ສະຫະພັນບານເຕະແຫ່ງຊາດລາວ(ສຕລ)ໄດ້ຈັດການຝຶກອົບຮົມຄູຝຶກກິລາບານເຕະລະດັບ “A”(LFF/AFC “A” Diploma Coaching Course 2023/2024)ຄັ້ງທີ 2 ຂື້ນຢ່າງເປັນທາງການທີ່ ສຕລ ເມື່ອວັນທີ 19 ມິຖຸນາ 2023 ໂດຍໃຫ້ກຽດເຂົ້າຮ່ວມຂອງທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ, ທ່ານ ຊູນດໍາ ມູຕີ ຫົວໜ້າພະແນກເຕັກນິກ - ວິທະຍາ ສຕລ, ທ່ານ ເຮີມັນ ຄູຝຶກສອນ ເປັນວິທະຍາກອນ ພ້ອມດ້ວຍວິຊາການທີ່ກ່ຽວຂ້ອງ ແລະ ບັນດານັກສໍາມະນາກອນຝຶກອົບຮົມຄູຝຶກ “A” (Coaching Course)ເຂົ້າຮ່ວມ.

ການເປີດຝຶກອົບຮົມຄູຝຶກໃນຄັ້ງນີ້ແມ່ນໄດ້ຮັບການຮັບຮອງຈາກສະຫະພັນບານເຕະອາຊີ ຫຼື AFC ຮ່ວມກັບ ສຕລ ຮັບຮອງ ແລະ ຕົກລົງຈັດຝຶກອົບຮົມຢ່າງເປັນທາງການ ໂດຍມີບັນດານັກສໍາມະນາກອນຝຶກອົບຮົມຄູຝຶກ ຈໍານວນທັງໝົດ 21 ທ່ານ,ທີ່ມາຈາກຕ່າງປະເທດ 6 ທ່ານ ແລະ ສໍາມະນາກອນເສັງຄືນ 3 ທ່ານ.ການຮຽນຄູຝຶກກິລາບານເຕະລະດັບ “A”ໄດ້ແບ່ງເປັນ 6 ໄລຍະໃນການຮຽນ ອາທິດທໍາອິດແມ່ນເລີ່ມຈາກວັນທີ 19-30 ເດືອນມິຖຸນາ, ໄລຍະທີ 2 ແມ່ນເດືອນກໍລະກົດ, ໄລຍະທີ3 ແມ່ນເດືອນກັນຍາ ແລະ ໄລຍະທີ 4 ແມ່ນເດືອນພະຈິກ ແລະ ຈາກນັ້ນກໍແມ່ນສືບຕໍ່ໃນປີ 2024 (ລາຍລະອຽດຕາຕະລາງການຮຽນຈະແຈ້ງໃຫ້ຊາບພາຍຫຼັງ).

ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວໄດ້ໃຫ້ກຽດກ່າວເປີດງານຢ່າງເປັນທາງການ,ເຊິ່ງບາງຄຳເຫັນທ່ານໄດ້ກ່າວວ່າ:ນີ້ແມ່ນນິມິດໝາຍອັນດີ,ເຊິ່ງກ່ອນນີ້5ປີເຄີຍຝຶກອົບຮົມມາແລ້ວ, ຄັ້ງນີ້ເປັນຄັ້ງທີ່ 2 ໃນ ສປປ ລາວ ທີ່ພວກເຮົາເປີດຝຶກອົບຮົມຄູຝຶກ,ເພື່ອຈຸດປະສົງສ້າງຄຸຝຶກມາພັດທະນາບານເຕະປະເທດເຮົາເພີ່ມຂຶ້ນ, ເຊິ່ງການຮຽນເທື່ອນີ້ເປັນບົດຮຽນໃນຮູບແບບໃໝ່ ແບ່ງເປັນ 6 ພາກ ທັງໄດ້ຝຶກ ທັງໄດ້ຮຽນນໍາກັນເປັນປີ ຢາກໃຫ້ນັກສໍາມະນາກອນເອົາໃຈໃສ່ຍາດແຍ່ງເອົາໂອກາດທີ່ມີຄວາມໝາຍຄວາມສໍາຄັນນີ້, ເຊິ່ງໃນລາວລີກ 1 ປີໜ້າ ສະຫະພັນບານເຕະຂອງພວກເຮົາມີກົດລະບຽບຄືຮັບເອົາຄູຝຶກທີ່ຜ່ານ A license ແລະ B license ເປັນຄູຝຶກ ນີ້ກໍເປັນໂອກາດອັນດີໃຫ້ບັນດາຄູຝຶກໄດ້ໄປນໍາໃຊ້ໃນບັນດາສະໂມສອນຕ່າງໆຂອງລາວລີກ 1, ເປົ້າໝາຍຂອງຄະນະນໍາສຕລພວກເຮົາ,ຫຼັງຈາກຈົບລະດູການນີ້ກົດລະບຽບຂອງການແຂ່ງຂັນລາວລີກ1 ຜູ້ເປັນຄູຝຶກຕ້ອງມີໃບຢັ້ງຢືນ A license ເທົ່ານັ້ນ ແລະ ສວ່ນB ແມ່ນຈະມາເປັນຜູ້ຊ່ວຍຄູຝຶກທີມຊາດເທົ່ານັ້ນ.

