກຄັດເລືອກເຂົ້າຮ່ວມຕັດສິນກິລາບານເຕະໃນຫລາຍລາຍການໃນການແຂ່ງຂັນລະດັບອາຊີ ແລະ ລະດັບອາຊຽນ.