ການແຂ່ງຂັນບານເຕະ ເປບຊີ ລາວລີກ 1 ລະດູການ 2025/26 ນັດສຸດທ້າຍຂອງການແຂ່ງຂັນໄດ້ຈັດຂຶ້ນທີ່ສະຫນາມກິລາແຫ່ງຊາດ(ຫຼັກ16) ເປັນການພົບກັນ ລະຫວ່າງ ສະໂມສອນ ເອສະຣາ ພົບ ສະໂມສອນ ຊ້າງນ້ອຍ ຜ່ານການແຂ່ງຂັນສະໂມສອນ ບານເຕະ ເອສະຣາ ເສຍໃຫ້ ສະໂມສອນ ຊ້າງນ້ອຍ 1-6, ຊ້າງນ້ອຍ ໄດ້ປະຕູຈາກ: ເບີ 9 ກີ້ດາວອນ ສຸວັນນີ ນາທີ 29’,54’, ເບີ 99 HYUN WOOK JUNG ນາທີ 33’, ເບີ 20 ແສງດາວວີ ຫັນທະວົງ ນາທີ 46’, ເບີ 8 ພຸດດາວີ ພົມມະສານ ນາທີ 49’, ເບີ 91 ພຸດພະໄຕ ຈັນທະລັງສີ ນາທີ 74’ ຂະນະທີ່ ເອສະຣາ ໄດ້ປະຕູຈາກ: ເບີ 7 ປີເຕີ້ ພັນທະວົງ ນາທີ 45’.

        ສະໂມສອນ ເອສະຣາ ລົງແຂ່ງຂັນທັງຫມົດ 18 ນັດ ຊະນະ 15 ນັດ ສະເຫມີ 1 ນັດ ເສຍ 2 ນັດ ມີ 46 ຄະແນນ ຍິງໄດ້ທັງຫມົດ 63 ປະຕູ ເສຍ 16 ປະຕູ, ຄວ້າແຊ້ມ ການແຂ່ງຂັນບານເຕະ ເປບຊີ ລາວລີກ 1 ລະດູການ 2025/26 ເປັນສະໄຫມທີ 2 ຕິດຕໍ່ກັນ ໄດ້ຮັບຂັນຊະນະເລີດ, ຫລຽນ ແລະ ເງິນລາງວັນຈຳນວນ 600 ລ້ານກີບ ຂະນະທີ່ ສະໂມສອນ ຊ້າງນ້ອຍ ໄດ້ອັນດັບ 2 ແຂ່ງຂັນ 18 ນັດ ຊະນະ 14 ນັດ ສະເຫມີ 2 ນັດ ເສຍ 2 ນັດ ມີ 44 ຄະແນນ ໄດ້ຮັບເງິນລາງວັນຈຳນວນ 300 ລ້ານກີບ, ອັນດັບ 3 ສະໂມສອນ ມັດສະດ້າ ຈີບີ ໄດ້ຮັບເງິນລາງວັນ 150 ລ້ານກີບ, ອັນດັບ 4 ສະໂມສອນ ຈຳປາສັກ ອາເວເນຍ ໄດ້ຮັບເງິນລາງວັນ 75 ລ້ານກີບ, ອັນດັບ 5 ສະໂມສອນ ກອງທັບ ໄດ້ຮັບເງິນລາງວັນ 50 ລ້ານກີບ, ອັນດັບ 6 ສະໂມສອນ ສາລະວັນ ຢູໄນເຕັດ ໄດ້ຮັບເງິນລາງວັນ 45 ລ້ານກີບ, ອັນດັບ 7 ສະໂມສອນ ຫຼວງພະບາງ ຟຟລ ໄດ້ຮັບເງິນລາງວັນ 35 ລ້ານກີບ, ອັນດັບ 8 ສະໂມສອນ ນໍ້າທາ ຢູໄນເຕັດ ໄດ້ຮັບເງິນລາງວັນ 30 ລ້ານກີບ, ອັນດັບ 9 ສະໂມສອນ ບີໄອເອັສ ມາດສເຕີ້ ໄດ້ຮັບເງິນລາງວັນ 25 ລ້ານກີບ ແລະ ອັນດັບສຸດທ້າຍ ສະໂມສອນ ສະຫວັນນະເຂດ ໄດ້ຮັບເງິນລາງວັນ 20 ລ້ານກີບ.

        ສ່ວນລາງວັນປະເພດບຸກຄົນມີຄື: ລາງວັນຄູຝຶກດີເດັ່ນ ທ່ານ ບຽງຊູນາ BYUNG SOO NA ສັນຊາດ ສ.ເກົາຫລີ ຈາກ ສະໂມສອນ ບານເຕະ ເອສະຣາ, ລາງວັນນັກກິລາດີເດັ່ນ ປີເຕີ້ ພັນທະວົງ ຈາກ ສະໂມສອນ ບານເຕະ ເອສະຣາ, ລາງວັນຜູ້ຮັກສາປະຕູດີເດັ່ນ ສໍລະສັກ ທີລະວົງ ຈາກ ສະໂມສອນ ບານເຕະ ຊ້າງນ້ອຍ ແລະ ລາງວັນຜູ້ຍິງປະຕູສູງສຸດ KOKI NARITA ສັນຊາດຍີ່ປຸ່ນ ຈາກ ສະໂມສອນ ບານເຕະ ເອສະຣາ ຍິງໄດ້ 22 ປະຕູ.

        ການແຂ່ງຂັນບານເຕະ ເປບຊີ ລາວລີກ 1 ລະດູການ 2025/2026 ແມ່ນໄດ້ເລີ່ມແຂ່ງຂັນນັບຕັ້ງແຕ່ ວັນທີ 16 ສິງຫາ 2025 ຫາ ວັນທີ 14 ມີນາ 2026. ຮູບແບບການແຂ່ງຂັນແມ່ນແຂ່ງຂັນແບບພົບກັນຫມົດຈຳນວນ 2 ຮອບ ຂາໄປ ແລະ ຂາກັບ ຈຳນວນນັດແຂ່ງຂັນທັງຫມົດ 90 ນັດ.