ທ່ານປະທານສະຫະພັນບານເຕະແຫ່ງຊາດລາວກ່າວຕື່ມວ່າ:ທຸກທ່ານທີ່ເຂົ້າມາຮຽນ ສາມາດເປັນຄູຝຶກໃຫ້ກັບສະໂມສອນຕ່າງໆໄດ້. ສະນັ້ນບັນດາສະໂມສອນທີ່ຈະຂຶ້ນມາລາວລີກຕ້ອງມີ A license,ປັດຈຸບັນບັນດາສະໂມສອນໃນລາວລີກ1 ກໍມີການປັບປຸງພັດທະນາຫຼາຍຂື້ນແລະໄດ້ນໍາໃຊ້ຄູຝຶກທີ່ເປັນຄົນລາວ. ສະນັ້ນເພື່ອຍາດແຍ່ງບໍ່ໃຫ້ຄູຝຶກຕ່າງປະເທດເຂົ້າມາເຮັດວຽກໃນປະເທດເຮົາ,ພວກເຮົາຕ້ອງພັດທະນາຕົນເອງໃຫ້ແຂງແຮງ ແຂງແກ່ນຂຶ້ນ ໃຫ້ໄດ້ລະດັບ AFC ມາດຕະຖານການແຂ່ງຂັນ, ສຸດທ້າຍຂໍໃຫ້ທຸກທ່ານຈົ່ງສືບຕໍ່ຕັ້ງໃຈ ເຮັດໃຫ້ໄດ້  A license, ແລ້ວຕໍ່ Pro license ເພື່ອພັດທະນາວົງການບານເຕະ,ຄູຝຶກ,ນັກກິລາໃຫ້ປະສົບຜົນສໍາເລັດຮ່ວມກັນ.

ຂະນະທີ່ ທ່ານ ຊູນດໍາ ມູຕີ ຫົວໜ້າພະແນກເຕັກນິກວິທະຍາຂອງສຕລ ກໍໄດ້ກ່າວວ່າ: ຫຼັງຈາກ 5 ປີຜ່ານມາ ເຮົາກໍຫວນກັບມາ ເປີດການຝຶກກິລາບານເຕະລະດັບ “A” ອີກຄັ້ງໜຶ່ງ, ເປົ້າໝາຍຂອງການຝຶກຄັ້ງນີ້ກໍແມ່ນເພື່ອເພີ່ມບຸກຄະລາກອນ “A” Coaching  ຂອງປະເທດລາວ, ນີ້ເປັນນະໂຍບາຍ ແລະ ວິໃສທັດ ເພື່ອພັດທະນາ “A” Coaching ໃຫ້ສືບຕໍ່ເປັນຈໍານວນເພີ່ມຂຶ້ນໃນອະນາຄົດຂອງປະເທດເຮົາ, ຄຸນນະພາບຂອງຄູຝຶກແນ່ນອນສົ່ງຜົນສະທ້ອນເຖິງຄຸນນະພາບຂອງນັກກິລາແລະ ສົ່ງຜົນສະທ້ອນຂອງນັກກິລາອອກຈາກສະໂມສອນລີກ1, ລີກ2 ຫຼື ເຍົາວະຊົນກໍດີ, ພວກເຮົາໄດ້ສູ້ຊົນຜ່ານຜ່າຫຼາຍອຸປະສັກ ແລະ ຫຼັງຈາກເປີດ “A” Coaching Course ພວກເຮົາກໍຢາກຝາກໃຫ້ນັກສໍາມະນາກອນທຸກທ່ານ ທຸ້ມເທທຸກສິ່ງທຸກຢ່າງໃຫ້ປະສົບຜົນສໍາເລັດໄປນໍາກັນ ພວກເຮົາຈະພະຍາຍາມຊ່ວຍເປັນທິດທາງໃນການດໍາເນີນການຝຶກອົບຮົມຄັ້ງນີ້ ແລະ ຫວັງວ່າພວກເຮົາຈະໄດ້ຮ່ວມງານກັນພາຍຫຼັງຊຸດອົບຮົມນີ້ສຳເລັດລົງ.ໃນການຝຶກອົບຮົມຄັ້ງນີ້ແມ່ນຈະມີການຮຽນຮູ້ທາງດ້ານທິດສະດີ ແລະການປະຕິບັດຕົວຈິງ ພ້ອມດຽວກັນຍັງມີການສອບເສັງ.

