ລະຫວ່າງວັນທີ 18-19 ພຶດສະພາ2024 ຜ່ານມາ, ສະຫະພັນບານເຕະແຫ່ງຊາດລາວ ສົມທົບ ກັບພະແນກສຶກສາທິການ ແລະ ກິລາແຂວງບໍ່ແກ້ວໄດ້ຈັດກິດຈະກໍາຝຶກອົບຮົມຄູຝຶກກິລາບານເຕະໃນໂຄງການກິລາບານເຕະໃນໂຮງຮຽນ ທົ່ວແຂວງບໍ່ແກ້ວຂື້ນ FIFA FOOTBALL FOR SCHOOLS,ໂດຍການເປັນປະທານຂອງ ທ່ານ ສູນດາມ ມົນຕີ ຫົວໜ້າພະແນກເຕັກນິກວິທະຍາສະຫະພັນບານເຕະແຫ່ງຊາດລາວ, ທ່ານ ສົມຊາຍ ສີສະຫວັດ ຮອງຫົວໜ້າພະແນກສຶກສາທິການ ແລະ ກິລາແຂວງ,ພ້ອມດວ້ຍບັນດາຄູຝຶກ ຕະຫຼອດຮອດນັກກິລາເຂົ້າຮ່ວມ.

          ຈຸດປະສົງໃນການຝຶກອົບຮົມຄູຝຶກກິລາບານເຕະໃນໂຮງຮຽນຄັ້ງນີ້ແມ່ນເພື່ອຍົກລະດັບຄວາມຮູ້ຄວາມສາມາດແລະວິທີສິດສອນກິລາບານເຕະໃຫ້ກັບຄູພາລະສຶກສາທົ່ວແຂວງບໍ່ແກ້ວໄດ້ນໍາເອົາຫຼັກສູດແບບໃໝ່ໆຂອງກິລາບານເຕະໄປນໍາໃຊ້ຝຶກຢູ່ບັນດາໂຮງຮຽນໃນທົ່ວແຂວງບໍ່ແກ້ວ, ເພື່ອເປັນການພັດທະນານັກກິລາບານເຕະລຸ້ນສືບທອດກໍ່ຄືລຸ້ນເຍົາວະຊົນທັງປະເພດຍິງ-ຊາຍໃຫ້ກ້າວສູ່ຄຸນນະພາບສຸງຂື້ນ.ໃນນັ້ນ,ລວມມີການແນະນໍາການຝຶກແອບແບບໝູນສໍາລັບນັກກິລາໃຫ້ເຂົາເຈົ້າໄດ້ປັບປຸງຄວາມສາມາດຂອງນັກກິລາ,ຮູ້ທັກສະ,ມີໄຫວພິກໃນການຫຼີ້ນບານທີ່ຄ່ອງແຄ້ວ,ສ້າງຄວາມປະພຶດກໍ່ຄືມີນໍ້າໃຈນັກກິລາ, ເປັນສູນກາງເຂົ້າເຖິງນັກກິລາ, ເປັນຈຸດສຸມຂອງການພັດທະນານັກກິລາເຍົາວະຊົນ ຍິງ-ຊາຍ ເພື່ອອະນາຄົດ ແລະ ເປັນເວທີສອນນັກກິລາໃຫ້ຫຼີ້ນຫຼາຍກ່ວາເພື່ອເອົາຊະນະ.

           ການຈັດກິດຈະກໍາໃນຄັ້ງນີ້ມີຄູພາລະເຂົ້າຮວ່ມທັງໝົດ 35 ທ່ານ ຍິງ 3 ທ່ານ, ນັກກິລາທີມາຈາກ 4 ສະ ໂມສອນຄື: ສະໂມສອນ ອາດີ, ສະໂມສອນ 3 ອ້າຍນ້ອງ, ສະໂມສອນ ດີ່ໂດ່ ແລະ ສະໂມສອນ ສີສະຫວັດ ລວມທັງໝົດ 100 ນ້ອງ, ຍິງ 25 ນ້ອງ.ໃນໂອກາດນີ້,ສະຫະພັນບານເຕະແຫ່ງຊາດລາວຍັງໄດ້ມອບອຸປະກອນກິລາໝາກບານໃຫ້ແກ່ໂຮງຮຽນ ແລະ ສະໂມສອນ ໂຮງຮຽນລະ 10 ໜ່ວຍຕື່ມອີກ.

      ການແຂ່ງຂັນເລີ່ມຂື້ນໃນວັນທີ 14 ກຸມພາ ຫາວັນທີ 2 ເມສາ 2024 ທີ່ເດີ່ນໂຮງຮຽນ ມສ ດຼີມ, ເມືອງຫ້ວຍຊາຍ ແຂວງບໍ່ແກ້ວ, ແບ່ງເປັນປະເພດຍິງ ມີ 8 ທີມ ແລະ ປະເພດຊາຍ ມີ 8 ທີມ ແບ່ງເປັນ 2 ກຸ່ມ A-B:

     + ປະເພດຍິງ: ຮອບຊິງຊະນະເລີດ ເມື່ອວັນທີ 2 ເມສາຜ່ານມາ ມສ ຊົນເຜົ່າ ເອົາຊະນະດວນລູກໂທດ ມຕ ຫ້ວຍຊາຍໃຕ້ 2-1, ຫຼັງຈາກເວລາປົກກະຕິສະເໝີກັນ 0-0, ມສ ຊົນເຜົ່າ ຄວ້າແຊ້ມໄປຄອງ ຮັບຂັນແຊ້ມ ພ້ອມເງິນລາງວັນ.

      ສ່ວນຄູ່ຊິງອັນດັບ 3 ມຕ ປາກງາວ ແຊ້ມເກົ່າ ເອົາຊະນະດວນຈຸດໂທດ ມຕ ບໍ່ແກ້ວ 3-1, ຫຼັງຈາກເວລາປົກກະຕິສະເໝີກັນ 0-0 ເມື່ອວັນທີ 21 ມີນາຜ່ານມາ.

      + ປະເພດຊາຍ: ຮອບຊິງຊະນະເລີດ ເມື່ອວັນທີ 2 ເມສາຜ່ານມາ ມສ ຊົນເຜົ່າ ເອົາຊະນະ ມສ ດຼີມ ແຊ້ມເກົ່າ 2-1, ມສ ຊົນເຜົ່າ ຄວ້າແຊ້ມໄປຄອງ ຮັບຂັນແຊ້ມ ພ້ອມເງິນລາງວັນ.

       ຂະນະທີ່ ຄູ່ຊິງອັນດັບ 3 ມຕ ບໍ່ແກ້ວ ເອົາຊະນະ ມສ ສັນຕິພາບ 3-2 ເມື່ອວັນທີ 18 ມີນາຜ່ານມາ.

       ການຈັດການແຂ່ງຂັນບານເຕະນັກຮຽນມັດທະຍົມຕອນຕົ້ນ ຍິງ-ຊາຍ ແມ່ນຢູ່ໃນແຜນກຳນົດ 5 ລາຍການ ທີ່ສະຫະພັນບານເຕະແຫ່ງຊາດລາວ ຈັດຮ່ວມກັບ ບັນດາສະຫະພັນບານເຕະແຂວງ/ນະຄອນຫລວງ ປະຈໍາປີ 2024.

Photo: ສະຫະພັນບານເຕະ ແຂວງບໍ່ແກ້ວ Bokeo Football Federation