ສະຫະພັນບານເຕະແຫ່ງຊາດລາວ(ສຕລ) ໄດ້ສຳເລັດການຝຶກອົບຮົບຜູ້ຄວບຄຸມ ການແຂ່ງຂັນ ແລະ ຜູ້ປະສານງານລວມຈັດການແຂ່ງຂັນປະຈຳທ້ອງຖິ່ນ ປະຈຳປີ 2025, ເຊິ່ງພິທີປິດໄດ້ຈັດຂື້ນໃນຕອນແລງ ວັນທີ 04 ກໍລະກົດ 2025 ທີ່ຫ້ອງປະຊຸມ ສຕລ ,ພາຍໃຕ້ການເປັນປະທານຂອງ ທ່ານ ນາງ ຍອດແກ້ວ ພາວະດີ ເລຂາທິການ ສຕລ, ທ່ານ ຈັນທະວົງ ສິລິມະໂນທໍາ ຮອງເລຂາທິການ ສຕລ ທັງເປັນຜູ້ຄວບຄຸມການແຂ່ງຂັນລະດັບອາຊີ ເປັນວິທະຍາກອນ, ທ່ານ ສັນຕິກອນ ແສງດາລາ ຫົວຫນ້າ ພະແນກ ຈັດການແຂ່ງຂັນ ວິທະຍາກອນ ພ້ອມດ້ວຍພະນັກງານວິຊາການລວມ 33 ຄົນເຂົ້າຮວ່ມ.   

       ການຝຶກອົບຮົມຄັ້ງນີ້ຈັດຂື້ນເພື່ອຈຸດປະສົງສືບຕໍ່ສ້າງບຸກຄະລະກອນກິລາບານເຕະໃຫ້ຫລາຍຂຶ້ນທັງດ້ານປະລິມານ ແລະ ຄຸນນະພາບ,ເປັນການຍົກລະດັບການບໍລິຫານຈັດການແຂ່ງຂັນແບບເປີດກວ້າງໃຫ້ກັບບຸກຄະລາກອນ ຢູ່ນະຄອນຫຼວງວຽງຈັນ ແລະ ທ້ອງຖິ່ນ ເພື່ອສືບທອດ ໃນໜ້າວຽກ ດັ່ງກ່າວ,ທັງເປັນການສົ່ງເສີມ ແລະ ຂະຫຍາຍວຽກງານການຈັດການແຂ່ງຂັນ ບານເຕະພາຍໃນປະເທດໃນທຸກລະດັບໃນແຕ່ລະປີ, ພິເສດແມ່ນກຽມ ຄວາມພ້ອມໃຫ້ແກ່ ລາຍການແຂ່ງຂັນຕ່າງໆຂອງ ສຕລ ທີ່ຈະຈັດຂຶ້ນ ປະຈຳປີ 2025 ນີ້ໃຫ້ມີຜົນສຳເລັດ .     

       ໃນໄລຍະການຝຶກອົບຮົມ 3 ວັນ ນັບແຕ່ວັນທີ 02 - 04 ກໍລະກົດ 2025, ຜູ້ເຂົ້າຮ່ວມຝຶກອົບຮົມໄດ້ຮຽນຮູ້ທາງດ້ານທິດສະດີ ແລະ ພາກປະຕິບັດຕົວຈິງ ແລະ ມີການສອບເສັງທົດສອບຄວາມຮູ້, ຄວາມເຂົ້າໃຈຕ່າງໆ,ຖ້າຫາກບຸກຄະລາກອນຄົນໃດມີຄະແນນດີ ກໍມີໂອກາດໄດ້ຖືກຄັດເລືອກໃຫ້ເປັນຜູ້ຊ່ວຍຄວບຄຸມການແຂ່ງຂັນ, ໃນທ້າຍພິທີຍັງມີການມອບໃບຢັ້ງຢືນໃຫ້ແກ່ນັກຝຶກອົບຮົມທີ່ສຳເລັດການຮຽນໃນຄັ້ງນີ້ຕື່ມອີກ.