ການແຂ່ງຂັນບານເຕະ ຊິງແຊ້ມອາຊີ ຮຸ່ນອາຍຸບໍ່ເກີນ 17  ປະຈຳປີ 2023 ຮອບສຸດທ້າຍກຸ່ມ A  ວັນທີ 18 ມິຖຸນາ 2023 ຢູ່ທີ່ສະຫນາມກິລາທຳມະສາດ ໄດ້ມີການແຂ່ງຂັນນັດທີສອງລະຫວ່າງ  ທີມຊາດລາວU17  ພົບ ທີມຊາດເຢເມນU17  ຜ່ານການແຂ່ງຂັນຜົນປະກົດວ່າ ທີມຊາດລາວ ເສຍໃຫ້ ເຢເມນ 1-2

- ລາວ ໄດ້ປະຕູຈາກ: ເບີ 19 ພູສົມບູນ  ປັນຍາວົງ ນາທີ 55'
- ເຢເມນ ໄດ້ປະຕູຈາກ: ເບີ 18 ADEL   ນາທີ 28, ເບີ 3 Anwar ( Pen ) ນາທີ 75'

ທີມຊາດລາວU17 ແລະ ມາເລເຊຍU17 ເສຍ 2 ນັດລວດ ຕົກຮອບແນ່ນອນແລ້ວ, ສ່ວນ ໄທ ແລະ ເຢເມນ ຊະນະ 2 ນັດ.

ນັດສຸດທ້າຍຂອງກຸ່ມ A ມາເລເຊຍ ພົບ ລາວ ແລະ ໄທ ພົບ ເຢເມນ ຈະແຂ່ງຂັນວັນທີ 21 ມິຖຸນາ 2023.

ວັນທີ 17 ມິຖູນາ 2023 ຢູ່ທີ່ນະຄອນຫຼວງ ຈາກາຕ້າ ປະເທດອິນໂດເນເຊຍ ໄດ້ມີການຈັບສະຫລາກການແຂ່ງຂັນບານເຕະຍິງຊີງແຊ້ມອາຊຽນຮຸ່ນອາຍຸບໍ່ເກີນ 19 ປີ ເຊິ່ງຈະຈັດຂຶ້ນໃນລະຫວ່າງວັນທີ 01 – 19 ກໍລະກົດ 2023 ຢູ່ທີ່ປະເທດອິນໂດເນເຊຍ.

ການແຂ່ງຂັນລາຍການດັ່ງກ່າວມີ 10 ປະເທດ ເຂົ້າຮ່ວມ ການແຂ່ງຂັນ ໂດຍແບ່ງອອເປັນ 3 ກຸ່ມ ຄັດອັນດັບ 1 ຂອງແຕ່ລະກຸ່ມ ຜ່ານເຂົ້າຮອບ ແລະ ອັນດັບ 2 ທີ່ມີຄະແນນດີທີ່ສຸດຜ່ານເຂົ້າຮອບຮອງຊະນະເລີດ , ຜົນການຈັບສະຫລາກມີດັ່ງນີ້:
- ກຸ່ມ A: ອິນໂດເນເຊຍ, ກຳປູເຈຍ, ລາວ ແລະ ຕີມໍ ເລສເຕ
- ກຸ່ມ B:  ຫວຽດນາມ, ມາເລເຊຍ ແລະ ສິງກະໂປ
- ກຸ່ມ C: ໄທ, ມຽນມາ ແລະ ຟີລິບປິນ
ສຳລັບ ທີມຍິງລາວU19 ແມ່ນໄດ້ເລີ້ມເກັບຕົວຝຶກຊ້ອມນັບຕັ້ງແຕ່ຕົ້ນເດືອນມິຖຸນາ 2023 ເປັນຕົ້ນມາໂດຍແມ່ນ ທ່ານ ວຽງສະຫວັນ ໄຊຍະບູນ ເປັນຫົວຫນ້າຄູຝຶກ ໄດ້ເອີ້ນນັກກິລາ 26 ຄົນ ທີ່ມາຈາກຫລາຍແຂວງຮ່ວມຄັດເລືອກປະກອບມີ: ແຂວງຈຳປາສັກ, ແຂວງສະຫວັນນະເຂດ, ນະຄອນຫຼວງ, ແຂວງວຽງຈັນ,ແຂວງຫຼວງພະບາງ  ແລະ ແຂວງອຸດົມໄຊ.

ການແຂ່ງຂັນບານເຕະ ຊິງແຊ້ມອາຊີ ຮຸ່ນອາຍຸບໍ່ເກີນ 17  ປະຈຳປີ 2023 ຮອບສຸດທ້າຍກຸ່ມ A  ວັນທີ 15 ມິຖຸນາ 2023 ຢູ່ທີ່ສະຫນາມກິລາປະທຸມທານີ ໄດ້ມີການແຂ່ງຂັນລະຫວ່າງ  ທີມຊາດລາວU17  ພົບ ທີມຊາດລາວU17 ເຊິ່ງເປັນນັດທຳອິດທັງ 2 ທີມ  ຜ່ານການແຂ່ງຂັນຜົນປະກົດວ່າ ທີມຊາດລາວ ເສຍໃຫ້ ໄທ 1-2

- ທີມຊາດລາວ ໄດ້ປະຕູຈາກ: ເບີ 10 ປີເຕີ້ ພັນທະວົງ ນາ  26'

- ທີມຊາດໄທ ໄດ້ປະຕູຈາກ:  ເບີ 19' DUTSADEE 12',  ເບີ 10  CHANOTHAI ນາທີ 90+5'

ນັດທີ ສອງ ຂອງກຸ່ມ A ລາວ ພົບ ເຢເມນ ແລະ ໄທ ພົບ ມາເລເຊຍ ຈະແຂ່ງຂັນວັນທີ  18 ມິຖຸນາ 2023.

ທ່ານ ອາ​ເຣ​ນ່າ ກູ​ເລຍ​ໂມ່ ມີ​ໃບ​ປະ​ກາດ UEFA Pro License ແລະ ມີຜົນງານການຄຸມທີມໃນ​ລີກຫລາຍປະ​ເທດ​ຄື:ລີກໃນປະ​ເທດ​ບູ​ກີ​ນາ​ຟາ​ໂຊ,​ເບ​ນິນ,ສິງ​ກະ​ໂປ,ໂອ​ມານ,​ອາ​ນ​ຈີ​ເຣຍ,ສະ​ຫະ​ລັດ​ອາ​ຣັບ ອີ​ມີ​ເຣດ,ມາ​ຣົກ, ເປັນ​ຜູ້​ຊ່ວຍຄູ​ຝຶກPhilippe Troussier ໃນ ສະ​ໂມ​ສອນ ​ HangzhouGreentown ​ໃນ​ລີກ ສ​ປ. ຈີນ.

ໃນ​ໂອ​ກາດ​ດັ່ງ​ກ່າວທ່ານ ອາ​ເຣ​ນ່າ ກູ​ເລຍ​ໂມ່ ໄດ້​ສະ​ແດ​ງ​ຄວາມດີໃຈທີ່ໄດ້ມາມີສວ່ນຮວ່ມໃນການພັດທະນາກິລາບານເຕະທິມຊາດລາວແລະ ຈະ​ເຮັດ​ຜົນ​ງານ​ໃຫ້​ດີ​ທີ່​ສຸດ ພ້ອມຈະຮວ່ມມືກັບສຕລ,ຄະນະທິມງານຄູຝືກແລະ ນັກກິລາທິມຊາດລາວສ້າງຜົນງານໃຫ້ໄດ້ດີທີ່ສຸດ.

ສຳ​ລັບ ອາ​ເຣ​ນ່າກູ​ເລຍ​ໂມ່ ຈະ​ນຳ​ພາ ທີມ​ຊາດ​ລາວU23 ເຂົ້າ​ຮ່ວມ ການແຂ່ງຂັນບານເຕະຊາຍຊີງແຊ້ມອາຊຽນ ຮຸ່ນອາຍຸບໍ່ເກີນ 23 ປີ ຢູ່​ທີ່​ປະ​ເທດ​ໄທ ໃນ​ລະ​ຫວ່າງວັນ​ທີ 17-26 ສິງ​ຫາ 2023 ໂດຍ​ທີມ​ຊາດ​ລາວ ຢູ່​ ກຸ່ມຊີ ຮ່ວມ​ກັບ ຟີ​ລິບ​ປິນ, ຫວຽດ​ນາມ ແລະ ການ​ແຂ່ງ​ຂັນ​ບານ​ເຕະຊາຍຮຸ່ນອາຍຸບໍ່ເກີນ 23 ປີ (U23) ຊິງແຊ້ມອາຊີ 2024 ຮອບຄັດເລືອກ (AFC U23 Asian Cup 2024 qualifying round) ລະ​ຫວ່​າງວັນ​ທີ 06-12 ກັນ​ຍາ 2023 ເຊິ່ງ ທີມ​ຊາດ​ລາວ ຢູ່​ກຸ່ມ I ຮ່ວມກັບ ອົສະຕຣາລີ, ທາຈີກິສຖານ ແລະ ສປປເກົາຫລີ.

       ການ​ແຂ່ງ​ຂັນ​ບານມັດ​ທະ​ຍົມ​ຕອນ​ປາຍ ຊາຍ - ຍິງ ທົ່ວ​ແຂວງ​ເຊກອງ ແມ່ນ​ມີ​ບັນ​ຍາ​ກາດ​ຟົດ​ຟື້ນ​ໂດຍ​ໄດ້​ເລີ້ມ​ການ​ແຂ່ງ​ຂັນ​ມາ​ນັບ​ຕັ້ງ​ແຕ່​ວັນ​ທີ 19 ພຶດ​ສະ​ພາ 2023 ເປັນ​ຕົ້ນ​ມາ​, ໂດຍ ການ​ແຂ່ງ​ຂັນ​ບານ​ເຕະມັດ​ທະ​ຍົມ​ຕອນ​ປາຍ ຊາຍ ມີທີມ​ເຂົ້າ​ຮ່ວມ 7 ທີມ​ປະ​ກອບ​ມີ: ໂຮງ​ຮຽນ ມໍ​ປາຍແຂວງ, ໂຮງ​ຮຽນ​ ມັດ​ທະ​ຍົມ​ສົມບູນ ບ້ານ.ໂພນ, ໂຮງ​ຮຽນ​ ມັດ​ທະ​ຍົມ​ສົມ​ບູນ ບ້ານ ດອນ​ຈັນ, ໂຮງ​ຮຽນ​ ມັດ​ທະ​ຍົມ​ສົມ​ບູນ ບ້ານ. ກະ​ປື, ໂຮງ​ຮຽນ​ ມັດ​ທະ​ຍົມ​ສົມ​ບູນ ເມືອງ​ທ່າ​ແຕງ, ໂຮງ​ຮຽນ​ ສາ​ມັນ​ກິນນອນ ຊົນ​ເຜົ່າ​ແຂວງ ແລະ ໂຮງ​ຮຽນ ມິດ​ຕະ​ພາບ ລາວ - ຫວຽດ ຂະ​ນະທີ່ ການ​ແຂ່ງ​ຂັນ​ບານ​ເຕະມັດ​ທະ​ຍົມ​ຕອນ​ປາຍ ຊາຍ ມີທີມ​ເຂົ້າ​ຮ່ວມ 7 ທີມ​ປະ​ກອບ​ມີ: ໂຮງ​ຮຽນ ມໍ​ປາຍແຂວງ, ໂຮງ​ຮຽນ​ ສາ​ມັນ​ກິນນອນ ຊົນ​ເຜົ່າ​ແຂວງ, ໂຮງ​ຮຽນ ມິດ​ຕະ​ພາບ ລາວ - ຫວຽດ, ໂຮງ​ຮຽນ​ ມັດ​ທະ​ຍົມ​ສົມ​ບູນ ເມືອງ​ທ່າ​ແຕງ, ໂຮງ​ຮຽນ​ ມັດ​ທະ​ຍົມ​ສົມ​ບູນ ບ້ານ ດອນ​ຈັນ, ໂຮງ​ຮຽນ​ ມັດ​ທະ​ຍົມ​ສົມ​ບູນ ບ້ານ. ກະ​ປື ແລະ ໂຮງ​ຮຽນ ມັດ​ທະ​ຍົມ​ສົມ​ບູນ ບ້ານ. ຈຸນ​ລາ.  ການ​ແຂ່ງ​ຂັນ​ລາຍ​ການ​ດັ່ງ​ກ່າວ​ແມ່ນ​ແບ່ງ​ອອກ ເປັນ 2 ກຸ່​ມ​ ຄັດ​ເອົາ​ອັນ​ດັບ 1 ແລະ ອັນ​ດັບ 2 ຜ່ານ​ເຂົ້າ​ຮອບ​ຮອງ​ຊະ​ນະ​ເລີດ  ແມ່ນ​ຈະ​ແຂ່ງ​ຂັນ​ໃນ​ວັນ​ທີ 12-13 ມິ​ຖຸ​ນາ 2023 ສ່ວນ ນັດ​ຊີງ​ອັນ​ດັບ 3 ແມ່ນ​ແຂ່ງ​ຂັນ​ໃນ​ວັນ​ທີ 15 ມິ​ຖຸ​ນາ  2023 ແລ​ະ ນັດ​ຊີ​ງ​ຊະ​ນະ​ເລີດ ວັນ​ທີ 16 ມິ​ຖຸ​ນາ 2023.
ໃນການຈັດການແຂ່ງຂັນລາວລີກ2ຂອງແຕ່ລະແຂວງ ແລະ ນະຄອນຫຼວງວຽງຈັນຄັ້ງນີ້,ສະຫະພັນບານເຕະແຫ່ງຊາດລາວ(ສຕລ)ໄດ້ໃຫ້ການ ສະຫນັບສະຫນູນງົບປະມານໃຫ້ແຕ່ລະແຂວງທີ່ຈັດການແຂ່ງຂັນລາວລີກ2ເປັນຈຳນວນເງິນ 60 ລ້ານກີບ,ສວ່ນແຂ່ງຂັນລະດັບມັດທະຍົມຕົ້ນ(ຊາຍ-ຍິງ)30ລ້ານກີບແລະລະດັບມັດທະຍົມປາຍ(ຊາຍ-ຍິງ)30ລ້ານກີບລວມໄດ້ຮັບເງິນອຸປະຖໍາຈາກສຕລໃນການແຂ່ງຂັນທັງ3ລາຍການເປັນເງິນທັງໝົດ120ລ້ານກີບຕໍ່ແຂວງ.

ຄະນະນັກກິລາທີມຊາດລາວ U17 ສໍາເລັດການເກັບໂຕຝຶກຊ້ອມທີ່ປະເທດ ກາຕ້າ ແລະ ເດີນທາງກັບດ້ວຍຄວາມສະຫວັດດີພາບ ໃນວັນທີ 6 ມີຖຸນາ 2023.ກຽມພ້ອມເຂົ້າຮ່ວມການແຂ່ງຂັນ AFC U17 ຮອບສຸດທ້າຍທີ່ປະເທດໄທ ລະຫວ່າງວັນທີ 15 ມິຖຸນາ ຫາ 2 ກໍລະກົດ 2023.
ຕາ​ຕະ​ລາງ​ການ​ແຂ່ງ​ຂັນ​ທີມ​ຊາດ​ລາວ
- ວັນ​ທີ 15/06/2023 ເວ​ລາ 19:00 ໄທ ພົບ ລາວ ແຂ່ງ​ຂັນ​ຢູ່​ທີ່​ສະ​ຫນາມ​ກິ​ລ​າປະ​ທຸມ​ທາ​ນີ
- ວັນ​ທີ 18/06/2023 ເວ​ລາ 17:00 ເຢ​ເມນ ພົບ ລາວ ແຂ່ງ​ຂັນ​ຢູ່​ທີ່​ສະ​ຫນາມ​ກິລາ​ທຳ​ມະ​ສາດ
- ວັນ​ທີ 21/06/2023 ເວ​ລາ 19:00 ມາ​ເລ​ເຊຍ ພົບ ລາວ ແຂ່ງ​ຂ​ັນ​ຢູ່​ທີ່​ສະ​ຫນາມ​ກິ​ລາ​ທຳ​ມະ​ສາດ
n